ساندىبەكوۆتەر وتباسى بايقاۋدىڭ ءبىرىنشى جۇلدەسىنە يە بولدى
اۋىل مادەنيەتىنىڭ جاناشىرى
القيسسامىزدى ارىدەن باستاساق, اتاقتى «اقتابان شۇبىرىندىدان» بەرى قازاق دەگەن قايسار حالىقتىڭ كورمەگەنى جوق. بەرىدەن تارتساق, كەشەگى كەڭەستىك جۇيە قولدان جاساعان اشتىق, كامپەسكە, قۋعىن-سۇرگىندە سىرتقا كەتكەن قانداستارىمىزدىڭ ۇرپاقتارى بۇگىندە اتامەكەنىنە ورالىپ جاتقانى امبەگە ايان. ال, ءبىزدىڭ كەيىپكەرىمىزدىڭ اۋلەتى تاپ بولعان تاعدىر مۇلدە ايانىشتى دەرلىك. كەڭەستىك كەزەڭگە «كوممۋنيزم» ەلەسىن قالدىرىپ كەتكەن حرۋششەۆتىڭ سولاقاي ساياساتىنىڭ كەسىرىنەن كوپتەگەن قانداستارىمىز ءوز جەرىندە وتىرىپ-اق جاتجەرلىككە اينالىپ شىعا كەلدى! سولاردىڭ ءبىرى اتا-باباسى ءمىرزاشول ايماعىن مەكەندەگەن ساندىبەكوۆتەر اۋلەتى ەدى. ولار ەلىمىز ەگەمەندىك العان سوڭ ورال وڭىرىنە قايتا ورالۋعا مۇمكىندىك الدى. ساندىبەكوۆتەر وتباسى ەلباسىمىز ن.نازارباەۆتىڭ ۇستانعان سارا ساياساتىنا مىڭ العىس ايتادى. رەسپۋبليكامىزدا ەلباسىنىڭ ءوزى باستى نازاردا ۇستاپ وتىرعان «مادەني مۇرا» اتتى ۇزاق مەرزىمدى, ۇلتىمىزدى ۇيىتۋعا, تاريحىن تانۋعا ۇلكەن سەپتىگىن تيگىزەتىن بايسالدى باعدارلاما بار ەكەنى بەلگىلى. وسى باعدارلاما باعىتىندا, ەلىمىزدىڭ مادەنيەت, ونەر سالاسىندا سان-سالالى ىستەر اتقارىلۋدا. اسەم ءان مەن مۇڭ بۇرالعان ءبيدى جانە كۇمبۇرلەگەن كۇيدى ايتپاعاندا, ءباھادۇر بابالارىمىز اتا-كاسىپكە اينالدىرعان زەرگەرلىك, ۇستالىق سەكىلدى ۇمىتىلا جازداعان ونەر تۇرلەرى دە جاندانىپ كەلەدى. كىلەم, الاشا توقيتىن قۇرال-سايمانداردى وسى كەزگە دەيىن ساقتاپ كەلگەن ساندىبەكوۆتەر وتباسى – ءسوزىمىزدىڭ ءبىر دالەلى. وسىنىڭ بارلىعىن تاپتىشتەپ جاتقان سەبەبىمىز, ءبىر كەزدەرى «بوشالاپ كەتكەن», بوزداپ كەتكەن, تۋعان جەرىنەن ەرىكسىز الىستاپ كەتكەن ارۋانالارىمىزدىڭ بوتاقاندارى ەركىن ەلىمىزدىڭ ەرتەڭى ءۇشىن ءال-قادىرىنشە ەڭبەكتەنىپ, قاسيەتتى تۋعان جەرگە تەرىن ءسىڭىرىپ, قازاق اتتى مىڭ ءولىپ, مىڭ تىرىلگەن