كۇرك-كۇرك جوتەلەتىندەر كۇرت ازايىپ كەلەدى

ادام بالاسىنىڭ باقىتتى بولۋى­نىڭ وننان توعىزى دەنساۋلىعىنا بايلانىستى ەكەن. «دەنساۋلىق ساقتاۋ جۇيەسىنىڭ تيىمدىلىگىن ارتتىرۋ ءۇشىن ونى ۇيىمداستىرۋ, باسقارۋ مەن قارجىلاندىرۋ جۇيەسى رەفورمالاندى. ەلدىڭ بارلىق وڭىرلەرىندە ساپالى مەديتسينالىق قىزمەتتەر الۋ ءۇشىن قاجەتتى جاعداي جاسالدى», دەگەن ەدى ەلباسىمىز «قازاقستان – 2050» ستراتەگياسىندا. ايتسە دە ءوز دەنساۋلىعىنا وتە ەنجار قارايتىن ادامدار كوپ. اسىرەسە, ءبىزدىڭ قاراكوز اعايىندار. جوتەلىپ, ءبىر-ەكى كۇن توسەك تارتىپ جاتىپ قالسا, «جاقسىلاپ تەرلەسەم, جازىلىپ كەتەمىن» دەپ ارقانى كەڭگە سالادى. ءسويتىپ, دەرتىن ۋشىقتىرىپ الادى. قازىرگى تاڭدا جامبىل وبلىسى بويىنشا تۋبەركۋلەزگە قارسى 800 توسەك مونوستاتۋس رەجىمىندە جۇمىس ىستەپ تۇر. دەنساۋلىق كەپىلى يممۋنيتەتكە بايلانىستى ەكەنىن ەستە ساقتاعان ءجون. ادام قۋاتتى بولۋى ءۇشىن دۇرىس, قۇنارلى تاعامدارمەن تاماقتانۋ كەرەك, سپورتپەن شۇعىلدانىپ, تازا اۋادا جەتكىلىكتى مولشەردە ءجۇرۋى قاجەت. وبلىستا مەكتەپكە دەيىنگى بالالار مەكەمەلەرىندە 13 سانا­توريالىق توپ (325 ورىن) ساۋىق­تىرۋ باعىتىندا جۇمىس ىستەپ جاتىر. مەكتەپ جاسىن­داعى جانە جاسوسپىرىمدەردى ساۋىقتىرۋ جۇ­مىستارى ت.رىسقۇلوۆ اۋدانى, كامەنكا اۋىلىنداعى وبلىستىق تۋبەركۋلەزگە قارسى بازاسىنداعى 80 ورىندىق شيپاجايدا جانە مەركى اۋدانى, گرانيتوگورسك اۋىلىنداعى 200 ورىندىق مەكتەپ-ينتەرناتىندا جۇرگىزىلۋدە. 2007 جىلى وبلىستا تەك 5 اۋداندا عانا ساناتوريالىق توپتار بولسا, 2013 جىلدان باستاپ بارلىق اۋدانداردا جانە تاراز قالاسىندا وسىنداي توپتار اشىلدى. تۋبەركۋلەزگە قارسى جۇرگى­زىلىپ جاتقان ءىس-شارالاردىڭ ناتيجەسىندە وبلىستا تۋبەركۋلەزدىڭ ەپيدەميولوگيالىق جاعدايى تۇراق­تالىپ, اۋرۋشاڭدىق جانە تۋبەركۋلەزدەن ءولىم كورسەتكىشى ايتارلىقتاي تومەندەدى. مىسالىعا, 2012 جىل مەن 2013 جىلدى سالىستىرعاندا, وبلىستا اۋرۋشاڭدىق كورسەتكىشى 9,4 پايىزعا تومەندەدى جانە 100 مىڭ تۇرعىنعا شاققاندا 70,6-نى قۇرا­دى, 2012 جىلى بۇل كورسەتكىش 77,9 بولاتىن. ال, ءولىم كورسەتكىشى 13,0 پايىزعا تومەندەپ, 100 مىڭ تۇرعىنعا شاققاندا 5,4-كە تۇراقتادى. ال, 2012 جىلى اۋرۋشاڭدىق كورسەتكىشى 6,2-ءنى قۇراعان بولاتىن. سونداي-اق, وبلىس بويىنشا بالالاردىڭ تۋبەركۋلەزبەن اۋرۋشاڭدىعى 45,6 پايىزعا تومەن­دەگەنىن كورسەتىپ وتىر. 100 مىڭ تۇر­عىنعا شاققاندا 2012 جىلى 10,7, ال, 2013 جىلى 5,5. جاسوسپىرىمدەر اراسىندا 2012 جىلى 81,4, ال, 2013 جىلى 68,2-ءنى قۇرادى. ياعني, بۇل دەرتتىڭ كورسەتكىشى 16,3 پايىزعا تومەندەگەن دەگەن ءسوز. ايتسە دە وبلىستا بۇل سالادا ءالى دە شەشىمىن كۇتىپ تۇرعان ماسەلەلەر بارشىلىق. سونىڭ ءبىرى رەتىندە ناۋقاستارعا ءتيىمدى الەۋمەتتىك قولداۋ كورسەتۋ, تۋبەركۋلەزدىڭ جۇقپالى ءتۇرىن تاراتپاۋ, ديسپانسەر مەديتسينا قىزمەتكەرلەرىنىڭ جەكە باسىنىڭ قاۋىپسىزدىگىن قامتاماسىز ەتۋ ماقسا­تىندا (ارنايى دايىندىقتان وتكەن) كۇزەت قىزمەتىن كۇشەيتۋ, فتي­زياتر-دارىگەرلەرىنىڭ, پسيحولوگ ماماندارىنىڭ جەتىسپەۋشىلىگىن شەشۋدى ايتا كەتۋىمىز قاجەت. ايمان كابدراحيموۆا, جامبىل وبلىستىق تۋبەركۋلەزگە قارسى ديسپانسەرىنىڭ باس دارىگەرى. جامبىل وبلىسى.