قاسىم-جومارت توقاەۆقا الەمدىك ەكونوميكانىڭ وسىمىنە قاتىستى بولجامداردىڭ, سونداي-اق وسى جىلعا ارنالعان ماكروەكونوميكالىق كورسەتكىشتەردىڭ بۇعان دەيىن ماقۇلدانعان دەڭگەيدە ساقتالىپ وتىرعانى جونىندە مالىمەت بەرىلدى. بيىلعى ءىجو-ءنىڭ ناقتى ءوسىمى 4 پايىز, ال مۇناي باعاسى باررەلىنە 85 دوللار بولادى دەگەن بولجام بار.
پرەمەر-ءمينيستردىڭ ايتۋىنشا, بيۋدجەت شىعىستارىن ىشكى قايتا ءبولۋ جانە بيۋدجەت تۇسىمدەرىن ارتتىرۋ ەسەبىنەن 2,2 تريلليون تەڭگەنى ناقتىلاۋ جوسپارلانىپ وتىر. وسى رەتتە شاعىن جانە مونوقالالاردى دامىتۋعا, «اۋىل – ەل بەسىگى» جوباسىن ىسكە اسىرۋعا, ەلدى مەكەندەردى گازبەن قامتاماسىز ەتۋگە, جىلۋمەن قامتۋ جۇيەلەرىن سالۋعا جانە رەكونسترۋكتسيالاۋعا, ازىق-ت ۇلىك قاۋىپسىزدىگىن ساقتاۋعا, سونداي-اق اۋىل حالقىن جاپپاي جۇمىسپەن قامتۋ ءۇشىن جاعداي جاساۋعا قوسىمشا قارجى ءبولۋ كوزدەلگەن.
كولىك ينفراقۇرىلىمى مەن لوگيستيكا سالاسىن دامىتۋ ءۇشىن جولدار سالۋعا جانە رەكونسترۋكتسيالاۋعا قارجى ءبولۋ, پويىزداردى جاڭارتۋ, جولاۋشىلار ۆاگوندارىن ساتىپ الۋ جوسپارلانعان. سونىمەن قاتار وڭدەۋ ونەركاسىبىندەگى ءىرى جوبالارعا, ەلدىڭ قورعانىس قابىلەتى مەن قاۋىپسىزدىگىن قامتاماسىز ەتۋ ءۇشىن ارميانى جاڭعىرتۋعا جانە اسكەري قىزمەت جاعدايىن جاقسارتۋعا قوسىمشا قاراجات ءبولۋ كوزدەلىپ وتىر.
پرەزيدەنت ەلدىڭ دامۋىنا الەۋمەتتىك-ەكونوميكالىق تۇرعىدا بارىنشا وڭ ىقپال ەتۋ ماقساتىندا بيۋدجەت قاراجاتىنىڭ جۇمسالۋىنا باقىلاۋدى كۇشەيتۋدىڭ ماڭىزدىلىعىن اتاپ ءوتتى.