حالىقتىڭ ماڭگىلىگىنە قىزمەت جاساپ جۇرگەنىن ايتۋ, جاقسى ىستەرىن جالعاننىڭ جارىعىنا شىعارىپ, پاش ەتۋ, قولداۋ ءبىلدىرۋ. ونى ءوزىمىز جاقسى بىلەتىن ساندىبەكوۆتەر اۋلەتىنىڭ مىسالىندا الاش جۇرتىنا تانىستىرۋ ەدى. بۇگىندە ەل اۋزىندا جۇبان ەلى اتالىپ كەتكەن اقجايىق اۋدانىنداعى ىرگەلى اۋىلدىق وكرۋگ – ءبۋداريننىڭ مادەنيەت ء«مينيسترى» نۇربولات ساندىبەكوۆپەن اڭگىمەلەسىپ وتىرمىز. ونىڭ اۋلەتى اقجايىققا 2004 جىلى مىرزاشولدەن قونىس اۋدارىپتى. اتا-بابالارى وڭتۇستىك وڭىرگە وتكەن عاسىرلاردا قونىستانسا كەرەك. اكەسى نۇرسەيىل ءومىر بويى دەپودا تەمىرجولشى بولىپ ەڭبەك ەتىپتى. ءومىرىنىڭ سوڭىنا قاراي نۇرسەيىل قارت ايىقپاس دەرتكە بەت الادى. ونىڭ سەبەبىن الىستا ءجۇرىپ سارىتاپ بولعان ەلگە-جۇرتقا دەگەن ساعىنىشتان ىزدەيدى ۇرپاقتارى. اقىرى «قانىنا تارتقان» قاريانى نۇربولات قازاقستانعا كوشىرىپ اكەلەدى. ەلباسىنا ەرەن ريزاشىلىق بىلدىرەتىن ءبىر سەبەبىم وسى – دەيدى نۇربولات باۋىرىمىز. وبلىستىق بايقاۋلاردا باس جۇلدەنى بەرمەي جۇرگەن وتباسىنىڭ باستى «كوزىرلەرىنىڭ» ءبىرى دە وسى اتا-بابا مۇرالارىن كوزدىڭ قاراشىعىنداي ساقتاي ءبىلۋى, قولدانۋى دەسەك بولادى. نۇربولاتتىڭ جارى گۇلي دە «ون ساۋساعىنان ونەر تامعان» ونەرپاز. مەكتەپتە زەرتحاناشى بولىپ ىستەيتىن ول تۋرالى ارىپتەستەر پىكىرى مەن باعاسى وتە جوعارى. مىنە, وسىلايشا تۋعان جەرگە كەلىپ تامىر جايعان وتباسى بۇگىندە اۋدانعا عانا ەمەس, وبلىس بىلگەن ءماشھۇر ونەرپازدارعا اينالدى. وبلىس ورتالىعىندا وزدىرىلعان «مەرەيلى وتباسى» ۇلتتىق بايقاۋى اياسىندا وتكەن وبلىستىق بايقاۋدىڭ باس جۇلدەگەرلەرى اتانىپ, جايىق ءوڭىرىنىڭ, جۇبان ەلىنىڭ نامىسىن استانادا قورعاۋعا اتتانباق. امبەباپ اۋلەتتىڭ وتاعاسى نۇربولاتتىڭ اۋىلداعى مادەنيەت ۇيىنە جەتەكشىلىك جاسايتىنىن جوعارىدا ايتتىق. بۇل باعىتتا ول الدىمەن اجەلەر ءانسامبلىن قۇرىپ, جەتىلدىرۋگە كۇش سالدى. ونداعى ويى, بۇگىندە ايتىلۋى سيرەكسىپ كەتكەن قازاقتىڭ جاۋھار اندەرىن