بۇل وتباسىلاردىڭ ءبارى بۇرىن كوكتەمنەن كۇزگە دەيىن ورماننان ساڭىراۋقۇلاق, جەمىس-جيدەك, نەشە ءتۇرلى ەمدىك ءشوپ جيناپ, قىزىل قايىڭنىڭ جاپىراقتارىنان مونشا سىپىرعىسىن بۋىپ, ونى قىس بويى جول بويىندا ساتىپ ناپاقا ايىرىپ كەلگەن. الاپات ورتتەن كەيىن ۇيرەنشىكتى كاسىبىنەن ايىرىلعان تۇرعىنداردىڭ ءارى قاراي قايتىپ كۇن كورەمىز دەپ ابدىراپ قالعانى راس.
– ۇيىمىزگە قوسا, قورا-قوپسىمىز بەن ازىن-اۋلاق مالىمىز, ۇستاپ وتىرعان قۇسىمىزعا دەيىن ءورت جالماپ كەتتى. تابىسىمىزدان ايىرىلدىق. بۇعان دەيىن بەرىلگەن 5 ملن تەڭگەنىڭ ءبارىن تۇرمىستىق قاجەتىمىزگە جاراتتىق. كيىم-كەشەك, جيھاز, ىدىس-اياق ساتىپ الدىق. ءار وتباسىندا 4-5 جان بار. جىعىلعانعا جۇدىرىق دەگەننىڭ كەرىن كەلتىرىپ, ەسەپشوتىمىزعا اقشا ءتۇسىپ ءبارىمىز جاپپاي جيھاز ساتىپ الاردا كاسىپكەرلەر تاۋارلارىن قىمباتتاتىپ جىبەردى. مىسالى, بۇرىن 270 مىڭ تەڭگە تۇراتىن ديۆاندى 370 مىڭ تەڭگەگە ساتىپ الدىق, دەيدى تۇرعىندار.
كوممۋنالدىق شىعىندارىن تولەي الماعان تۇرعىندار تاياۋدا جەرگىلىكتى اكىمدىككە ورمان ورتىنەن بولعان توتەنشە جاعدايدىڭ زاردابىن جويۋ ماقساتىندا اشىلعان «قايىرىمدىلىق KZ» قورىنان قولداۋ قارجى ءبولۋدى سۇراپ ۇجىمدىق حات جولداعان. اتالعان قورعا بىلتىردان بەرى 1,3 ملرد تەڭگە كولەمىندە قارجى ءتۇسىپتى. ونىڭ شامامەن ۇشتەن ءبىرى ورماندى قايتا قالپىنا كەلتىرۋگە كەتكەن. جاڭادان سالىنعان «بىرلىك» شاعىن اۋدانىن اباتتاندىرىپ, ينفراقۇرىلىمىن جەتىلدىرۋگە 123,7 ملن تەڭگە قارجى جۇمسالعان. ال ورتتەن زارداپ شەككەن ادامدارعا ماتەريالدىق كومەك رەتىندە 355,5 ملن تەڭگە تولەنگەن.
– بۇگىنگە دەيىن 152 ادام 1 ملن تەڭگەدەن الدى. بۇل قاراجاتقا شىعىندارىن وتەۋگە ەرتەرەك ءوتىنىش جازعان تۇرعىندار يە بولدى. قازىر تاعى 27 ادامنىڭ ءوتىنىشىن قاراپ جاتىرمىز, دەدى قور وكىلى گۇلميرا قاپەنوۆا.
كوكتەمگە دەيىن كومەكتەسە تۇرۋدى سۇراعان «بىرلىك» تۇرعىندارى كۇن جىلىسىمەن جۇمىس تاۋىپ, ءوز كۇنىمىزدى ءوزىمىز كورىپ كەتەمىز دەيدى.
قوستاناي وبلىسى
