ءىس-شارالارعا جەرگىلىكتى اتقارۋشى ورگانداردىڭ وكىلدەرى, وبلىستىق پروكۋراتۋرالاردىڭ قىزمەتكەرلەرى, اۋماقتىق سايلاۋ كوميسسيالارىنىڭ مۇشەلەرى, كانديداتتاردىڭ سايلاۋالدى شتابتارىنىڭ وكىلدەرى, حالىقارالىق بايقاۋشىلار مەن باق وكىلدەرى قاتىستى.
ورتالىق سايلاۋ كوميسسياسىنىڭ مۇشەلەرى سايلاۋ زاڭناماسىنىڭ بارلىق جاڭالىعىن جانە سايلاۋ الدىنداعى ۇگىتتى قارجىلاندىرۋ ماسەلەلەرىن ءتۇسىندىردى, سونداي-اق 29 بىرمانداتتىق وكرۋگ بويىنشا ءماجىلىس دەپۋتاتتىعىنا كانديداتتاردى تىركەۋ بويىنشا قورىتىندىلاردى جەتكىزدى.
كەڭەستە ءسوز العان اقتوبە وبلىسى اكىمى اپپاراتى باسشىسىنىڭ ورىنباسارى داۋلەتيار توعىزباەۆ وڭىردە سايلاۋشىلاردىڭ تولىق وزەكتى تىزىمدەرىن قالىپتاستىرۋ بويىنشا جۇمىستار جۇرگىزىلگەنىن اتاپ ءوتتى. ونىڭ ايتۋىنشا, وبلىس بويىنشا 562 590 سايلاۋشى بار.
«سايلاۋ ناۋقانى تۋرالى ءوڭىر تۇرعىندارىن جان-جاقتى اقپاراتتاندىرۋ ماقساتىندا 14 Call-ورتالىق جۇمىس ىستەيدى, سايلاۋشىلار تىزىمىندە ءوزىن تەكسەرۋ ءۇشىن تەلەگرامم-بوت تا ىسكە قوسىلدى. سونداي-اق اقتوبە قالاسى بويىنشا تۇراقتى تىركەۋى جوق ازاماتتاردى تىركەۋ ءۇشىن 5 ونلاين-سەرۆيس ىسكە قوسىلدى. سايلاۋ كۇنى ازاماتتاردى تىركەۋ ورنىن ناقتىلاۋ ءۇشىن 208 ونلاين-سەرۆيس جۇمىس ىستەيدى», دەدى د.توعىزباەۆ.
كانديداتتاردىڭ ۇگىتتىك باسپا ماتەريالدارىن ورنالاستىرۋعا 331 ورىن (ستەند) جانە كانديداتتاردىڭ سايلاۋشىلارمەن كەزدەسۋىنە 210 ءۇي-جاي ايقىندالىپ, وبلىس بويىنشا 371 اقپاراتتىق باننەر ورنالاستىرىلعان. د.توعىزباەۆتىڭ مالىمدەۋىنشە, وڭىردەگى بارلىق 525 سايلاۋ ۋچاسكەسى ماتەريالدىق-تەحنيكالىق جاعىنان تولىق جابدىقتالعان. ول سونداي-اق مۇگەدەكتىگى بار ادامدار ءۇشىن سايلاۋ ۋچاسكەلەرىندە قاجەتتى جاعدايلار جاساۋ ماقساتىندا قاجەتتى جۇمىس جۇرگىزىلىپ جاتقانىن حابارلادى.
ايتا كەتەيىك, بۇگىنگى تاڭدا وبلىستا سايلاۋ قۇقىعى بار 1826 مۇمكىندىگى شەكتەۋلى ادام, ونىڭ ىشىندە ەستۋ قابىلەتى بۇزىلعان – 551, كورۋ قابىلەتى بۇزىلعان – 519, كرەسلو-اربالاردى پايدالاناتىن 756 ادام بار. وسىعان وراي قازىرگى ۋاقىتتا 481 ۋچاسكە پاندۋستارمەن قامتاماسىز ەتىلگەن, 44 ۋچاسكەدە كىرەبەرىس ەسىكتەرى تابالدىرىقسىز. سونداي-اق 446 سايلاۋ ۋچاسكەسىندە كىرەبەرىستە تاكتيلدى كورسەتكىشتەر, 511 سايلاۋ ۋچاسكەسىندە مۇگەدەكتىگى بار ازاماتتارعا ارنالعان بۇرىشتار جانە داۋىس بەرۋگە ارنالعان كابينالار ورناتىلعان. سايلاۋ كۇنى ىم ءتىلىنىڭ 19 مامانى مەن «ينۆاتاكسي» 37 اۆتوكولىگىنىڭ قىزمەتى ۇيىمداستىرىلادى.
ءدال وسىنداي جۇمىستار قوستاناي وبلىسىندا دا جۇرگىزىلىپ جاتىر. وبلىس اكىمى اپپاراتىنىڭ باسشىسى مۇرات ساندىباەۆتىڭ حابارلاۋىنشا, وبلىس بويىنشا سايلاۋشىلار تىزىمىنە 554 655 سايلاۋشى ەنگىزىلگەن.