جاڭعىرتىپ, اجەلەردىڭ داۋىسىمەن دالاسىنا قايتارۋ بولاتىن. ەڭبەگى جەمىسسىز ەمەس, بۇگىندە «جايدارمان» اجەلەر ءانسامبلىن ورال ءوڭىرى تۇگەل تانيدى دەسەك بولادى. ولار – 2009 جىلى وبلىستىق «التىن ۇيا» بايقاۋىندا ءى ورىندى يەلەنسە جانە سول جىلعى وبلىستىق «ونەر شامشىراعى» اتتى وتباسىلىق انسامبلدەر بايقاۋىندا ءىى ورىندى جەڭىپ الدى. قىزى ءمادينا 7-سىنىپ وقۋشىسى. ونىڭ دا جەتىستىكتەرى جەتەرلىك. ول وبلىستىق «قادىر وقۋلارىندا» باس جۇلدەنى يەلەنىپ, بيىل «سالەم, استانا!» فەستيۆالىنە قاتىسىپ, جۇلدەلى ءى ورىندى يەلەنىپ قايتتى. ونەرلى بالاپان «ادەمى-اي» تريوسىنىڭ بەلدى ءانشىسى. ۇلكەن ۇلى ءازي داۋىلپازدا شەبەر وينايدى. سپورتپەن دە ەتەنە بوپ ءوسىپ كەلەدى. «اسىرەسە, فوتو-بەينە قۇرالدارعا اۋەستىگى اتاسىنا تارتقان» – دەيدى اكەسى نۇربولات. زامانعا ىلەسە وسكەن ۇلان كومپيۋتەرمەن ءان وڭدەۋگە دە بەيىم. ال كىشى ۇلى نۇرجان وتباسىلىق ۆوكالدى اسپاپتار ءانسامبلىنىڭ «بەلدى» گيتاراشاسى ءارى ءان ايتادى. ال, ەگىز گۇلدەي جايناپ ءوسىپ كەلە جاتقان گۇلزادا مەن بەكزادانىڭ دا «قولى بوس ەمەس», ولار انسامبلدە سىلدىرماق سوعىپ انگە ىرعاق قوسىپ تۇرادى جانە «مىڭ بۇرالعان» بيشىلەر! سەگىز جاستاعى ەگىزدەردىڭ ونەرىنە تالاي كورەرمەن قول سوقتى. قىسقاسى, 2009 جىلى قۇرىلعان «ساندىبەكوۆتەر» وتباسىلىق ءانسامبلىنىڭ مۇشەلەرى جىل سايىن تولىعىپ كەلەدى, ءبىز سوعان قۋانامىز. ولار وزدەرىنىڭ شاعىن اۋىلدارىندا تەك ونەردە عانا ەمەس, ومىردە دە ۇلگىلى, ۇيىعان وتباسى رەتىندە تانىمال. ۇل-قىزدارىن تاتۋلىققا تاربيەلەپ, بابالاردىڭ اسىل قاسيەتتەرىن بويلارىنا ءسىڭىرىپ وسۋلەرىنە باعىتتاپ ءجۇر. ساحنادا قوسەتەك, بۇرمەلى كويلەكپەن «ياماحانىڭ» قۇلاعىندا وينايتىن گۇلي كەلىن ۇيدە سيىردىڭ باۋىرىنان, ساماۋرىننىڭ جانىنان تابىلاتىن, بەرەكەلى شاڭىراقتىڭ وتاناسى. جايىقتان جەكە-دارا استاناعا اتتاناتىن نۇربولات پەن گۇليگە جانە ونىڭ ونەرلى دە سۇيكىمدى بەس پەرزەنتىنە ءسات ساپار تىلەيمىز!
اقجايىق اۋدانى.
