پرەمەر-ءمينيستردىڭ ورىنباسارى الدىمەن وبلىستىق اۋرۋحاناعا بارىپ, دارىگەرلەرمەن كەزدەستى. قوستانايدا كوپسالالى زاماناۋي اۋرۋحانا سالۋ جوسپارلانىپ وتىر. قازىر عيماراتتىڭ ورنىن انىقتاۋ جۇمىستارى ءجۇرىپ جاتىر. مۇنىڭ سىرتىندا, وبلىس ورتالىعىندا جاڭا پەريناتالدىق ورتالىق بوي كوتەرمەك.
التاي كولگىنوۆ بۇل ماسەلەنى دەنساۋلىق ساقتاۋ مينيسترلىگىمەن كەڭەسە وتىرىپ شەشۋدى تاپسىردى.
– وڭىرلەردە 12 جاڭا پەريناتالدىق ورتالىق سالۋ جوسپاردا تۇر. ورتالىقتىڭ قاي جەردە بوي كوتەرەتىنىن جەرگىلىكتى بيلىك بەلگىلەسىن. قوسىمشا ۇسىنىستارىڭىزدى دەنساۋلىق ساقتاۋ مينيسترلىگىمەن بىرلەسە وتىرىپ شەشەيىك. ءبىز ءتيىستى قاراجاتتى بولەمىز, ول جاعىنان قام جەمەڭىزدەر, دەدى التاي كولگىنوۆ.
ۇكىمەت باسشىسىنىڭ ورىنباسارى ودان كەيىن «بەرەكە» شاعىن اۋدانىندا 2021 جىلدان بەرى سالىنىپ جاتقان ءۇش قاباتتى مەكتەپتىڭ قۇرىلىسىمەن تانىستى. مۇنداعى قۇرىلىس جۇمىستارى بيىل مامىر ايىندا اياقتالۋى ءتيىس. وسى ماقساتتا ءبىلىم بەرۋ ينفراقۇرىلىمىن قولداۋ قورىنان تاعى 1,3 ملرد تەڭگە قارجى بولىنەدى.
ودان كەيىن ا.كولگىنوۆ قوستاناي اۋدانىنا قاراستى جۋكوۆ اۋىلىنىڭ تۇرعىندارىمەن كەزدەستى. مۇنداعى مەكتەپ عيماراتى تالاپقا ساي ەمەس. ونىڭ ۇستىنە, اۋىل حالقىنىڭ ءبىرازى ءورىستىلدى بولعانىمەن, سوڭعى جىلدارى قازاق تىلىندە ءبىلىم بەرەتىن مەكتەپ اشىلعانىن قالايتىن تۇرعىندار كوبەيىپ كەلەدى. ولاردىڭ ايتۋىنشا, مەكتەپ عيماراتى ەسكى. ونى كۇردەلى جوندەۋدەن وتكىزگەننەن گورى, جاڭادان سالعان دۇرىس.
ا.كولگىنوۆ اۋدان باسشىلارىنا بۇل اۋىلدا مەكتەپ سالۋ ءۇشىن الدىمەن ونىڭ جوبالىق-سمەتالىق قۇجاتىن دايىنداۋدى تاپسىرىپ, مەكتەپتىڭ جوباسىن ازىرلەگەندە, 100 ورىننان كەم بولماۋىن ەسكەرتتى. ويتكەنى وقۋشى سانى 100-دەن كەم بولسا, زاڭ جۇزىندە مۇنداي شاعىن مەكتەپتەر مەملەكەت تاراپىنان قارجىلاندىرىلمايدى.
– قۇجات دايىن بولعان سوڭ, ءبىز بىردەن قارجى بولەمىز. قوستاناي وڭىرىنە جۇمىس ساپارىم بارىسىندا وبلىس ورتالىعىنان قايتىپ كەتپەي, اۋىلعا دا ات باسىن بۇرىپ وتىرمىن. پرەزيدەنتىمىز قاسىم-جومارت توقاەۆتىڭ تاياۋدا اۋىلداردى دامىتۋ تۋرالى جارلىققا قول قويعانىن بىلەسىزدەر. ەڭ ءبىرىنشى كەزەكتە اۋىل تۇرعىندارىنىڭ تابىسى جوعارى جۇمىسى بولۋى كەرەك. وسى ماقساتتا «اۋىل اماناتى» باعدارلاماسىن قابىلدادىق. باعدارلاما اياسىندا وزدەرىڭىز سياقتى اۋىل تۇرعىندارى جەكە كاسىپ اشىپ, ونى ءارى قاراي دامىتۋعا مۇمكىندىك الادى, دەدى التاي كولگىنوۆ.
پرەمەر-ءمينيستردىڭ ورىنباسارى وڭىرگە جۇمىس ساپارىنىڭ سوڭىندا ىبىراي التىنسارين كەسەنەسىنە بارىپ, ۇلى اعارتۋشىنىڭ رۋحىنا تاعزىم ەتتى.
قوستاناي وبلىسى
