كوش باسىندا – ساۋل الۆارەس. ارينە, بۇعان تاڭدانۋعا بولمايدى. ويتكەنى مەكسيكانىڭ مارقاسقاسى ەكىنشى ورتا سالماقتا ءابسوليۋتتى الەم چەمپيونى اتانىپ وتىر. 17 جىل بويى كاسىپقوي رينگتە جۇدىرىقتاسىپ جۇرگەن 32 جاستاعى كانەلو 62 كەزدەسۋ وتكىزىپ, سونىڭ 58-ىندە جەڭىسكە جەتتى. ەكى رەت ۇتىلىپ, ەكى باسەكەنى تەڭ اياقتادى. ول تەك وسىدان 10 جىل بۇرىن فلويد مەيۆەزەردەن, ال بىلتىر دميتري بيۆولدان ۇپاي سانىمەن ۇتىلدى. ءدال وسى الۆارەس 2017-2022 جىلدار ارالىعىندا GGG-مەن ءۇش مارتە جۇدىرىقتاسىپ, ەكى رەتىندە جەڭىسكە جەتكەن ەدى. تاعى ءبىر باسەكەدە جەڭىمپاز انىقتالعان جوق.
ەكىنشى ورىندى تايسون فيۋري يەلەنۋدە. اسا اۋىر سالماقتاعى WBC نۇسقاسىنىڭ چەمپيوندىق بەلبەۋىن يەلەنىپ وتىرعان 35 جاستاعى ۇلىبريتانيانىڭ الىبى وسى سپورت ءتۇرىن سەرىك ەتكەلى 18 جىلعا جۋىقتادى. سول ارالىقتا 34 رەت ايقاسىپ, بىردە-ءبىر جەكپە-جەكتە جەڭىلگەن جوق. 24 قارسىلاسىن نوكاۋتقا جىبەردى. ول تەك 2018 جىلى دەونتەي ۋايلدەرمەن تەڭ ءتۇستى. بىراق كەيىننەن ءدال سول اقش بوكسشىسىن فيۋري ەكى رەت وڭدىرماي سابادى. بيىل 29 ساۋىردە «سىعان پاتشاسى» الەكساندر ۋسيكپەن ايقاسادى. ءدال وسى جەكپە-جەكتە الىپتار اراسىنداعى الەمنىڭ ءابسوليۋتتى چەمپيونى انىقتالادى.
ءۇشىنشى ساتىعا دميتري بيۆول جايعاستى. قىرعىزستاندا تۋىپ-ءوسىپ, كەيىننەن رەسەيگە قونىس اۋدارعان ول – جارتىلاي اۋىر سالماقتا WBا-نىڭ سۋپەرچەمپيونى. 32 جاستاعى توقماقتىڭ تۋماسى بىلتىر ساۋل الۆارەستەن ايلاسىن اسىرىپ, جەر-جاھان جانكۇيەرلەرىنىڭ قوشەمەتىنە بولەندى. ودان كەيىن حيلبەرتو راميرەستى ۇتىپ, سول جەڭىسىنىڭ كەزدەيسوق ەمەستىگىن دالەلدەدى. 2014 جىلدان بەرى بيۆول 21 رەت شارشى الاڭعا شىعىپ, بارلىق قارسىلاسىنان باسىم ءتۇستى. 11 كەزدەسۋدى ول مەرزىمنەن بۇرىن اياقتادى.
سونداي-اق توپ-10 كاسىپقوي بوكسشىنىڭ قاتارىندا تەرەنس كروۋفورد (اقش), گەننادي گولوۆكين (قازاقستان), الەكساندر ۋسيك (ۋكراينا), ەنتوني دجوشۋا ( ۇلىبريتانيا), ناويا ينوۋە (جاپونيا), ەررول سپەنس (اقش), ليام سميت ( ۇلىبريتانيا) سىندى ساڭلاقتار بار.