انتسيپروۆيچتەر اۋلەتى ەكىنشى ورىندى ەنشىلەدى
ۇلاعات ۇياسى
ەل ىشىندە جاراسىمدى جاراستىعىمەن, سۇتتەي ۇيىعان تاتۋلىعى, بەرەكە-بىرلىگىمەن, قۇندىلىق اتاۋلىنى قادىر تۇتۋىمەن كوپشىلىككە ۇلگى بولار وتباسىلار جەتەرلىك. ءبىز ءسوز ەتكەلى وتىرعان انتسيپروۆيچتەر اۋلەتى سولاردىڭ قاتارىندا. اۋىلداستارىنىڭ ەرەكشە قۇرمەتىنە بولەنگەن اۋلەتتىڭ وتاعاسى نيكولاي انتونوۆيچ ءانتسيپروۆيچتىڭ ەسىمى اۋدان جۇرتىنا كەڭىنەن تانىمال. بۇلا كۇشى بويىندا بۇلقىنىپ, اسكەري بورىشىن وتەپ جۇرگەن پولياك جىگىتىنىڭ قازاقستاندىق تاتار قىزى امينامەن تانىستىعى, ۋاقىت وتە مازداعان ماحابباتقا ۇلاسقان جاراستىعى جۇزىنەن جالىن اتقان جاس جىگىتتىڭ ءومىرىن تۇبەگەيلى وزگەرتتى. ءبارىن باسىنان باستايىق. ۇلان-عايىر رەسەي فەدەراتسياسىنىڭ چيتين وبلىسى دۋل-دۋرگين اۋدانى زۋن-ۋندۋر اۋىلىندا 1941 جىلى دۇنيە ەسىگىن اشقان نيكولاي انتونوۆيچ ەڭبەككە ەرتە ارالاسقان جان. ونەگەلى وتباسىندا ءتالىمدى تاربيە كورگەن ۇل ەرتە ەسەيدى, ەر جەتتى, ءبىلىم الدى. 1957 جىلى چيتا قالاسىنداعى №1 تەحنيكالىق ۋچيليششەنىڭ پاروۆوز جوندەۋشى ماماندىعى بويىنشا وقۋعا ءتۇستى. قاتارلاستارىنىڭ الدى بولعان قاعىلەز جىگىت وقۋىن تامامداسىمەن از-كەم ۋاقىت ك.ۆوروشيلوۆ اتىنداعى پاروۆوز جوندەۋ زاۋىتىندا ەڭبەككە ارالاسقان. سوسىن 1960 جىلى وتان الدىنداعى بورىشىن وتەۋگە اسكەرگە الىنادى. جاستايىنان ءان-بيگە بەيىم وسكەن ونەرلى جىگىت از ۋاقىتتا كوزگە ءتۇسىپ, اسكەري ءبولىمنىڭ بي انسامبلىنە جەتەكشىلىك ەتكەن, كەيىن ديۆيزيا حورەوگرافىنىڭ كومەكشىلىگىنە قابىلدانعان. امۋر وبلىسىنىڭ №2 سەرىشەۆ ستانساسىندا كەلىسىمشارت بويىنشا اسكەري بورىشىن وتەپ جۇرگەن جاس سارباز وسى جەردە بولاشاق زايىبى امينامەن تانىسادى. امۋر ولكەسىندە قىدىرىپ جۇرگەن تالدىرماش كەلگەن تاتار قىزىنا ءبىر كورگەننەن عاشىق بولعان سابازىڭ اڭگىمەنى ارىگە سوزباي ءسوز سالعان عوي. اسكەري قىزمەتكە تۇبەگەيلى نۇكتە قويىلعان سوڭ 1971 جىلى زەلەنوۆ اۋدانى قاراجار اۋىلىنا ورالىپ, اۋىل كلۋبى مەڭگەرۋشىسى بولعان. ارنايى ءبىلىمى بولماسا دا, ومىردەن تۇيگەنى كوپ جىگىتكە پەداگوگيكالىق ءبىلىم الۋعا ەل اعالارى كەڭەس بەرگەن. ءسويتىپ, ونەرگە بەيىم, سپورتقا يكەمدى, ادامگەرشىلىگى مول ازامات اۋداندىق ءبىلىم ءبولىمى باسشىلىعىنان مۇعالىمدىك ماماندىققا شاقىرتۋ الىپ, مەكتەپكە