"ساق بولىڭىز!" قازاقستاندىقتارعا زەينەتاقىعا قاتىستى ۇندەۋ جاسالدى

بجزق مالىمەتىنشە، الاياقتار زەينەتكەرلەرگە زەينەتاقى جيناقتارىنىڭ 50 پايىزىن كەز كەلگەن ماقساتتا الۋدى اقىلى تۇردە ۇسىنعان.

«جالعان دەلدالدار وزدەرىن قور قىزمەتكەرلەرى رەتىندە تانىستىرىپ، زەينەتكەرلەرگە اقىسىن تولەسە، زەينەتاقى جيناقتارىنىڭ 50%-ىن كەز كەلگەن ماقساتتا جۇمساۋعا الىپ بەرۋ قىزمەتىن ۇسىنىپ وتىر. بۇل اقپارات «جالعان» جانە شىندىققا سايكەس كەلمەيدى»، دەيدى زەينەتاقى قورىنىڭ وكىلدەرى. 

زەينەتاقى قورى الەۋمەتتىك جەلىلەردە جانە باسقا دا اقپارات كوزدەرىندە تاراتىلىپ جۇرگەن اقىلى تۇردە جيناقتاردىڭ 50% الۋ مۇمكىندىگى تۋرالى حابارلامالارعا سەنبەۋگە قاتاڭ كەڭەس بەرەدى. «بجزق جۇرگىزەتىن بارلىق وپەراتسيا تەگىن جاسالادى. بجزق ءۇشىنشى تۇلعالارعا حابارلاسپاۋدى جانە اقپاراتتى تەك enpf.kz رەسمي سايتىنان نەمەسە قوردىڭ الەۋمەتتىك جەلىلەردەگى رەسمي پاراقشالارىنان الۋ كەرەكتىگىن ەسكەرتەدى»، دەپ قوستى زەينەتاقى قورىنىڭ وكىلدەرى. سونداي-اق قور وكىلدەرى زەينەتاقى بويىنشا كەز كەلگەن كەڭەستى بجزق بولىمشەلەرىنەن نەمەسە بايلانىس ورتالىعىنىڭ 1418 نومىرىنە قوڭىراۋ شالۋ ارقىلى الۋعا بولاتىنىن ايتادى.