– ءابيبا, بىلتىر استانادا وتكەن ازيا چەمپيوناتىندا كۇمىس مەدال يەلەنىپ, جانكۇيەرلەردى ءبىر قۋانتقان ەدىڭ. سول كەزدە سويلەسكەنىمىزدە «بۇيىرتسا, الداعى الەم چەمپيوناتىندا جۇلدە الۋ ءۇشىن بارىمدى سالامىن» دەپ اقتارىلا سويلەدىڭ. ايتقان ۋادەڭدە تۇرىپ, تاشكەنتتە قولا مەدالدى قورجىنعا سالدىڭ. سول بەلەستەن كورىنۋ قانشالىقتى قيىن بولدى؟
– تورتكۇل دۇنيەنىڭ تەڭدەسسىزدەرى جينالعان جارىستا كۇرەسۋ قاشان دا قيىن. وزبەكستاننىڭ استاناسىنا كىلەڭ مىقتىلار كەلدى. مەن ونەر كورسەتەتىن 48 كيلو سالماق دارەجەسىندە دە باسەكەلەستىك وتە كۇشتى بولدى. تۇساۋكەسەر كەزدەسۋىمدە برازيليالىق امانادا ليمانى تازا ۇتتىم. كەلەسى كەزەڭدە ەۋروپا چەمپيونى, الەمدىك رەيتينگتە كوش باستاپ تۇرعان فرانتسيالىق شيرين بۋكليدەن باسىم ءتۇستىم. شيرەك فينالدا قۇرلىق بىرىنشىلىگىنىڭ قولا جۇلدەگەرى سەربيالىق ميليتسا نيكوليچتى سان سوقتىردىم. جارتىلاي فينالدا الەم چەمپيونى, ازيا ويىندارىنىڭ جەڭىمپازى, جاپونيالىق ناتسۋمي تسۋنوداعا ءالىم جەتپەدى. ال قولا مەدال ءۇشىن تارتىستا چيليلىك ماري دي ۆارگاس لەيدىڭ وسال تۇسىن تاپتىم.
بۇل بەلدەسۋلەردىڭ بىردە-بىرەۋىندە جەڭىس ماعان وڭايلىقپەن كەلگەن جوق. ءار بەلدەسۋدە بارىمدى سالدىم. قالاي دا ەلگە ولجالى ورالۋدى كوزدەدىم. اسىرەسە, سوڭعى ايقاس اسا اۋىر سوقتى. ويتكەنى جارتىلاي فينالدا مەن بۇرىن سىنعان قولىمدى قايتا جاراقاتتاپ العان ەدىم. سوعان قاراماستان سوڭعى سەكۋندتارعا دەيىن ايقاستىم. ءسويتىپ, اللانىڭ قالاۋى جانە ءوزىمنىڭ تاباندىلىعىمنىڭ ارقاسىندا جەڭىس تۇعىرىنا كوتەرىلدىم.
– سول كەزدەگى كوڭىل كۇيىڭمەن بولىسسەڭ؟
– ونى سوزبەن جەتكىزە الماسپىن. تالاي جىلعى تىنىمسىز ەڭبەگىمنىڭ اقتالعانىنا, كۇللى قازاق جانكۇيەرلەرىنىڭ سەنىمىن اقتاي العانىما قاتتى قۋانىپ, ەرەكشە شاتتاندىم.
– تاشكەنتتەگى جەڭىسىڭدى كىمگە ارنادىڭ؟
– اناما ارنادىم. ءار جارىسقا اتتانعان سايىن اناشىم ءتۇنى بويى ۇيىقتاماي, مەن ءۇشىن قاتتى ۋايىمدايدى. جاراتۋشىعا جالبارىنىپ, دۇعا قىلادى. وسى ساپارعا اتتانعانىمدا دا ءدال سولاي بولدى.
– سەن – قازاق قىزدارى اراسىنان الەم چەمپيوناتىندا جۇلدە العان تۇڭعىش دزيۋدوشىسىڭ. وسى جاعداي ساعان قالاي اسەر ەتۋدە؟
– مەن ءۇشىن بۇل – ۇلكەن مارتەبە. وسى سپورت تۇرىمەن اينالىسا باستاعانىمدا ءدال وسىنداي دارەجەگە جەتەمىن دەپ ەش ويلامادىم. دەسەك تە ەتكەن ەڭبەك ەش كەتپەيدى ەكەن. مۇنى مەن جاتتىعۋ زالىندا شەلەكتەپ توككەن تەرىمنىڭ وتەۋى دەپ بىلەمىن. وعان باپكەرلەرىمنىڭ ەرەن ەڭبەگىن قوسىڭىز. بىراق وسى تابىستارىمدى قاناعات تۇتىپ, قول قۋسىرىپ وتىرۋدان اۋلاقپىن. الدا كوز ارباعان اسۋلار كوپ. سولاردىڭ شىڭىنا شىعۋ ءۇشىن شەبەرلىگىمدى ءالى دە شىڭداي تۇسۋگە ءتيىسپىن.
– وسى جىل دا سەن ءۇشىن ءساتتى باستالدى عوي...
– ونىڭىز راس. قاڭتار ايىندا پورتۋگاليانىڭ المادا قالاسىندا وتكەن گران-پري دوداسىندا التىننان القا تاقتىم. فينالدا ءوزىمنىڭ كوماندالىق ارىپتەسىم ءارى قۇربىم عاليا تىنباەۆادان ايلامدى اسىردىم. اقپان ايىندا فرانتسيانىڭ باس شاھارى – پاريجدە قولا مەدال ولجالادىم. ءسويتىپ, حالىقارالىق دزيۋدو فەدەراتسياسىنىڭ (IJF) رەيتينگىندە ءۇشىنشى ورىنعا كوتەرىلدىم.
– الەمدىك رەيتينگتە سەنەن كىمدەر جوعارى تۇر؟
– شيرين بۋكلي مەن ناتسۋمي تسۋنودا. تاشكەنتتەگى الەمدىك دودادا ولاردىڭ ەكەۋىمەن دە كۇرەسكەنىمدى جوعارىدا ايتتىم عوي. فرانتسيالىق بالۋاندى ۇتتىم, جاپونيالىق سپورتشىدان جەڭىلدىم.
– قىسقا عانا مەرزىم ارالىعىندا ۇزاق جىلدار بويى قازاق قىزدارى باعىندىرا الماي جۇرگەن بەلەستەردىڭ بيىگىنە كوتەرىلدىڭ. سول ءۇشىن دە ساعان ءدان ريزامىز. ال ەندى الداعى جوسپارلارىڭمەن بولىسسەڭ.
– الداعى جارىستاردا دا الاش جۇرتىن قۋانىش پەن شاتتىققا بولەسەم دەيمىن. ال باستى ماقساتىم – بيىل دوحادا جالاۋى جەلبىرەيتىن الەم چەمپيوناتى مەن كەلەسى جىلى پاريجدە الاۋى تۇتاناتىن وليمپيا ويىندارىندا جەڭىس تۇعىرىنا كوتەرىلۋ.
– ءابيبا, اڭگىمەڭە كوپ راحمەت. كوزدەگەن ماقساتىڭا جەتۋىڭە تىلەكتەسپىز.
اڭگىمەلەسكەن
عالىم سۇلەيمەن,
«Egemen Qazaqstan»
