ستاتيستيكالىق مالىمەتكە سۇيەنسەك, بۇرناعى جىلدىڭ 9 ايىندا مۇنايلى وڭىرگە ساياحاتتاۋدى جانى قالايتىن 30,5 مىڭ تۋريست تابان تىرەگەن ەكەن. ال بىلتىرعى وسىنداي كەزەڭدە كەلۋشىلەر سانى 108 158 ادامدى قۇراپ وتىر. ونىڭ ىشىندە كەلۋ ءتۋريزمى ساناتىنا جاتاتىندار – 13,7 ادام. ىشكى تۋريزممەن 94,3 مىڭ ادامنىڭ كەلگەنى تىركەلگەن. بۇل الدىڭعى جىلمەن سالىستىرعاندا 3 ەسەگە كوپ.
– شەتەلدىك تۋريستەردىڭ باسىم بولىگى تمد قۇرامىنا كىرمەيتىن ەلدەردىڭ تۇرعىندارى بولىپ وتىر. بۇل – 5 407 ادام. ال الىستاعى اقش-تان – 1 359, بىرىككەن كورولدىكتەن – 532, نيدەرلاندتان – 298, قىتايدان 159 تۋريست مۇنايلى وڭىرگە كەلەتىندەردىڭ قاتارىن تولىقتىردى. ماحامبەت اۋدانىنداعى سارايشىق مۋزەي-قورىعىنىڭ تاريحىمەن تانىسۋعا الدىڭعى جىلى 12 مىڭ, بىلتىر 18,5 مىڭنان اسا ادام كەلدى, دەيدى وبلىستىق كاسىپكەرلىك جانە تۋريزم باسقارماسىنىڭ ءبولىم باسشىسى جاننات سابىرعاليەۆا.
ونىڭ ايتۋىنشا, 2025 جىلعا دەيىن ءتۋريزمدى دامىتۋ ءۇشىن 10,8 ملرد تەڭگەنىڭ 9 ينۆەستيتسيالىق جوباسى ىسكە اسىرىلادى. بۇل جوبالاردا 338 جاڭا جۇمىس ورنى اشىلادى. ماسەلەن, «سارايشىق» ۆيزيت ورتالىعىن سالۋعا بيۋدجەتتەن قارجى بولىنگەن. ال 8 جوبا جەكە ينۆەستيتسيا ەسەبىنەن سالىناتىنى دەپ جوسپارلانىپ وتىر. قازىر 4 جوبا ىسكە قوسىلعان. بۇلار – «نۇرلى تال» ەتنو-پاركى, قۇرمانعازى اۋدانىنداعى ەكى تۋريستىك-دەمالىس بازاسى مەن ماقات اۋدانىنداعى كەمپينگ. قۇرمانعازى اۋدانىنداعى لوتوس القابىنىڭ تانىمالدىلىعىن ارتتىرۋ ءۇشىن ۆيدەوروليك ازىرلەۋ, يندەر كولىنىڭ قۇقىقتىق مارتەبەسىن ايقىنداۋ ماقساتىندا ساراپتامالىق زەرتتەۋ جۇمىستارىن جۇرگىزۋ كوزدەلگەن. وتكەن جىلى 6 تۋريستىك نىسانعا QR كود ورناتىلعان. وسىلايشا, تۋريستەر 5 تىلدە اقپارات الىپ, 3D تۋر جاساۋ مۇمكىندىگىنە يە بولعان.
مۇنايلى ءوڭىردىڭ باتىس قيىرىنداعى قۇرمانعازى اۋدانىندا قيعاش دەگەن وزەن بار. بۇل وزەن رەسەي فەدەراتسياسىنىڭ استراحان وڭىرىمەن اراداعى شەكارانى قاق جارا اعادى. جىل سايىن شىلدەنىڭ ورتاسىنان تامىزدىڭ سوڭىنا دەيىن وزەن ساعاسىندا لوتوس گۇلدەيدى. ونى تاماشالاۋ ءۇشىن «اقتوبە – اتىراۋ – رەسەي فەدەراتسياسىنىڭ شەكاراسى» باعىتىنداعى جولمەن عانا جەتۋگە بولادى. اراقاشىقتىق – 300 شاقىرىمعا جۋىق.
سۋ بەتىندە گۇلدەپ تۇرعان لوتوستىڭ ادەمىلىگىن تەك كوزبەن كورۋ كەرەك. حوش ءيىسى مۇرنىڭدى جارادى. لوتوستىڭ ءتۇسى – قىزعىلت, بيىكتىگى 150 سانتيمەترگە دەيىن جەتەدى. ءبىر قىزىعى, سۋ ورتاسىندا وسەتىن لوتوس تاڭەرتەڭ قاۋىزىن اشىپ, كەشكە قايتا جابادى. تاڭەرتەڭ سۋ بەتىندە قاۋىزىن اشقاندا قۇرعاق بولىپ تۇرادى. بۇل گۇلدى ۇندىستەر مەن ۆەتنامدىقتار تازالىقتىڭ سيمۆولى رەتىندە باعالايدى. ءتىپتى ونىڭ ەمدىك قاسيەتى بار دەپ ەسەپتەلەدى. تۇقىمىنداعى اقۋىز بۇيرەك پەن كوكباۋىر, جۇرەك اۋرۋى مەن ۇيقىسىزدىقتى ەمدەۋگە قولدانىلادى ەكەن. الايدا لوتوس گ ۇلىن جۇلۋعا بولمايدى. سەبەبى بۇل ەلىمىزدەگى سيرەك كەزدەسەتىن وسىمدىكتەردىڭ تىزىمىنە ەنگىزىلگەن.
ماسەلەن, بىلتىر ەكى ەل شاراسىنداعى سۋ ايدىنىندا گۇلدەگەن لوتوستى كورۋگە كۇنىنە 50 تۋريست كەلگەن. سونداي تۋريست ەكاتەرينا حابيبۋللينا – ماسكەۋ قالاسىندا ارنايى كەلگەن تۋريستەردىڭ ءبىرى. شەتەلدىك تۋريست بىلتىر لوتوس القابىن العاش رەت كورگەن ەكەن.
– تابيعات وسىنداي سۇلۋلىعىمەن قىمبات قوي. لوتوس القابى تاماشا ەكەن. وتە كەرەمەت اسەر الدىم. بۇل جەردەن تەك لوتوستى عانا ەمەس, اققۋ, اققۇتان سىندى قۇستاردى دا تاماشالادىق, – دەگەن ەدى ە.حابيبۋللينا.
اتىراۋ وبلىسىنداعى قۇرمانعازى اۋدانى – لوتوس وسەتىن جالعىز ايماق. لوتوس القابىن كورۋگە كەلۋشىلەرگە ارنايى نۇسقاۋلىق كومەك كورسەتەتىن كاسىپكەرلىك نىساندار بار.
ء«بىز بىرنەشە تۋريستىك كومپانيامەن كەلىسسوز جۇرگىزدىك. كەلىسىمشارتقا سايكەس اۋدانعا كەلگەن تۋريستەردى جازدا قايىقپەن لوتوس القابىنا اپارىپ-اكەلەمىز. تۋريستەر ورنالاساتىن ارنايى بازادا تىنىعاتىن ورىن دايىندادىق. ءبىزدىڭ ماقساتىمىز – تۋريستەردىڭ قاۋىپسىزدىگىن, سۋدا ءجۇرۋدىڭ تەحنيكالىق تالابىن قاتاڭ ساقتاۋ», دەيدى «West Motors service» جشس-نىڭ وكىلى جانىبەك اقتانانوۆ.
اتىراۋ وبلىسى
