بۇل تۇستا باسا ءمان بەرەر تىرەك – ادامنىڭ جىگەرى مەن ىنتاسى ءھام وزىنە دەگەن سەنىمى. قۇلشىنا كىرىسكەن كىشكەنتاي كاسىپتىڭ ءوزى تاۋداي تابىس اكەلىپ جاتسا تاڭعالماڭىز. ال ءوز ءىسىڭىزدى جانىڭىزبەن ءسۇيىپ, ارمانداي الماساڭىز, ءبارى بەكەر. بۇگىنگى اڭگىمەمىزدىڭ كەيىپكەرى تالاي زامانداسىنا ۇلگى بولار الماتىلىق تىگىنشى بالا – باعداۋلەت پارساحانوۆ. باعداۋلەت 19 جاستا. كاسىبي كۋرستىڭ كومەگىمەن-اق مىقتى مامانعا اينالعان. ونىڭ قولىنان شىققان كلاسسيكالىق ۇلگىدەگى ەرلەر كيىمدەرى كادىمگىدەي سۇرانىسقا يە. مەكتەپ بىتىرەر تۇستا بالا كۇننەن ىنتاسى اۋعان كاسىپكە قادام باسقان.
– 2020 جىلى الماتى قالاسىنداعى №86 مەكتەپ- گيمنازيانى ءبىتىردىم. وقۋ ۇلگەرىمىم ويداعىداي ەدى, ۇبت-دان جيناعان 91 بالمەن بىرقاتار وقۋ ورنىنا گرانتقا تۇسۋگە مۇمكىندىك بولدى. الايدا جيعان بالىم ءوزىم قالاعان ماماندىققا جەتكىلىكسىز بولعاندىقتان قۇجات تاپسىرۋدان باس تارتتىم. اكەم ەرتە دۇنيە سالعاندىقتان اقىلى بولىمدە وقىپ جالعىز اناما جۇك تۇسىرگىم كەلمەدى. تىگىن ىسىنە قىزىعاتىنمىن. اسىرەسە ەرلەرگە ارنالعان قىمبات كوستيۋمدەر تىگەتىن تابىستى ديزاينەرلەردىڭ پاراقشاسىنا جازىلىپ, جۇمىس بارىسىن باقىلاپ ءجۇردىم. بىرتە-بىرتە وزىمە كەرەگى وسى ەكەنىن ءتۇسىنىپ, اقىلى كۋرسقا جازىلۋعا بەل بايلادىم. اناما بۇل كاسىپ ۇلكەن سۇرانىسقا يە ەكەنىن, مىقتى مامان بولسام دالادا قالمايتىنىمدى ايتىپ كوندىردىم ايتەۋىر. ونىڭ ۇستىنە اقىلى تۇردە وقۋعا تۇسسەم, ءبىر جىلدىڭ وزىندە ميلليون تەڭگە تولەۋىمە تۋرا كەلەدى, قۇنى 600 مىڭ تۇراتىن كۋرستى وقۋ دا ءبىزدىڭ وتباسىمىز ءۇشىن ۇلكەن تاۋەكەل بولدى. دەسە دە انام مەن اعام مەنى قولدادى. بۇل سالانىڭ قىر-سىرىنا باۋلىپ جۇرگەن اسەت ايمانوۆ – ەلىمىزدەگى مىقتى تىگىنشىلەردىڭ ءبىرى. بولاشاقتا اتەلە اشىپ, ءوز كاسىبىمدى ورگە سۇيرەۋدى ماقسات ەتەمىن, – دەيدى باعداۋلەت پارساحانوۆ.
تالانتتى جاستىڭ تالابى ءسۇيسىندىردى. كوزىنەن ءوز ىسىنە دەگەن ادالدىعى ۇشقىنداپ تۇر. تىگىن ونەرىنىڭ ءتۇرلى ءادىسىن مەڭگەرۋمەن شەكتەلمەي, سالاعا قاتىستى الەمدىك نارىقتا سۇرانىسقا يە ترەندتەردى تىزبەلەپ, سوڭعى ۇلگىدەگى كيىنۋ مادەنيەتى تۋرالى ساراپتاپ ايتىپ بەردى. تازا قول ەڭبەگىنەن شىققان ءونىم قاشاندا باعالى. دەيتۇرعانمەن حالىقتىڭ ءال-اۋقاتى ونى تولىق تۇسىنۋگە جەتە قويماعانىن ايتادى.
