باندار 2003 جىلى 1 ماۋسىمدا شىمكەنت قالاسىندا دۇنيەگە كەلگەن. ول جاستايىنان قازاق كورشىلەرىنىڭ بالالارىمەن ويناپ ءوستى. ءوزارا ارالاس-قۇرالاس جۇرگەندىكتەن ءتىلى دە قازاقشاعا جاتىق بولا باستادى. مەكتەپ جاسىنا كەلگەندە ۇلىنىڭ قازاق تىلىنە دەگەن قابىلەتىن اڭعارعان اتا-اناسى ويلانباستان قازاق مەكتەبىنە بەرگەن. 2017 جىلى وتباسىمەن بىرگە استانا قالاسىنا قونىس اۋدارعان. ول جەردە دە قازاق مەكتەبىنە بارىپ, ءبىلىم وشاعىن سول جەردە تامامداعان. 2022 جىلدىڭ مامىر ايىندا باندار اسكەري بورىشىن وتەۋ ءۇشىن ۇلتتىق ۇلان قاتارىنا شاقىرىلادى. ءبىر ايلىق دايىندىقتى تولىق كولەمدە اياقتاپ, اسكەري انت قابىلداعان سارباز جاۋىنگەرلىك بولىنىسكە بولىنەدى. قازىرگى كەزدە اسكەري قىزمەتتى جەتە مەڭگەرگەن سارباز, بولىمدەگى ۇلگىلى اسكەري قىزمەتشى, سەنىمدى دوس, مىندەتىنە ادال جاۋىنگەر.
اسكەرگە دەيىن بالا كۇنىندە كاۆكاز حالقىنىڭ بيىنە دەگەن قۇشتارلىعى ويانىپ, 6 جاسىنان باستاپ لەزگينكا بيىمەن اينالىسقان. ءبيدىڭ قىر-سىرىن جەتىك مەڭگەرگەن باندار 17 جاسىندا استانا قالاسىندا ءوزىنىڭ جەكە بي زالىن اشىپ, وسى بي تۇرىنەن ءدارىس بەرگەن. سونداي-اق 18 جاسىندا «Tiktok» الەۋمەتتىك جەلىسىندە ءوزىنىڭ لەزگينكا بيىمەن تانىمال بولعان.
– ءوزىم كوپۇلتتى وتباسىنان شىققانمىن. وتباسىمىز ۋكراين, ازەربايجان, تۇرىك ۇلتىنىڭ وكىلدەرىنەن قۇرالعان. شاڭىراعىمىزدا بارلىعىمىز تەك قازاقشا سويلەسەمىز. كورشىلەرىمىزدىڭ ءبارى قازاق وتباسىلارى بولدى. ءوز ەلىن قۇرمەتتەيتىن, قادىرلەيتىن ادام ءتىلدى دە تەز مەڭگەرەدى. وڭتۇستىكتىڭ, ونىڭ ىشىندە قازاقيلىقتىڭ ءيىسى اڭقىپ تۇرعان شىمكەنتتىڭ توپىراعى مەن اۋاسى جانە وسى ەلدىڭ تۋماسى بولعاندىقتان دا ءتىلدى مەڭگەرىپ الۋىما اسەر ەتكەن بولار. قازىرگى كەزدە قازاق ءتىلىن مەڭگەرگەنىمە قاتتى قۋانامىن. مەنىڭ ءتىلىم دە, جانىم دا – قازاق. مەن ءوز ەلىمدە ەركىن ءومىر ءسۇرىپ جاتقانىم ءۇشىن قازاقستان حالقىنا, وتباسىمدا مەنى شەكسىز جاقسى كورىپ بار مەيىرىمىمەن تاربيەلەگەن اتا-اناما, مەنى قولداپ اركەز قاسىمدا جۇرگەن دوستارىما, قارۋلاستارىما جانە قۇقىقتىق ءتارتىپ اسكەرى – ۇلتتىق ۇلانعا ۇلكەن العىسىمدى ايتامىن. كوكتەمنىڭ العاشقى شۋاعىمەن بىرگە كەلگەن العىس ايتۋ كۇنى مەرەكەسى قۇتتى بولسىن. جاقىندارىمىزعا جاقسىلىق جاساپ, ءبىر-بىرىمىزگە العىس ايتىپ جۇرەيىك, – دەيدى قاتارداعى جاۋىنگەر باندار يساەۆ.
الماتى