جۇمىسقا ورنالاسادى. بالالارعا ساباق بەرە ءجۇرىپ, اۋىلدىڭ قوعامدىق جۇمىستارىنىڭ بەل ورتاسىنان تابىلا ءبىلدى. جالىندى جاستىق شاعىن شاكىرت تاربيەلەۋ ىسىنە ارناعان نيكولاي انتونوۆيچ 1971-2004 جىلدار ارالىعىندا ۇزتازدىق قىزمەت ەتسە, جارى ءامينا عابدۋلعاليقىزى اۋىل مەدپۋنكتىندە 33 جىل بويى مەيىربيكە بولعان. تابانداي 33 جىل عۇمىرىن ءبىلىم سالاسىنىڭ وركەندەۋىنە ارناعان ازاماتتىڭ اۋىل مەكتەبىندەگى تاربيە ءىسىنىڭ جۇيەلى جۇرگىزىلۋىنە, جالپى اۋىلدىڭ وركەندەۋىنە قوسقان سۇبەلى ۇلەسى بارىن ايتا كەتۋ كەرەك. ەل ەكونوميكاسىنىڭ تۇرالاپ تۇرعاندىعىنا قاراماستان, بىلىمگە قۇشتار ورەندەردىڭ ساپالى ءبىلىم الۋىن, ءسويتىپ جوعارى وقۋ ورنىنا قول جەتكىزۋىن كوزدەگەن ۇلاعاتتى ۇستاز نەبىر «تاۋەكەلگە» بارعاندىعىن ەسكە الادى بۇگىندە. – سول كەزدەگى باسشىلارعا اۋىل مەكتەبىنىڭ مۇشكىل جاعدايىن جىپكە تىزە وتىرىپ, كوڭىل بولۋلەرىن, وقىتۋ قۇرىلعىلارىمەن تولىققاندى جابدىقتاۋلارىن تالاپ ەتتىم. اۋدان ورتالىعىنان جەتى-اق شاقىرىم جەردە ورنالاسقان شاعىن اۋىلدىڭ تازا سۋسىز, كوگىلدىر وتىنسىز بولۋى ەشبىر قيسىنعا كەلمەيتىنىن جەتكىزدىم – دەيدى ول. اقساقالدىڭ اتىن وڭىرگە ءماشھۇر ەتكەن دە وسى ەڭبەگى. قوعامدىق سالاداعى ەڭبەگى ەش كەتپەي اۋىلعا كوگىلدىر وتىن جەتتى, تازا سۋ تارتىلدى. وسىنىڭ ارقاسىندا قاراجار اۋىلى ءتۇتىنى ءتۇزۋ, الەۋەتى زور اۋىلدار ساناتىنا ەندى. قۇداي قوسقان قوساعى ءامينا انامىز ەكەۋى تاربيەلەگەن ۇلدان كورگەن عاليا, ناديا ەسىمدى نەمەرەلەرىنە ەل قاتارلى جوعارى ءبىلىم بەردى, بارىنە بەلگىلى ىسپەن اينالىسىپ, ەلگە قىزمەت ەتۋلەرىن پارىز ەتتى. نەمەرەنىڭ ۇلكەنى عالياسى دا ءوز باقىتىن اسقار ەسىمدى قازاق جىگىتىنەن تاپتى. بولاشاق ۇرپاعىنىڭ قاجەتىنە بايلىق ەمەس, ءبىلىم جيعان اكە ءتالىمىن العان ۇرپاقتارى ەل يگىلىگىنە بىلەك سىبانا قىزمەت ەتۋدە. پەداگوگيكا سالاسىنا ءومىرىنىڭ 33 جىلىن ارناعان ۇلاعاتتى ۇستاز ءالى كۇنگە قوعامدىق شارالاردىڭ بەل ورتاسىندا ءجۇر. ۇلى قازاقتان كەلىن السا, ءوز نەمەرەسىن قازاققا ۇزاتىپ, تاتۋلىعى جاراسقان اعايىنمەن قۇداندالى بولعان شاڭىراقتىڭ بەرەكەسى بەكي ءتۇستى. تاتۋلىق, بىرلىك, كەلىسىمدى ۇنەمى تۋ ەتىپ جۇرەتىن وتاعاسى نيكولاي انتونوۆيچ پەرەمەتنىي اۋىلدىق قوعامدىق كەلىسىم كەڭەسىنىڭ توراعالىعى قىزمەتىن ابىرويمەن اتقارۋدا.
