كەزدەسۋگە «بايتاق» پارتياسى تۇركىستان وبلىسى فيليالىنىڭ توراعاسى ءنالىباي بەكجان, پارتيانىڭ تىزىمىنە ەنگىزىلگەن سەيدۋللا يسمايلوۆ, كانديداتتار ەرلىك قۇلجان, ەرىك وسپانوۆ, الىشەر ەسماعانبەتوۆ جانە تۇلكىباس اۋدانى بويىنشا شتاب مۇشەلەرى قاتىسىپ, تۇرعىندارمەن پىكىر الماستى. كەزدەسۋ بارىسىندا اۋدان تۇرعىندارى تاراپىنان ەكولوگيالىق جانە الەۋمەتتىك ماسەلەلەر جونىندە بىرقاتار سۇراق قويىلىپ, ۇسىنىستار تىڭدالدى.
– مەن دە وسى تۇلكىباستىڭ تۋماسىمىن. ءبىزدى قورشاعان تاۋ مەن تاستىڭ قاي قايسىسى بولسىن, ءبىزدىڭ بالالىق شاعىمىزدىڭ كۋاسى. تۇلكىباس اۋدانى – ارنايى قورعالاتىن قورىق اۋماعىمەن استاسىپ جاتقان اۋدان. وكىنىشتىسى, اۋدانىمىزدىڭ برەندى بولعان الماسى, قىزعالداعى, جان-جانۋارى مەن قۇستارى بۇگىندە جويىلىپ كەتۋدىڭ از-اق الدىندا تۇر. ونى ساقتاپ, بولاشاق ۇرپاققا جەتكىزۋ ءسىز بەن ءبىزدىڭ قولىمىزدا, – دەدى قايرات ايتباي.
بۇدان كەيىن رەسپۋبليكالىق شتاب باسشىلىعى اقسۋ-جاباعىلى تابيعي قورىعى قىزمەتكەرلەرىمەن جۇزدەسىپ, مۇراجايدى ارالادى. ەكولوگيالىق ماسەلەلەردى تالقىلادى. كەيىن تۇلكىباس اۋدانىنداعى تابيعي گازدى تاسىمالداۋمەن اينالىساتىن كومپانياعا اتباسىن بۇرىپ, سالا ماماندارىنا الداعى ناۋقاننىڭ ماڭىزدىلىعى ءتۇسىندىرىلدى. وڭىردە ءوندىرىس وشاقتارى كوپ بولعاندىقتان قازىر ەكولوگيالىق ماسەلەلەر دە قوردالانىپ كەلەدى. قورشاعان ورتانىڭ تازالىعى اۋىلداعى اعايىن ءۇشىن ماڭىزدى. سوندىقتان پارتيا بەلسەندىلەرى اۋدانداعى تسەمەنت جانە اك وندىرەتىن زاۋىتتا بولدى. ەڭبەك ۇجىمىمەن كەزدەسىپ, تۇعىرنامانىڭ نەگىزگى باعىتتارى تانىستىرىلدى.
ايتا كەتەيىك, وتكەن عاسىردىڭ 50-جىلدارى نەگىزى قالانعان ءوندىرىس وشاعى قازىر جىلىنا 500 مىڭ توننا تسەمەنت, 120 مىڭ توننا اك وندىرەدى. 600 ادامدى جۇمىسپەن قامتىپ وتىر.
