كەزدەسۋدە دەنساۋلىق ساقتاۋ جۇيەسىندەگى وزەكتى ماسەلەلەر كوتەرىلدى. اسىرەسە تۇرعىندار تاراپىنان مىندەتتى الەۋمەتتىك مەديتسينالىق ساقتاندىرۋ بويىنشا ساۋالدار ءجيى قويىلدى.
«ەلىمىزدە مەديتسينالىق ساقتاندىرىلعان ازاماتتارعا دا مەديتسينالىق قىزمەت تولىق كولەمدە كورسەتىلمەي وتىر. بۇل تۋرالى جولداۋىندا ەل پرەزيدەنتى اشىق ايتىپ, بىلىق جايلاعان سالانى قاتاڭ سىنعا العان بولاتىن. مەملەكەت باسشىسى ۇكىمەتكە ەرىكتى مەديتسينالىق ساقتاندىرۋ جۇيەسىن ەنگىزۋدى جۇكتەدى. دەسە دە, ءالى دە شيكىلىك كوپ», دەپ اعىنان جارىلدى تۇرعىندار.
«ەلەكتروندى ۇكىمەتتىڭ 1414 بايلانىس ورتالىعىنان كەڭەس العانىمدا, وپەراتور ءبىر تۇراقتى جۇمىس ورنىنان جارنا اۋدارىلسا جەتكىلىكتى دەگەن. الايدا مەدساقتاندىرۋ قورىنىڭ 1406 بايلانىس ورتالىعىنىڭ مامانى بارلىق جۇمىس ورنىڭىزدان جارنا تولەۋگە ءتيىسسىز دەدى. تۇراقتى جۇمىس ورنىمدا جۇمىس بەرۋشىم جالاقىمنان قورعا ونسىز دا قوماقتى سوما اۋدارادى. بۇعان قوسا, ليتسەنزيا الىپ, ادۆوكاتتىقتى باستاپ, ارتىنشا تاستاعانمىن, بىراق سول ءۇشىن دە اي سايىن 4 200 تەڭگەدەن اۋدارىپ تۇرۋىم كەرەك. بۇل شەكتەن شىققاندىق ەمەس پە؟ قور نەگە مەنەن اي سايىن بىرنەشە جارنا الادى؟ تەگىن مەديتسينالىق قىزمەتىن تۇتىنىپ وتىرعان جوقپىن. ويتكەنى ەمحانادا نە دارىگەر جوق, نە ونىڭ قابىلداۋىنا شۇعىل جازىلۋ قيىن. امالسىز, اقىلى كلينيكالارعا جۇگىنەمىن», دەدى تۇرعىنداردىڭ ءبىرى.
ماقسۇت ناسيبۋلوۆ مەديتسينالىق ساقتاندىرۋدىڭ قولدانىستاعى جۇيەسى تولىققاندى تيىمدىلىگىن كورسەتە الماي وتىرعانىن جاسىرمادى. سالدارىنان ازاماتتاردىڭ دا, مەملەكەتتىڭ دە دەنساۋلىق ساقتاۋ شىعىندارى توقتاۋسىز ارتىپ بارادى.
– سوزىلمالى اۋرۋعا شالدىققان تۇرعىندار كەپىلدەندىرىلگەن تەگىن ءدارى-دارمەكتى الا الماي ءجۇر. بۇل جۇيە شەندىلەردىڭ قىزىعۋشىلىعى ءۇشىن ىسكە قوسىلعانداي اسەر قالدىرادى. جوبا ءوزىن اقتادى دەپ ايتا المايمىز. بۇل جۇيە الەۋمەتتىك كەرنەۋدى كۇشەيتەتىن تەرىس فاكتورلاردىڭ كوش باسىنان ورىن الماۋى ءۇشىن احۋالدى تەز تۇزەگەن ابزال, – دەدى ماقسۇت ناسيبۋلوۆ.
