ەلدىك باعدارلاما تالقىلانۋدا

كەشە تاۋەلسىزدىك سارايىندا ەكونوميكالىق ىنتىماقتاستىق جانە دامۋ ۇيىمىنىڭ قازاقستانعا ارنايى دايىنداعان ەلدىك باعدارلاماسى تالقىلاندى. وعان اتالعان ۇيىمنىڭ قىزمەتكەرلەرى مەن ەلىمىزدەگى بىرقاتار ۆەدومستۆو باسشىلارى قاتىستى. شارانىڭ ءبىرىنشى ءبولىمى اياقتالعان سوڭ ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ پەن ەكونوميكا­لىق ىقپالداستىق جانە دامۋ ۇيىمىنىڭ سىرتقى بايلانىستار جونىندەگى حات­شىلىعىنىڭ ديرەكتورى ماركوس بونتۋري بۇقارالىق اقپارات قۇرالدارى وكىلدەرىنىڭ الدىنا شىقتى. مينيستر ءبىرىنشى ءسوز كەزەگىن مارتەبەلى قوناققا بەردى. قوناقتىڭ سوزىنە قاراعاندا, ەلدىك باعدارلاما ۇيىمعا دا, قازاقستان مەملەكەتىنىڭ ەركىن دامۋىنا دا ۇلكەن مۇمكىندىكتەر تۋدىرماق. قازاقستان وسىنداي باعدارلامانى جۇرگىزۋگە ارنايى تاڭدالعان ءتورت مەملەكەتتىڭ ءبىرى بولىپ تابىلادى. وسى ورايدا قازاقستاننىڭ ەلدىك باعدارلاماسى ەكونوميكالىق ىنتىماقتاستىق جانە دامۋ ۇيىمى مەن قازاقستان اراسىنداعى قاتىناستاردى ءارى قاراي نىعايتۋعا ىقپال ەتەدى دەپ ۇمىتتەنەمىز. ءسويتىپ, سىزدەردىڭ ەلمەن اراداعى قاتىناستارعا ايرىقشا ءمان بەرەمىز. بۇل تۇرعىدا اتالعان باعدارلاما ءوزارا ءتيىمدى بولاتىنىنا سەنىمدىمىن. الداعى التى ايدا ءبىز قازاقستاندىق دوستارىمىزبەن تىعىز بايلانىستا جۇمىس ىستەيتىن بولامىز. وسى باعىتتاعى جۇمىستار باعدارلامانى پىسىقتاۋعا نەگىزدەلەدى, دەدى ول. قازاقستان رەسپۋبليكاسى مەن ەكونوميكالىق ىنتىماقتاستىق جانە دامۋ ۇيىمى اراسىنداعى 2015-2016 جىلدارعا ارنالعان ىنتىماقتاستىقتىڭ ەلدىك باعدارلاماسى جوباسىن تالقىلاۋ جۇمىسى ءالى دە جالعاسىن تاۋىپ, جىل سوڭىنا دەيىن كەلىسىلىپ, سودان كەيىن عانا قول قويىلاتىن بولادى. مۇنى ەكونوميكا جانە بيۋدجەتتىك جوسپارلاۋ ءمينيسترى ايتتى. ەلدىك باعدارلاما ەىدۇ-نىڭ ۇيىمنىڭ قۇرامىنا كىرمەيتىن ەلدەرمەن ءوزارا ءىس قيمىلدارىنىڭ جاڭا قۇرالى بولىپ تابىلادى. بۇل باعدارلاما العاش رەت ءتورت مەملەكەتكە عانا دايىندالىپ وتىر. قازىرگى ۋاقىتتا ەلدىك باعدارلاما جوباسى مەملەكەتتىك باسقارۋ, فيسكالدىق ساياسات, باسەكەگە قابىلەتتىلىك, ىسكەرلىك احۋالدى جاقسارتۋ جانە تۇراقتى دامۋ سىندى سالالارداعى بىرلەسكەن باستامالاردى جۇزەگە اسىرۋدى قاراستىرادى. بۇل ءتىزىم ءالى دە ۇزارا ءتۇسۋى ىقتيمال», دەدى مينيستر. نۇرباي ەلمۇراتوۆ, «ەگەمەن قازاقستان».