باستى ماقسات – مەملەكەتتىك ورگانداردا قىزمەت ەتەتىن كوممۋنيكاتسيا ماماندارىنىڭ بىلىكتىلىگىن ارتتىرۋ جانە كاسىبي ماشىقتارىن شىڭداۋ. باسقوسۋدىڭ اشىلۋ سالتاناتىنا پرەزيدەنت اكىمشىلىگى باسشىسىنىڭ ورىنباسارى – پرەزيدەنتتىڭ ءباسپاسوز حاتشىسى رۋسلان جەلدىباي, اقپارات جانە قوعامدىق دامۋ ءمينيسترى دارحان قىدىرالى جانە «M.Narikbayev KazGUU university» اق باسقارما توراعاسى تالعات نارىكباەۆ قاتىستى.
بۇقارالىق اقپارات قۇرالدارى ءۇشىن اقپاراتتىڭ مازمۇنى مەن شىنايىلىعى, ساۋاتتىلىعى جانە جەدەلدىگى جاۋاپكەرشىلىكتى تالاپ ەتەدى. سوندىقتان قاتىسۋشىلار 2-3 ناۋرىز كۇندەرى قوعاممەن بايلانىس جۇمىسىن ۇيىمداستىرۋ ۇدەرىسىندە كريزيستىك كوممۋنيكاتسيانىڭ نەگىزگى ءادىس-تاسىلدەرى مەن قۇزىرلى مەكەمەنىڭ الەۋمەتتىك جەلىلەردەگى ءيميدجىن قالىپتاستىرۋ, ۇلەستىرۋ باعدارلاماسىن دايىنداۋدى جانە جۇزەگە اسىرۋدى مەڭگەرەدى. سونداي-اق ىشكى جانە سىرتقى كوممۋنيكاتسيانىڭ نەگىزگى ەلەمەنتتەرى مەن قوعاممەن بايلانىس جۇمىسىن ءتيىمدى ۇيىمداستىرۋ جانە باسقارۋدىڭ زاماناۋي ادىستەمەلەرىمەن تانىسادى. بۇدان بولەك مەملەكەتتىك مەكەمەلەردەگى كوممۋنيكاتسيا قىزمەتىنىڭ ۇزاق مەرزىمدى جۇمىس ستراتەگياسىن ۇيىمداستىرۋدى ۇيرەنەدى.
– اقپارات جانە قوعامدىق دامۋ مينيسترلىگىنىڭ باستاماسىمەن قازاقستاندىق قوعامدىق دامۋ ينستيتۋتى بازاسىندا «MediaLab» ورتالىعى اشىلدى. بۇل ورتالىق ماقساتتارىنىڭ ءبىرى – كوممۋنيكاتسيا سالاسى ماماندارىنىڭ بىلىكتىلىگىن ارتتىرۋ ەكەنىن اتاپ وتكىم كەلەدى. سەمينار – «MediaLab» ورتالىعىنىڭ العاشقى جوباسى. مەديا سالاسى – ءبىزدىڭ قوعامنىڭ كەلبەتى. سىزدەردىڭ قىزمەتتەرىڭىز مەملەكەتتىڭ بەدەلىن, مەملەكەتتىك قىزمەتكەردىڭ ءيميدجىن قالىپتاستىرادى. سوندىقتان ەل الدىندا ابىرويمەن ءجۇرۋ, كاسىبي, رۋحاني تۇرعىدان ۇنەمى كەمەلدەنىپ وتىرۋ ءبىزدىڭ كۇن تارتىبىمىزدەن تۇسپەيتىن ماسەلە بولۋى كەرەك. ءباسپاسوز حاتشىسى كەيدە اكىمدىكتىڭ, مينيسترلىكتىڭ جۇمىسىن اتقارۋى مۇمكىن. سوندىقتان وسى سالانىڭ ماماندارىنا ۇلكەن جاۋاپكەرشىلىك جۇكتەلەدى. جالپى وسى سالا ماندارىنىڭ بىلىكتىلىگىن ارتتىرىپ وتىرۋ قاجەت. مەديا جانە كوممۋنيكاتسيا ماماندارى speech writing-ءدى مەڭگەرۋى كەرەك. ويتكەنى بىزدەگى كەيبىر ماماندار كەيدە وزدەرىنىڭ نە وقىپ تۇرعانىن بىلمەيدى, ءتىپتى سوزدەرى قۇرعاق بولىپ جاتادى. وسى رەتتە بەلگىلى ءبىر سپيكەرمەن ءسوزدى الدىن الا جوسپارلاپ الۋ ماڭىزدى. مىسالى كەيبىر كىسىلەردىڭ قۇرمالاس سويلەمدەردى ايتۋدا قيىندىقتارى بولۋى مۇمكىن. ءتىپتى «گالستۋك تاعۋ, تاقپاۋ» سىندى قاراپايىم دۇنيەلەرگە دەيىن ءباسپاسوز حاتشىلارى جاۋاپتى, – دەدى دارحان قىدىرالى.
