ءىس-شارا الماتى وبلىسىنىڭ ەڭبەكشىقازاق اۋدانىنا قاراستى قاينازار اۋىلىندا ۇيىمداستىرىلدى. كانديداتتار, پارتيا بەلسەندىلەرى جانە اۋىل تۇرعىندارى اۋىل ماڭىنداعى تاۋعا شىعىپ, مەملەكەتتىڭ جانە پارتيا تۋىن ورناتتى.
جەرگىلىكتى تۇرعىندارمەن كەزدەسۋدە كانديدات يرينا ءالىمجانوۆا زەينەتاقىسىنىڭ 80 پايىزىن نەسيە تولەۋگە جۇمساپ وتىرعان قارتتار بار ەكەنىن ايتتى. بۇل رەتتە ول تۇرعىنداردىڭ الەۋمەتتىك جاعدايىن جاقسارتۋدىڭ تىڭ تەتىكتەرىن ويلاستىرۋ قاجەت ەكەنىن العا تارتتى.
– ەلىمىزدە نەسيەگە «بايلانعان» ادام كوپ. نەگىزىندە حالىقتىڭ نەسيەلەنۋ دەڭگەيى ەكونوميكالىق وسىممەن قاتار ءجۇرۋى كەرەك ەدى. ال حالىقتىڭ بانك الدىنداعى قارىزى ەكونوميكالىق وسىمنەن اسىپ تۇسكەن. ۇلتتىق بانك جۇرگىزگەن ساۋالداما ناتيجەسى ەكونوميكالىق بەلسەندى نەمەسە كىشىگىرىم قىزمەتتە جۇرگەن ازاماتتاردىڭ 90 پايىزى تەك ايلىقپەن كۇن كورەتىنىن كورسەتكەن. دەمەك قازىر جۇرتشىلىقتىڭ قارىزسىز ءومىر ءسۇرۋى بارىنشا شەكتەلگەن. نەسيە راسىمدەگەن كەزدە قارىز الۋشىنىڭ تولەم قابىلەتى, تابىسى ەسكەرىلەتىنى بەلگىلى. سوعان قاراماستان ءبىر ادامنىڭ ءبىر مەزگىلدە بىرنەشە نەسيەنى قاتار الۋى تىيىلماي وتىر. ساراپشىلاردىڭ دەرەگىنشە, قازاقستانداعى جۇمىس ىستەيتىن حالىقتىڭ 70 پايىزى قارىزبەن ءومىر سۇرەدى. نەسيەنى شەكتەۋ ماسەلەسىمەن نارىقتىڭ جاعدايىن جاقسارتا المايمىز. بانك سەكتورى تاجىريبەسىندە حالىقتى نەسيەگە بايلاپ قويۋدىڭ ءتۇرلى ءادىسى بار. بانكتەر قارىز الۋشىنىڭ قارىز جۇكتەمەسى نورماتيۆكە سايكەس بولسا, وزگە بانكتەگى نەسيەسىن قايتا قارجىلاندىرۋ ارقىلى نەسيەسىن جاڭارتا بەرۋگە, سول ارقىلى قارىز قامىتىن قالىڭداتا بەرۋگە جول اشىپ قويعان. ەگەر قۇزىرلى ورىندار جاعدايدى رەتتەپ وتىرماسا, ماسەلەگە قارجى, مۇناي ترەيدەرلەرى ءتارىزدى «نەسيە ترەيدەرلەرى» ارالاسىپ كەتۋى مۇمكىن. مۇنداي جاعدايدا قارىزعا باتقان حالىقتىڭ الەۋمەتتىك جاعدايى ۋشىعىپ كەتەدى. حالىق قارىزسىز بولۋى ءۇشىن ولاردىڭ تابىسى ءوسۋى كەرەك, – دەيدى كانديدات.