زەلەنوۆ اۋدانى.
بيمۇحانوۆتار وتباسى اۋىلدارىنا جۇلدەلى ءۇشىنشى ورىنمەن ورالدى
حالىقتىق ونەردى قادىر تۇتقان
شىعارماشىلىق ىزدەنىسىنىڭ ارقاسىندا تالاي جەتىستىكتەرگە جەتكەن, وبلىستىق, رەسپۋبليكالىق اقىندار ايتىسىنىڭ بىرنەشە دۇركىن جۇلدەگەرى, جازبا اقىندار ءمۇشايراسىنىڭ تارلانبوزى, حالىقارالىق «شابىت» شىعارماشىل جاستار فەستيۆالىنىڭ «ادەبيەت», «جۋرناليستيكا» اتالىمدارى بويىنشا ديپلومانتى, قازاقستان جۋرناليستەر وداعىنىڭ مۇشەسى, اقىن ەرتاي بيمۇحانوۆ شالعاي اۋدانىنداعى جۋرناليستيكا سالاسىنىڭ مايتالمانى. ونىڭ زايىبى ەلميرا ەسقايىروۆا قاراتوبە اۋداندىق ورتالىقتاندىرىلعان كىتاپحانا جۇيەسىنىڭ بيبليوگرافى. ونىڭ ەسىمى وبلىستىق «جىلدىڭ ەڭ ۇزدىك كىتاپحاناشىسى» كونكۋرسىنىڭ جۇلدەگەرى رەتىندە دە كوپكە تانىمال. اتالعان وتباسىنىڭ جاقسى اتاعى حالىقتىق ونەردى قادىر تۇتۋ مەن كوركەم ادەبيەتتى ۇزدىكسىز وقۋ ارقىلى شىققان. ولاردىڭ ورتاق جەتىستىكتەرى جەتەرلىك. وبلىستىق «تولاعاي», «اكەم, شەشەم جانە مەن», «التىن ۇيا» وتباسىلىق بايقاۋلارىندا توپ جارعان جانە «پاراساتتى وتباسى» اتالىمىنىڭ يەگەرلەرى اتانعان. بيمۇحانوۆتار وتباسى وزدەرىنىڭ جان-جاقتىلىعىمەن ەرەكشەلەنەدى. قاراتوبە مەكتەپ-گيمنازياسى بويىنشا بالا تاربيەسىندەگى ونەگەسى ءۇشىن «جىل وتباسى-2012» اتالىمىن دا قوسا يەلەنگەن كەيىپكەرىمىزدىڭ مەرەيى قاشان دا ۇستەم. وتاعاسى ەرتاي بيمۇحانوۆ رەسپۋبليكا پرەزيدەنتى نۇرسۇلتان نازارباەۆتىڭ العىس حاتى يەگەرى, قازاقستان جۋرناليستەر وداعىنىڭ مۇشەسى, استانا قالاسىندا وتكەن قازاقستاننىڭ باس رەداكتورلارى ءى فورۋمىنىڭ دەلەگاتى رەتىندە دە كوپكە تانىمال. تالانتتى وتباسى يەسى «اقىندىق-ازاماتتىق تۇلعا قالىپتاستىرۋ جولدارى» اتتى كىتاپتىڭ اۆتورى. ونىڭ سىرشىل ولەڭدەرى بىرنەشە جىر جيناقتارىنا ەنىپ, رەسپۋبليكالىق «انا ءتىلى», «قازاق ادەبيەتى», «التىن وردا», وبلىستىق «ورال ءوڭىرى» گازەتتەرى بەتتەرىندە جاريالاندى. وتاناسى ە.