جوبانىڭ باستى ارتىقشىلىعى – قۇجاتتا ءجۋرناليستىڭ قۇقىقتارى مەن مىندەتتەرى بارىنشا ناقتىلانىپ, جۋرناليست مارتەبەسى تۇڭعىش رەت بەلگىلەنگەن. جۋرناليست مارتەبەسى – وتىز جىلدان بەرى ايتىپ جۇرگەن ماسەلەمىز. جۋرناليستەردى باسقا جازعىشتاردان اجىراتاتىن «پرەسس-كارتانىڭ» ەنگىزىلۋى دە قۇپتارلىق قادام. ءباسپاسوز كارتاسى جۋرناليستىك جوعارى ءبىلىمى بار, باق-تا كەمىندە ءۇش جىل, ديپلومى جوقتارعا كەمىندە بەس جىل تاجىريبەسى بار ازاماتتارعا بەرىلەدى. بۇل ءارى قاراي جۋرناليست مارتەبەسىن يەلەنگەندەردىڭ الەۋمەتتىك جاعدايلارىن شەشۋگە ىقپال ەتسە, نۇر ۇستىنە نۇر بولار ەدى.
ارينە, مۇنداي قاعيدالار بلوگەرلەرگە, ينتەرنەت رەسۋرستاردا جۇمىس ىستەيتىندەرگە جاقپاۋى مۇمكىن. مەنىڭشە, ولارعا ارنالعان باسقا زاڭ جوباسى ازىرلەنگەنى دۇرىس.
جوبادا تاعى ءبىر اتاپ وتەتىن نارسە – مەملەكەتتىك تىلگە قاتىستى تالاپتاردىڭ كۇشەيتىلۋى. ەڭ الدىمەن مەملەكەتتىك تىلدەگى تەلە-راديو باعدارلامالارىنىڭ كولەمى باسقا تىلدەردەگى باعدارلامالاردىڭ جيىنتىق كولەمiنەن كەم بولماۋعا تيiس ەكەندىگى كورسەتىلگەن. سۋبتيتر پايدالانىلاتىن تەلەباعدارلامالار مەن فيلمدەردىڭ اۋدارماسى مەملەكەتتىك تىلدەگى تەلەباعدارلامالاردىڭ جالپى كولەمىنە كىرمەيتىندىگى دە تىلگە قاتىستى تالاپتاردى كۇشەيتە تۇسەدى.
جەكە باسىما زاڭ جوباسىنىڭ 24-بابىنداعى شەتەلدىك تەلە, راديوارنانىڭ ماتەريالدارى قازاقستان رەسپۋبليكاسىنىڭ كونستيتۋتسيالىق قۇرىلىسىن كۇشتەپ وزگەرتۋدi, تۇتاستىعىن بۇزۋدى, مەملەكەت قاۋiپسiزدiگiنە نۇقسان كەلتiرۋدi, سوعىستى, ەكسترەميزمدi نەمەسە تەرروريزمدى, قاتىگەزدiك پەن زورلىق-زومبىلىقتى ناسيحاتتايتىن بولسا, ونداي شەتەلدىك بۇقارالىق قۇرالداردى ەسەپكە قويۋدان باس تارتىلاتىنى ۇنادى.
سونداي-اق دىبىستىق سۇيەمەلدەۋدىڭ كوپ ارنالى بەرىلۋىن پايدالاناتىن تەلەارنالار نەگىزگى دىبىستىق سۇيەمەلدەۋدى مەملەكەتتىك تىلدە پايدالانۋعا ءتيىس ەكەندىگى دە مىندەتتەلگەن. جالپى العاندا, بۇل جوبا الداعى ۋاقىتتا ماسس-مەديا سالاسىنىڭ جەمىستى جۇمىس ىستەۋىنە ابدەن جاراپ تۇر.
مارات توقاشباەۆ,
جازۋشى-پۋبليتسيست