– ءبىزدىڭ ەلدەگى كوپ تىگىن شەبەرحانالارىندا نەگىزگى باسىمدىق ايەلدەر كيىمىنە بەرىلگەن. ەرلەر كوستيۋمدەرىن تىگەتىن ساناۋلى ورىنداردىڭ ءوزى ءالى كۇنگە دەيىن باياعى كەڭەستىك تەحنولوگيانىڭ ادىستەرىن قولدانادى. ءبىز كلاسسيكالىق كيىمدەردىڭ ەجەلگى وتانى اعىلشىن تەحنولوگياسىن نەگىزگە الامىز. كوپ وتانداستارىمىز بۇل تەحنولوگيادان حابارسىز. الەمدىك ترەندتە كۇن سايىن ءتۇرلى جاڭالىقتار بولىپ جاتسا دا, كلاسسيكالىق كيىم ءوز بيىگىنەن تۇسپەيدى. ساپالى ءونىمدى باعالايتىندار, مۇنداي ايرىقشا ادىسپەن تىگىلەتىن كيىمدەردىڭ ارتىقشىلىقتارىن جاقسى تۇسىنەدى. ناعىز ساپالى كوستيۋم ءجۇرىس-تۇرىسقا ىڭعايلى ءارى جەپ-جەڭىل بولۋى كەرەك. ءتىپتى تىگىستەرىنىڭ قىرتىستارىنا دەيىن بىلىنبەيدى. تەرلەتپەۋى كەرەك. بازارداعى كوپ ءونىم ۇلكەن تسەحتاردا تىگىلەتىندىكتەن جەلىم پايدالانادى. كوپ جاعدايدا جەلىمنىڭ اسەرىنەن كوستيۋم تەرلەتكىش ءارى اۋىر بولىپ كەلەدى. ءبىزدىڭ ادىستە جەلىم مۇلدە قولدانىلمايدى. قول جۇمىستارىنىڭ تىگىسى سوزىلعىش بولعاندىقتان, ۇستىڭە ىڭعايلى وتىرعانىن سونشالىق, سەزبەي دە قالاسىڭ. بۇل ىستەن مۇلدە حابارى بولماسا دا ەكى ءونىمدى سالىستىرا كيىپ كورگەن ادام جەر مەن كوكتەي ايىرماشىلىقتى بىردەن بايقايدى, – دەيدى باعداۋلەت.
تانىمال تىگىنشى اسەت ايمانوۆتىڭ قول استىندا جۇمىس ىستەيتىن تالاپتى جاس زاماناۋي مەديانىڭ مۇمكىندىكتەرىن پايدالانا وتىرىپ, جەلى وقىرماندارىنا كوستيۋم تىگۋدىڭ ادىستەرى مەن بۇل باعىتتاعى ءتۇرلى تەحنولوگيالار تۋرالى اقپارات بەرۋدى ادەتكە اينالدىرعان. ءبىز دە باعداۋلەتتى ينستاگرام جەلىسىندەگى bakdaulet_tailor پاراقشاسى ارقىلى كەزدەيسوق تاۋىپ الدىق. جاس مامان جەلىدە وقىرماندارىنا ءوز جۇمىستارىن تانىستىرا وتىرىپ, تىگىن بارىسىندا وزدەرى قولداناتىن «Bespoke» مادەنيەتىنىڭ ەرەكشەلىكتەرىن تانىتۋدى كوزدەيتىنىن ايتادى.«جاقسى كيىنۋ ادامنىڭ تالعامىن قالىپتاستىرىپ قانا قويماي, ءوزىن كەز كەلگەن ورتادا ەركىن سەزىنۋگە كومەكتەسەدى. بۇل تۇرعىدا تالعام ۇلكەن ءرول وينايدى. كوپ دۇكەندەردەگى تاۋارلار ءوز ساپاسىنا تاتىماي جاتادى. كەيدە 50-60 مىڭعا العان كوستيۋم مەن 150 مىڭ تەڭگەگە العان كوستيۋمنىڭ ساپا تۇرعىسىنان پالەندەي ايىرماشىلىعى بولماۋى مۇمكىن. حالىققا وسىنى تۇسىندىرگىم كەلەدى. نەگىزى كوستيۋم كيۋدىڭ وزىندىك مادەنيەتى بار. قانداي ءىس-شاراعا قانداي كوستيۋم كيۋ كەرەك, جەڭىنىڭ, شالبارىنىڭ ۇزىندىعى قانداي بولۋى قاجەت, وسىنىڭ بارىنە ءمان بەرۋگە ۇيرەتەمىز», دەپ وي ءبولىستى جاس تىگىنشى.
باعداۋلەتتىڭ بويىنان ءوز كاسىبىنە دەگەن جىگەر-جالىننىڭ تاسقىنىن بايقادىق. بولاشاقتا جوعارى ءبىلىم يەسى اتانۋ دا جوسپارىندا جوق ەمەس. ازىرگە تىگىن ءىسىنىڭ قىر-سىرىن تەرەڭ مەڭگەرىپ ەلگە بەلگىلى تىگىنشى بولۋدى ارماندايدى. جاي عانا ارمانداپ ەمەس, تالپىنىپ, تالاپتانىپ ءجۇر.
وتكەندە ءبىر تانىسىمىز: «كورشىنىڭ بالاسى از ۋاقىتتا اۆتوەلەكتريك كاسىبىن مەڭگەرىپ ەدى, اۋلاسىنان كولىك ۇزىلمەيدى, ادۆوكات بولام دەپ التى جىل وقىعان ءبىزدىڭ جۇگەرمەك جەتى جىلدان بەرى جەلكەسىن قاسىپ ءالى ءجۇر», دەپ ەدى. جۇرتتىڭ ءبارى مۇعالىم مەن دارىگەر, پوليتسيا مەن پروكۋرور بولماسى تاعى انىق. ارينە, اكادەميالىق ءبىلىم الىپ, كوكجيەگىڭدى كەڭەيتكەنگە نە جەتسىن. دەسە دە اتا-اناسى اۋزىنان جىرىپ وقىتقان ديپلومىن مىسە تۇتپاي, قيال قۋىپ جۇرگەن جاستار قانشاما؟! تالاپقا ساي مامان تاسادا قالمايدى. بۇل ءسوزىمىزدىڭ جارقىن مىسالى – باعداۋلەت پارساحانوۆ.
الماتى
