كەڭەس زامانىندا وبلىس ورتالىعىنان شالعاي جاتقان قازاقى اۋىلداردا عانا بولماسا, قوستانايدىڭ وزىندە ۇلت اسپاپتارى ءانسامبلى بولماعان. مۇنداي مۇمكىندىك ەل تاۋەلسىزدىگىنىڭ ۋىز كەزەڭىندە عانا تۋدى. 1993 جىلى سول كەزدە وبلىستى باسقارىپ تۇرعان, ستۋدەنت كەزىندە ءوزى دە وركەستردە ويناعان كەنجەبەك ۇكى ۇلىنىڭ دارگەيىمەن قۇرمانعازى اتىنداعى ۇلتتىق كونسەرۆاتوريانىڭ ءبىر توپ تۇلەگى قوستانايعا كەلدى. وسىلايشا, ءتول ونەرگە سۋساپ قالعان تەرىسكەيدەگى اعايىن جاڭا عانا قۇرىلعان «اقجەلەڭ» انسامبلىمەن قاۋىشقان. سودان بەرگى وتىز جىلدىڭ ىشىندە انسامبل قۇرامى دا بىرنەشە رەت وزگەرىپ, جاڭا اسپاپتارمەن, تىڭ تۋىندىلارمەن تولىعىپ, كەمەل ونەر ۇجىمىنا اينالدى.
كونتسەرت بارىسىندا «اقجەلەڭنىڭ» ورىنداۋىنداعى قۇرمانعازىنىڭ «ادايى», تاتتىمبەتتىڭ «سارجايلاۋى» سياقتى كلاسسيكالىق كۇي كەرۋەنىنەن كەيىن, وسى تويعا ارنايى كەلگەن بەلگىلى كومپوزيتور, قازاقستاننىڭ ەڭبەك سىڭىرگەن قايراتكەرى ەرمۇرات ۇسەنوۆ ساحناعا شىعىپ, ونەر ۇجىمىن مەرەيتويىمەن قۇتتىقتادى.
– قوستاناي وڭىرىندە توقسانىنشى جىلداردان بەرى قاراي جاڭاشا لەپ پايدا بولدى. قازاق ونەرىنىڭ ءيىسى شىعا باستادى. سونىڭ ءبىر ايعاعى, ايماقتا ۇلتتىق وركەستر جانە وسى «اقجەلەڭ» ءانسامبلى قۇرىلدى. بۇل جەردە وسى ونەر ۇجىمدارىن ۇيىمداستىرۋ بارىسىندا شىر-پىر بولىپ ءجۇرىپ, ونىڭ ءاربىر ورىنداۋشىسىن, ءاربىر رەپەرتۋارىن ءوزى تاڭداپ, ەڭسەسىن تىكتەپ كەتكەن باۋىرىمىز نازىمبەك مولداحمەتوۆتىڭ ەڭبەگىن ايتپاي كەتۋگە بولمايدى. ارينە, «ورنىندا بار وڭالار» دەگەن, ارتىندا ءىزىن جالعاعان ونەرپاز ءىنى-قارىنداستارىنىڭ بار ەكەنىنە تاۋبە دەيىك. وركەستر – ورنىندا. بۇگىندە بۇل جەردەگى ونەر وزگەشە جاڭا قىرىنان وركەندەپ كەلە جاتىر. انسامبل ءوزىنىڭ كوركەمدىك دەڭگەيىن تومەندەتپەي, ارقاشان بيىكتەن كورىنىپ كەلەدى. وتىز جىلدا بۇل ءانسامبلدىڭ بارماعان جەرى جوق. قازاقستاننىڭ بارلىق ولكەسىن ارالاپ شىقتى. ەڭبەكتەرىڭ جەمىستى, تويلارىڭ قۇتتى بولسىن! ءوز باسىم «اقجەلەڭگە» دە, وسىنداعى وركەسترگە دە كوپتەگەن شىعارما جازدىم, – دەدى كومپوزيتور.
ودان كەيىن «اقجەلەڭ» فولكلورلىق-ەتنوگرافيالىق ءانسامبلىنىڭ وتىز جىلدىعىنا ارنايى جازىلعان «اققۋ اقجەلەڭ» كۇيى مەن «ساۋلەتتى توبىل-تورعايىم» ءانى ساحنادا تۇڭعىش رەت ورىندالدى. بۇل ەكى تۋىندىنىڭ دا اۆتورى – ەرمۇرات ۇسەنوۆ. ءداندى ولكەنىڭ دارقان دالاسى مەن كەرىم تابيعاتىن, دارىندى پەرزەنتتەرىن دارىپتەيتىن ماداق ءانىنىڭ ءسوزىن جەرگىلىكتى اقىن, قازاقستان جازۋشىلار وداعىنىڭ مۇشەسى ابىلاي ماۋدانوۆ جازعان. جاڭا ءاندى حالىقارالىق بايقاۋلاردىڭ لاۋرەاتى, جەزتاڭداي ءانشى, تاراز قالاسىنان ارنايى كەلگەن جاناتبەك قادىروۆ ورىندادى.
كونتسەرت سوڭىندا ونەر ۇجىمىن وبلىس اكىمىنىڭ ورىنباسارى رينات مۇحامەتقاليەۆ پەن وبلىستىق مادەنيەت باسقارماسىنىڭ باسشىسى ەرلان قالماقوۆ قۇتتىقتاپ, «اقجەلەڭ» ءانسامبلىنىڭ بىرنەشە مۇشەسىن «مادەنيەت سالاسىنىڭ ۇزدىگى» توسبەلگىسىمەن, تاعى بىرقاتار ونەرپازدى وبلىس اكىمىنىڭ العىس حاتىمەن ماراپاتتادى.
قوستاناي وبلىسى