«وڭىردە ازاماتتاردى اقپاراتتاندىرۋدى ارتتىرۋعا ەرەكشە نازار اۋدارىلدى. سايلاۋ تاعايىندالعان ساتتەن باستاپ بارلىق قالا مەن اۋدانداردا Call-ورتالىقتار جۇمىس ىستەيدى. وبلىس دەڭگەيىندە «1315» قىسقا ءنومىرى بار Call-ورتالىق ۇيىمداستىرىلىپ, 1 ناۋرىزدان باستاپ تاۋلىك بويى جۇمىس رەجىمىنە اۋىستىرىلدى. سونىمەن قاتار اكىمدىكتەردىڭ بارلىق سايتىندا سايلاۋ ۋچاسكەسىن ىزدەۋ بويىنشا ونلاين-سەرۆيستەر, ءوز سايلاۋ ۋچاسكەسىن ىزدەۋ ءۇشىن تەلەگرامم-بوت ىسكە قوسىلدى», دەدى م.ساندىباەۆ.
وبلىس اكىمى اپپاراتىنىڭ باسشىسىنىڭ ايتۋىنشا, بۇل قىزمەتتەر سايلاۋشىلارعا ىڭعايلى بولۋ ءۇشىن سايلاۋ وكرۋگتەرى, سونداي-اق كانديداتتار تۋرالى مالىمەتتەردى قامتيدى.
«مۇگەدەكتىگى بار ادامدار ءۇشىن مۇمكىندىكتەردى قامتاماسىز ەتۋ جونىندەگى جۇمىسقا ەرەكشە نازار اۋدارىلىپ وتىر. وبلىستا مۇگەدەكتىگى بار بارلىعى 1736 سايلاۋشى, ونىڭ ىشىندە كورۋ قابىلەتى تولىق جوعالعان – 496, ەستۋ جانە سويلەۋ قابىلەتى تولىق جوعالعان – 370, كرەسلو-اربالاردى پايدالاناتىن 870 ادام بار. بارلىق ۋچاسكە ولاردىڭ داۋىس بەرۋى ءۇشىن جاعدايلارمەن قامتاماسىز ەتىلگەن. اتاپ ايتار بولساق, تاكتيلدى كورسەتكىشتەر, داۋىس بەرۋگە ارنالعان كابينالار, مۇگەدەكتىگى بار ازاماتتارعا ارنالعان بۇرىشتار جابدىقتالعان, وندا مۇگەدەكتىگى بار ازاماتتارعا بەيىمدەلگەن فورماتتا سايلاۋ تۋرالى ماتەريالدارى ورنالاستىرىلعان كومپيۋتەر, قۇلاققاپتار, لۋپا, برايل شريفتىمەن ورىندالعان سايلاۋ تۋرالى اقپاراتى بار ارنايى پاپكا بار.
سايلاۋ وتەتىن كۇنى ىم ءتىلىنىڭ 19 مامانى تارتىلادى. ءاربىر سايلاۋ ۋچاسكەسىندە سايلاۋ كوميسسياسىنا ءوتىنىش بەرگەن ادامدارعا ۋرنالاردى ۇيگە جەتكىزۋ جۇمىستارى دا ۇيىمداستىرىلماق», دەدى ول.
تاعى ءبىر ايتا كەتەتىن جايت, سايلاۋ كۇنى وبلىستىڭ ءتورت وڭىرىندە – قوستاناي جانە رۋدنىي قالالارى, قوستاناي جانە بەيىمبەت مايلين اۋداندارىندا «ينۆاتاكسي» قىزمەت كورسەتەدى.
وڭىرلەردە ۇيىمداستىرىلعان سەمينار-كەڭەستەر بارىسىندا وبلىستىق پروكۋراتۋرالاردىڭ وكىلدەرى ءسوز سويلەپ, سايلاۋ ناۋقانىنىڭ بارلىق كەزەڭدەرىندە زاڭدىلىقتىڭ ساقتالۋىن قاداعالاۋدى قامتاماسىز ەتۋ تۋرالى حاباردار ەتتى.
سەمينار-كەڭەستەردىڭ ەكىنشى بولىمىندە اۋماقتىق سايلاۋ كوميسسيالارىنىڭ مۇشەلەرى ءۇشىن ناقتى كەيستەر نەگىزىندە ىسكەرلىك ويىن تۇرىندە ترەنينگتەر وتكىزىلدى. ويىن بارىسىندا سايلاۋ كوميسسيالارىنىڭ مۇشەلەرى داۋىس بەرۋدىڭ بارلىق بارىسىن قامتيتىن ۋچاسكەلەردە داۋىس بەرۋ ۇدەرىسىن كورسەتتى. ولار ۋچاسكەلىك سايلاۋ كوميسسيالارىنىڭ داۋىس بەرۋ كۇنى قالاي جۇمىس ىستەيتىنىن, سونىڭ ىشىندە ۋچاسكەلەردى اشۋ, بيۋللەتەندەر بەرۋ, داۋىس بەرۋدى ۇيىمداستىرۋ, بايقاۋشىلاردى تىركەۋ, ەسەپتەن شىعارۋ كۋالىكتەرى بويىنشا داۋىس بەرۋ, داۋىستاردى ساناۋ جانە ۋچاسكەلەر بويىنشا ناتيجەلەر شىعارۋ ۇدەرىسىن كورسەتتى.
سەمينار-كەڭەس سوڭىندا ورتالىق سايلاۋ كوميسسياسىنىڭ مۇشەلەرى اۋماقتىق سايلاۋ كوميسسيالارى مۇشەلەرىنىڭ سۇراقتارىنا جاۋاپ بەردى.
