بۇرىن قىزىلوردادا كۇردەلى دياگنوز قاتارىنا جاتاتىن رەۆماتويدتى ارتريت, بەحتەرەۆ اۋرۋلارىمەن اۋىراتىن جاندار دەرتىنە داۋا ىزدەپ, ءىرى قالالارعا جول تارتىپ جاتاتىن. ەكى جىلدان بەرى جالاعاش اۋداندىق اۋرۋحاناسىندا وسىنداي پاتسيەنتتەرگە كومەك كورسەتىلىپ كەلەدى.
اۋداندىق اۋرۋحانانىڭ باس دارىگەرى ەركەبۇلان ماقسۇتوۆ ەڭبەك جولىن 2010 جىلى قىزىلوردا قالالىق №1 ەمحاناسىندا ايماقتىق دارىگەر بولىپ باستاپتى. كەيىن قالالىق اۋرۋحاناعا دارىگەر-تەراپەۆت بولىپ اۋىسقان ول رەۆماتولوگيا ماماندىعى بويىنشا ءبىلىمىن جەتىلدىرگەن. جالاعاش اۋدانىندا جاڭادان اشىلعان اۋرۋحانانى باسقاراتىن مامان ىزدەگەندە, باسشىلىق تاڭداۋى ەركەبۇلانعا تۇسكەن ەكەن.
– جالپى ءبىزدىڭ وبلىس ءۇشىن رەۆماتولوگ قات ماماندار قاتارىندا تۇر. وسىعان بايلانىستى دارىگەرلەر اراسىندا ءتۇرلى سەمينار ۇيىمداستىرىلىپ, جەرگىلىكتى مامانداردىڭ جاڭا سالاعا بەيىمدەلۋىنە مۇمكىندىك جاسالدى. وسىلايشا, دياگنوستيكالاۋ جانە ەمدەۋگە قاجەتتى زاماناۋي جابدىقتار مەن بىلىكتى كادرلار ارقاسىندا اۋدانداردان كەلگەن ناۋقاستاردى ەمدەپ جاتىرمىز, – دەيدى باس دارىگەر.
مامانداردىڭ ايتۋىنشا, كوروناۆيرۋس ىندەتىنەن كەيىن رەۆماتويدتى ارتريتپەن اۋىرعانداردىڭ ارتقانى بايقالادى. بۇل دەرت تۇقىم قۋالايدى, كۇيزەلىستەن دە بولادى. جالپى, رەۆماتويدتى ارتريت بۋىندى زاقىمداۋدان باستالسا, جاسوسپىرىمدەر اراسىندا ءجيى كەزدەسەتىن بەحتەرەۆ اۋرۋى ومىرتقاعا اسەر ەتەدى. ال ىشكى ورگانداردى زاقىمداۋدان باستالاتىن جۇيەلى قىزىل جەگى اۋرۋىنا نەگىزىنەن 20-40 جاس ارالىعىنداعى ايەلدەر كوپ شالدىعادى.
ماماندار قاي اۋرۋدى دا اسقىنتپاۋدىڭ جولى, دەر كەزىندە دارىگەرگە كورىنۋ ەكەنىن ايتىپ وتىر. كەيدە ناۋقاستار بوگدە دياگنوزبەن ەمدەلىپ, ۋاقىتتى وتكىزىپ الىپ جاتاتىنى بار. اشىلعانىنا ەكى جىلدان اسقان اۋداندىق اۋرۋحانا زاماناۋي قۇرال-جابدىقتارمەن جابدىقتالعان. قازىر مۇندا دارىگەرلىك كەڭەس پەن ەم الۋعا باسقا دا اۋداندار مەن وبلىس ورتالىعىنان كەلەتىندەر كوپ. سولاردىڭ ءبىرى – ارال اۋدانىنداعى سەكسەۋىل كەنتىنىڭ تۇرعىنى جانسايا اقىلبەكوۆا.
– مەن جۇمىسسىز بولعاندىقتان ءمامس جۇيەسىندە ساقتاندىرىلماعان ەدىم. بىراق جەرگىلىكتى دارىگەر ونىڭ مۇمكىندىكتەرى مەن ارتىقشىلىقتارىن ءتۇسىندىردى. سودان كەيىن بىرىڭعاي جيىنتىق تولەمدى اي سايىن تولەي باستادىم. سونىڭ ناتيجەسىندە, قازىر قاجەتتى ەمدى الىپ جاتىرمىن. بۇرىن اۋىرا قالساق, اقتوبە قالاسىنا بارىپ قارالاتىن ەدىك. كەيىنگى جىلدارى وسى جالاعاش اۋداندىق اۋرۋحاناسىنا كەلەتىن بولدىق. مۇنداعى جەرگىلىكتى مامانداردىڭ جەتىستىگى كوپ, تاجىريبەلى رەۆماتولوگتەر جۇمىس ىستەيدى, – دەيدى ول.
ءۇش جىل بۇرىن الماتىداعى دارىگەرلەر ارالدىق نۇرلان احمەتوۆكە ومىرتقاارالىق بۋىنداردىڭ زاقىمدانۋى بولاتىن بەحتەرەۆ اۋرۋىنا شالدىققانى جايلى دياگنوز قويىپتى. جۇرە كەلە ومىرتقا بولىمدەرى قوزعالعىشتىعىن تولىعىمەن جوعالتاتىن دەرتتى باسەڭدەتۋ ءۇشىن جالاعاشتىق دارىگەرلەر قاجەتتى ەم-دوم جۇرگىزىپ جاتىر.
– وسىعان دەيىن ءتۇرلى كلينيكا مەن اۋرۋحانالاردا ەم الدىم, بىراق ناتيجە بولمادى. جەرگىلىكتى مامانداردىڭ ەمىنەن كەيىن ءبىراز جاقسارىپ قالدىم. دارىگەرلەرگە جانە اۋرۋحانانىڭ مەديتسينالىق قىزمەتكەرلەرىنە ايتار العىسىم شەكسىز, – دەيدى ن.احمەتوۆ.
وتكەن جىلى اۋرۋحانادا تەگىن مەديتسينالىق كومەكتىڭ كەپىلدىك بەرىلگەن كولەمى مەن ءمامس شەڭبەرىندە بارلىق اۋرۋ ءتۇرى بويىنشا 10 مىڭنان اسا ادام ەمدەلىپ شىعىپتى.
قىزىلوردا
