ساپار بارىسىندا وسك مۇشەلەرى پارلامەنت ءماجىلىسى مەن ءماسليحاتتارى دەپۋتاتتارىنىڭ كەزەكتەن تىس سايلاۋىن ازىرلەۋ مەن وتكىزۋ ماسەلەلەرى بويىنشا جەرگىلىكتى جەرلەردە كوشپەلى سەمينار-كەڭەستەر وتكىزدى. ءىس-شاراعا جەرگىلىكتى اتقارۋشى ورگانداردىڭ وكىلدەرى, وبلىس پروكۋراتۋرالارىنىڭ قىزمەتكەرلەرى, اۋماقتىق سايلاۋ كوميسسيالارىنىڭ مۇشەلەرى, كانديداتتاردىڭ سايلاۋالدى شتابتارىنىڭ وكىلدەرى, حالىقارالىق بايقاۋشىلار مەن باق وكىلدەرى قاتىستى.
كوميسسيا مۇشەلەرى سەمينارعا قاتىسۋشىلارعا سايلاۋ زاڭناماسىنىڭ بارلىق جاڭالىقتارىن, سايلاۋ الدىنداعى ۇگىتتى قارجىلاندىرۋ ماسەلەلەرىن ءتۇسىندىردى, 29 بىرمانداتتىق وكرۋگتە كانديداتتاردى تىركەۋ بويىنشا قورىتىندىلاردى جەتكىزدى, سونداي-اق الداعى سايلاۋعا دايىندىق بويىنشا اتقارىلعان جۇمىس تۋرالى وڭىرلەردىڭ ەسەپتەرىن تىڭدادى.
پاۆلودار وبلىسى اكىمى اپپاراتىنىڭ باسشىسى ديدار يبراەۆتىڭ مالىمدەۋىنشە, قالالار مەن اۋدانداردىڭ اكىمدىكتەرىندە Call-ورتالىقتار ىسكە قوسىلعان.
– «109 بىرىڭعاي بايلانىس ورتالىعى» بازاسىندا تاۋلىك بويى ارنايى بايلانىس جەلىسى, تەلەگرام-بوتتا جسن بويىنشا ىزدەۋ سەرۆيسى جۇمىس ىستەيدى. 25 اقپاندا 512 200 ادامنان تۇراتىن سايلاۋشىلار ءتىزىمى ۋچاسكەلىك سايلاۋ كوميسسيالارىنا بەرىلدى, – دەدى اپپارات باسشىسى.
ول سونداي-اق سايلاۋدى وتكىزۋگە بارلىق 523 سايلاۋ ۋچاسكەسى تارتىلاتىنىن اتاپ ءوتتى. ولاردىڭ بارلىعى ماتەريالدىق-تەحنيكالىق قامتاماسىز ەتىلگەن, ونىڭ ىشىندە مۇگەدەكتىگى بار ادامداردىڭ قاجەتتىلىكتەرى ەسكەرىلگەن.
– وبلىس بويىنشا داۋىس بەرۋ كەزىندە ەرەكشە جاعدايلارعا مۇقتاج 3 200 مۇگەدەكتىگى بار سايلاۋشى بار (899 كرەسلو-اربانى پايدالانۋشىلار, 1 553 كورۋ قابىلەتى بۇزىلعان جانە 784 ەستۋ قابىلەتى بۇزىلعان). بارلىق سايلاۋ ۋچاسكەلەرى مۇمكىندىگى شەكتەۋلى ازاماتتاردىڭ كەدەرگىسىز كىرۋىنە بار جاعداي جاسالعان عيماراتتاردىڭ ءبىرىنشى قاباتتارىندا ورنالاسقان, – دەدى ديدار يبراەۆ.
مۇگەدەكتىگى بار ادامدارعا ىڭعايلى بولۋ جانە ولاردى سايلاۋ ۋچاسكەلەرىنە جەتكىزۋ ءۇشىن داۋىس بەرۋ كۇنى «ينۆاتاكسي» قىزمەتى كورسەتىلەتىن بولادى. ەستۋ جانە كورۋ قابىلەتى ناشار ادامدار ءۇشىن ءار ۋچاسكەدە دياگونالى 54 سم كومپيۋتەرلەر, قۇلاققاپتار, ۇلكەيتكىشتەر, برايل ءشريفتى ترافارەتتەرمەن جابدىقتالعان بۇرىشتار دا دايىندالعان.
ناۋقاندى وتكىزۋ كەزەڭىندە سايلاۋ ۋچاسكەلەرىنە بارا المايتىن مۇگەدەكتىگى بار ادامدارعا داۋىس بەرۋگە ارنالعان تاسىمالداناتىن جاشىگى بار كوشپەلى كوميسسيالار ۇيىمداستىرىلادى.
سونداي-اق كەڭەس بارىسىندا وبلىس پروكۋرورىنىڭ ءبىرىنشى ورىنباسارى تالعات الىباەۆ ءسوز سويلەپ, سايلاۋ ۇدەرىسىنە قاتىسۋشىلاردىڭ زاڭنامانى ساقتاۋىن قامتاماسىز ەتۋ جونىندەگى قاداعالاۋ ورگانىنىڭ قىزمەتى تۋرالى حاباردار ەتتى.
ال استانا قالاسىندا وتكەن سەمينار-كەڭەس بارىسىندا وسك مۇشەلەرى اۋماقتىق سايلاۋ كوميسسيالارى ءۇشىن ناقتى كەيستەر نەگىزىندە ىسكەرلىك ويىن تۇرىندە ترەنينگتەر ۇيىمداستىردى. سەمينار-كەڭەس سوڭىندا ورتسايلاۋكومنىڭ مۇشەلەرى اۋماقتىق سايلاۋ كوميسسيالارىنىڭ مۇشەلەرىن قىزىقتىرعان سۇراقتارعا جاۋاپ بەردى.