ەسقايىروۆا بۇدان بەس جىل بۇرىن وبلىستىق «ۇزدىك كىتاپحاناشى-2009» كونكۋرسىنىڭ جۇلدەگەرى اتانعان. ول اۋداندىق, وبلىستىق مادەنيەت باسقارمالارىنىڭ قۇرمەت گراموتاسىمەن ماراپاتتالعان. كىتاپحانالىق-شىعارماشىلىق جۇمىستارى رەسپۋبليكالىق «كىتاپحانا الەمى» جۋرنالىنا ەنگىزىلگەن. جوعارى ساناتتى كىتاپحاناشى-بيبليوگراف رەتىندە كىتاپحانالىق «ەلمۇرا» ولكەتانۋ كلۋبىنا جەتەكشىلىك ەتەدى. ەرتاي مەن ەلميرانىڭ تۇڭعىش ۇلدارى رۋحانيات وبلىستىق «ەگەمەن ەلدىڭ ەرتەڭى» اتتى جاس اقىندار كونكۋرسىنىڭ ءى ورىن يەگەرى. ءارى مەكتەپىشىلىك «گارمونيا» كوركەم ءسوز وقۋ شەبەرلەرى ۇشتىگىنىڭ جانە «جاسۇلان» اتتى وقۋشىلاردىڭ بىرىڭعاي ۇيىمىنىڭ مۇشەسى. اۋداندىق ينفورماتيكا ءپانى وليمپياداسىنىڭ جۇلدەگەرى رەتىندە دە ونىڭ تالانتى مەن قارىم-قابىلەتىنە قول سوعاتىن اۋىلداستارى از ەمەس. ونەگەسى مول ەرلى-زايىپتىلاردىڭ كەنجە ۇلدارى ءاليحان بولسا, «العا, قازاق جىگىتتەرى!» بايقاۋىندا ماڭدايى جارقىراپ, العا شىقتى. وتباسىنداعى بالالاردى تاربيەلەۋدىڭ باستى ءبىر كىلتى وتباسىلىق وقۋ ءداستۇرى بولىپ تابىلادى. وتباسىلىق قاتىناستار – سىيلاستىق, كەلىسىم, تۇسىنىستىك قاعيداتتارىنا سۇيەنەدى. ءبىر ايتا كەتەرلىگى, وتباسى مۇشەلەرىنىڭ وسى ۋاقىتقا دەيىنگى العان جۇلدە-ماراپاتتارى جۇزدەپ سانالادى. ايتسە دە وتاعاسى باستى ماقسات – جۇلدە الىپ, ماقتاۋ قاعازىن يەلەنۋ ەمەس, تيىسىنشە تالماي ىزدەنۋ. ىزدەنىس جەتەگىندە باسەكەگە قابىلەتتى قوعامدا قىزمەتتە دە, ونەردە دە وق بويى الدا بولۋ. ءبىزدىڭ «مەرەيلى وتباسى» بايقاۋىنا قاتىسۋىمىزعا ىقپال ەتكەن اۋدان باسشىلىعى مەن اۋداندىق ىشكى ساياسات بولىمىنە ۇلكەن العىسىمدى ايتامىن. بايقاۋعا قاتىسۋ ءۇشىن ارنايى كولىك ءبولىپ, جان-جاقتى قولداۋ كورسەتكەن قاراتوبەلىك اعايىننىڭ بارلىعىنىڭ ەڭبەگىنە تابىس, وتباسىلارىنا باياندى باقىت تىلەيمىن, – دەيدى.
قاراتوبە اۋدانى.
ماقالالار توپتاماسىن ازىرلەگەن «ەگەمەن قازاقستان» گازەتىنىڭ باتىس قازاقستان وبلىسىنداعى مەنشىكتى ءتىلشىسى تەمىر قۇسايىن.
