ەلوردا اكىمى جەڭىس قاسىمبەك جاڭا باعدارلامالىق قۇجاتتاردى, ونىڭ ىشىندە قالانى دامىتۋدىڭ 2035 جىلعا دەيىنگى باس جوسپارىن, رەنوۆاتسيالاۋدىڭ 2030 جىلعا دەيىنگى باعدارلاماسىن جانە كوگالداندىرۋدىڭ بىرىڭعاي تۇجىرىمداماسىن ازىرلەۋ تۋرالى باياندادى.
سونىمەن قاتار استانا قالاسىنىڭ اكىمى جاڭا تۇرعىن ۇيلەردى ىسكە قوسۋ بولجامدارى, ۇلەسكەرلەردىڭ پروبلەمالارىن شەشۋ جونىندەگى شارالار, جەو-3 جانە گاز جىلۋ ستانتسيالارىن سالۋ, اۋىز سۋ ءوندىرۋ ءۇشىن سورعى-سۇزگى ستانتسياسىن ىسكە قوسۋ, التى قوسالقى ەلەكتر ستانتسياسى مەن ءىرى كارىز-تازارتۋ نىسانىن جوبالاۋ تۋرالى حاباردار ەتتى.
ەلوردا اكىمى اۆتوجولداردى سالۋ جانە جوندەۋ (30 جوبا), تاۋەلسىزدىك داڭعىلى بويىنداعى ەسىل وزەنى ارقىلى وتەتىن كوپىردە كولىك قوزعالىسىن ىسكە قوسۋ, اۆتوبۋس پاركىن جاڭارتۋ (+400 اۆتوبۋس), LRT جوباسىن ىسكە اسىرۋ, سونداي-اق «جايلى مەكتەپ» ۇلتتىق جوباسى اياسىندا جاڭا مەكتەپتەر (24 مەكتەپ), باسقا دا مەديتسينالىق جانە الەۋمەتتىك ينفراقۇرىلىم وبەكتىلەرىن اشۋ جوسپارلارى تۋرالى ايتىپ بەردى.
ءاليحان سمايىلوۆ ەلوردادا تۇرعىن ءۇي قۇرىلىسىنىڭ جوعارى قارقىنىن ساقتاپ, وزىق ينجەنەرلىك ينفراقۇرىلىممەن قامتاماسىز ەتۋدىڭ ماڭىزىن اتاپ ءوتتى. بۇل رەتتە ۇكىمەت باسشىسى قۇرىلىس سالۋشى كومپانيالاردىڭ بەكىتىلگەن نورمالار مەن جالپى زاڭنامانى ساقتاۋىن باقىلاۋدى كۇشەيتۋ قاجەتتىگىنە توقتالدى.
پرەمەر-مينيستر استانانى كوگالداندىرۋ شارالارىنا باسا كوڭىل ءبولىپ, جىل سايىن اعاش وتىرعىزۋ جۇمىستارىنىڭ قارقىنىن ارتتىرۋ كەرەكتىگىن ايتتى.
كەڭەستە ينفراقۇرىلىمدىق جوبالاردى ىسكە اسىرۋ, ەنەرگيامەن, جىلۋمەن, سۋمەن جانە گازبەن جابدىقتاۋدى دامىتۋ, سونداي-اق زاڭسىز ۇيىلگەن قوقىس پوليگوندارىن جويۋ تۋرالى يندۋستريا جانە ينفراقۇرىلىمدىق دامۋ ءمينيسترى مارات قاراباەۆ, ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا جانە ەنەرگەتيكا ۆيتسە-ءمينيسترى اسەت ماعاۋوۆ بايانداما جاسادى.
تالقىلاۋدى قورىتىندىلاي كەلە, پرەمەر-مينيستر مەملەكەتتىك ورگاندارعا ءوز باعىتتارى بويىنشا مەملەكەت باسشىسى تاپسىرعان مىندەتتەردى ساپالى ورىنداۋدى تاپسىردى.
