اۋەجايدىڭ ۇشىپ-قونۋ جولاعى 1 500 مەتردەن 2 100 مەترگە دەيىن ۇزارتىلسا, ەنى 35 مەترگە دەيىن كەڭەيتىلگەن. بۇل ءوز كەزەگىندە Fokker, Bombardier, Embraer جانە باسقا دا وسىعان ۇقساس توپتاردىڭ ۇشاقتارىن قابىلداۋعا مۇمكىندىك بەرەدى. سونىمەن قاتار ۇزىندىعى 175 مەتر, ەنى 16 مەتر بولاتىن 2 رۋلدەۋ جولىنىڭ قۇرىلىسى جۇرگىزىلدى.
قازىر اۋەجايدا اۋە كەمەلەرىن تاۋلىك بويى قابىلداۋعا قاۋقارلى بولۋى ءۇشىن ۇشىپ-قونۋ جولاعىنا جارىقتاندىرۋ قوندىرعىلارى مەن بەينەباقىلاۋ ورناتۋ جۇمىستارى جۇرگىزىلىپ جاتىر. بۇگىنگى تاڭدا الماتى – سەمەي – ءۇرجار باعىتى بويىنشا رەيستەر تۇراقتى ۇشىپ تۇرادى. سونىمەن قاتار اۋەجاي تەرمينالىنىڭ عيماراتىن قايتا جاڭعىرتۋدىڭ جوبالىق-سمەتالىق قۇجاتتارى دا ازىرلەنۋ ۇستىندە. ءۇرجار اۋدانىنىڭ اكىمى نۇرجان توقسەيتوۆتىڭ ايتۋىنشا, بيىل ءۇرجار اۋدانىندا ساعاتىنا 100-150 جولاۋشىنى قابىلداي الاتىن جاڭا اۋەجاي عيماراتىنىڭ قۇرىلىسى باستالادى. « ەكى اۋە كەمەسى تۇراقتايتىن پەررون ءبىر ۋاقىتتا ەكى ۇشاقتى قابىلداۋعا مۇمكىندىك بەرەدى. 5 قاباتتى باقىلاۋ مۇناراسى جاڭادان سالىندى. قازىر تەرمينال ساعاتىنا 30-عا جۋىق ادامدى قابىلدايتىن بولسا, قۇرىلىس اياقتالعاننان كەيىن بۇل كورسەتكىش ايتارلىقتاي ارتادى. الداعى مامىر ايىنان باستاپ ءۇرجار – استانا باعىتىندا اۋە رەيسىن ىسكە قوسۋ جوسپارلانىپ وتىر», دەيدى اۋدان اكىمى ن.توقسەيتوۆ.
ايتا كەتەيىك, بۇعان دەيىن وبلىستىق بيۋدجەتتەن بولىنگەن قاراجات ەسەبىنەن الاكول جاعالاۋىنداعى ارباتقا اباتتاندىرۋ, جولدارعا ورتاشا جوندەۋ جۇمىستارى جۇرگىزىلگەن بولاتىن. الاكول جازعى دەمالىس ايماعىندا «Tourist info» اقپاراتتىق ورتالىعى ءبىر تەرەزە قاعيداسى اياسىندا دەمالۋشىلارعا تەگىن اقپاراتتىق جانە كونسۋلتاتسيالىق قىزمەت كورسەتەدى. سونىمەن قاتار الاكول جاعالاۋىنا جاقىن قابانباي اۋىلىندا ءورت ءسوندىرۋ دەپوسى دا سالىناتىن بولادى.