سونداي-اق وسى جيىندا بىرقاتار مەديا مامان, اتاپ ايتقاندا پرەمەر-ءمينيستردىڭ فوتوگرافى شۇكىر شاحاي, ءىىم يدەولوگيالىق جانە يميدجدىك جۇمىس دەپارتامەنتىنىڭ باسشىسى, پوليتسيا پولكوۆنيگى البينا ماحامبەتوۆا, توتەنشە جاعدايلار مينيسترلىگىنىڭ ءباسپاسوز حاتشىسى رۋسلان يمانقۇلوۆ «اقپارات سالاسىنىڭ ۇزدىگى» توسبەلگىسىمەن ماراپاتتالدى.
– ۋنيۆەرسيتەتىمىزدىڭ نەگىزگى ميسسياسى – ساپالى ءارى قولجەتىمدى ءبىلىم بەرۋ ارقىلى قوعامعا قىزمەت ەتۋ. مەملەكەتتىك ورگانداردىڭ دا نەگىزگى ميسسياسى حالىققا قىزمەت ەتۋ بولۋى كەرەك. ءبىز ءوز كەزەگىمىزدە ۋنيۆەرسيتەت تاراپىنان ارقاشان قولداۋ كورسەتۋگە دايىنبىز. قازىر قوعامدا ءباسپاسوز حاتشىلارىنا جانە كوممۋنيكاتسيا ماماندارىنا سۇرانىس بار ەكەنىن بايقاپ وتىرمىز. سايكەسىنشە, الداعى ۋاقىتتا ءدال وسى ماماندارعا ارنايى وقىتۋ كۋرسىن, ياعني ماينور اشۋ نيەتىمىز بار, – دەدى ءوز سوزىندە «M.Narikbayev KazGUU university» اق باسقارما توراعاسى تالعات نارىكباەۆ.
العاشقى كۇنى مەديا جانە كوممۋنيكاتسيا ماماندارى سپيچرايتەر دانا ساۋدەگەروۆانىڭ «مەملەكەتتىك ورگاندار مەن قوعامنىڭ بايلانىسى: قۇرالدار مەن كەيستەر», بەلگىلى رەداكتور نازگۇل قوجابەكتىڭ «پرەسس-رەليز جانە حابارلاما ءتىلىن قازاقشالاۋ», قازاقستاننىڭ ۇلىبريتانياداعى ەلشىلىگىنىڭ ەكس-كەڭەسشى ۋاكىلى جانبولات ۇسەنوۆتىڭ ء«باسپاسوز حاتشىلارىنىڭ قاتەلىكتەرى. شەتەلدىك تاجىريبە جانە كريزيستىك كوممۋنيكاتسيالار», «Maqsut Narikbayev KazGUU university» اق جۋرناليستيكا ماماندىعىنىڭ وقىتۋشىسى الما سايلاۋقىزىنىڭ «جازباشا PR-ماتىندەر: اقپاراتتىق تۇرتكى تۇرلەرى. پرەسس-رەليز جانە مەديا-كيت», PR سالاسىنىڭ ساراپشىسى اقسۇلۋ سانعاليدىڭ «PR تيىمدىلىگى نەدەن باستالادى: ستراتەگيا, قۇرال, ءىس-ارەكەت» اتتى اكتۋالدى تاقىرىپتار تۋراسىندا بىلىكتى ماماندارمەن تاجىريبە الماستى. سونداي-اق بلوگەر, الەۋمەتتىك جەلىلەر جۇمىستارى بويىنشا ەكسپەرت ياكوۆ فەدوروۆتىڭ «الەۋمەتتىك جەلىلەر ارقىلى قوعاممەن ءتيىمدى بايلانىس ورناتۋ ستراتەگياسى» شەبەرلىك ساعاتىنان ءوتتى.
جالپى, ەكى كۇندىك سەمينار بارىسىندا ماماندار speech writing جانە ءباسپاسوز رەليزىن دايارلاۋ, الەۋمەتتىك جەلىلەردە اقپاراتتى ۇسىنۋ جانە جىلدام جاۋاپ بەرۋ, باسشىمەن قارىم-قاتىناستى, كوماندانى, كوممۋنيكاتسيانى باسقارۋ, ءباسپاسوز ستراتەگياسىن قۇرۋ, كريزيستىك كوممۋنيكاتسيا جانە شيەلەنىستەردى باسقارۋ, مەديامەنەدجمەنت جانە ەموتسيونالدى ينتەللەكت ماشىقتارىن تولىق مەڭگەرىپ شىعادى. بۇعان قوسا ارنايى سايت اشىلدى. وندا ادىستەمەلىك اقپاراتتان بولەك, ءباسپاسوز حاتشىلارىنا ۇسىنىلاتىن كىتاپتار, فيلمدەر, پايدالى كۋرستار بار. ال جيىننىڭ ەكىنشى كۇنىندە ء«باسپاسوز قىزمەتى: شيەلەنىستەر مەن ولاردى شەشۋ جولدارى», «قوعاممەن بايلانىس ورناتۋ ستراتەگياسى» تاقىرىپتارى تالقىلانادى.
