سۋرەتتى تۇسىرگەن قايىربەك ەربولات ۇلى
– بۇل باستامانىڭ تاريحى 2018 جىلدان باستالادى. سول كەزدە مەكتەپتىڭ بىرنەشە مۇعالىمى ناۋرىز ايىندا ۇلتتىق كيىم كيىپ جۇرەتىن. كەلە-كەلە بۇعان باستاۋىش سىنىپ وقۋشىلارى قوسىلدى. ال قازىر مەكتەبىمىزدە ءبىلىم الىپ جۇرگەن 2 مىڭنان اسا وقۋشى, بۇكىل ۇستاز ۇجىمى كوكتەمنىڭ العاشقى كۇنىنەن باستاپ قازاقى قامزول-بەشپەنت كيە باستايدى. بۇل ءبىزدىڭ شاكىرتتەرىمىزدىڭ اتا-انالارى ەرەكشە قولداعان ادەمى ءداستۇر بولدى, – دەيدى مەكتەپ ديرەكتورىنىڭ ورىنباسارى جاننا عابدىقىزى.
راسىندا دا, №30 مەكتەپتە اتا-انالار قاۋىمى ەرەكشە بەلسەندى كورىنەدى. ماسەلەن, سىنىپتا كوپبالالى نەمەسە تۇرمىسى تومەن وتباسىنىڭ بالالارى بولسا, كومەكتەسىپ, دەمەۋشىلىك كورسەتىپ جىبەرەدى ەكەن. كەيبىر سىنىپقا قامزول مەن بەشپەنتتى شەبەر تىگىنشى انانىڭ ءوزى تىگىپ بەرگەن.
14 ناۋرىز – باتىس قازاقستاندا ۇلكەن-كىشى ءبىر-بىرىمەن قۇشاق جايا كورىسەتىن حالىقتىق مەرەكە. ءدال سول كۇنى №30 مەكتەپتىڭ اۋلاسى كەرەمەت تويعا, جايناعان جارمەڭكەگە اينالادى. اۋلاعا قازاندىق قۇرىلىپ, ۇلتتىق تاعامعا تولى داستارقان جايىلادى. بۇل دا حيۋاز مەكتەبىندە بىرنەشە جىلدان بەرى قالىپتاسقان ءداستۇر. «بيىل ءبىزدىڭ اتا-انالارىمىز ۇلىستىڭ ۇلى كۇنىنە وراي بالالارعا ارناپ ەرتەگى قويىلىم كورسەتپەكشى. قازىر سوعان دايىندىق قىزۋ ءجۇرىپ جاتىر», دەيدى جاننا عابدىقىزى.
ايتا كەتەيىك, حيۋاز مەكتەبىنىڭ كەرەمەت ۇلگىسى بۇگىندە قالاداعى وزگە مەكتەپتەرگە دە تاراي باستاعان. سونداي-اق شاھار كوشەلەرىندە ۇلتتىق ناقىشتى كيىمدەر كيىپ, ءداستۇر مەن مادەنيەتىمىزدى ناسيحاتتاۋشىلار كوبەيىپ كەلەدى.
باتىس قازاقستان وبلىسى
