سەمينار-كەڭەستىڭ جۇمىسىنا ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ, ورتالىق سايلاۋ كوميسسياسىنىڭ مۇشەسى سابيلا مۋستافينا جانە ورتالىق سايلاۋ كوميسسياسىنىڭ بىرنەشە مۇشەسى قاتىستى. كونستانتين پەتروۆ بۇل جولعى سايلاۋ ارالاس جۇيە بويىنشا وتەتىندىگىن ەسكە سالدى. ساياسي پارتيالار دا, كانديداتتار دا وكىلەتتى ورگاندارداعى ورىن ءۇشىن باسەكەلەسەدى. ەڭ باستى ەرەكشەلىك, وڭىرلەردە ءاربىر داۋىس بەرۋشى 5 بيۋللەتەن الادى. ۋچاسكەلىك سايلاۋ كوميسسياسىنىڭ قىزمەتكەرلەرى ءاربىر سايلاۋشىعا اسىرەسە, ەگدە جاستاعى ادامدارعا قالاي داۋىس بەرۋگە بولاتىندىعىن تاپتىشتەپ تۇسىندىرۋلەرى كەرەك.
سپيكەردىڭ ايتۋىنشا, ناۋقان بارىنشا اشىق وتكىزىلەدى. سايلاۋ قورلارىن قالىپتاستىرۋ جانە ول تۋرالى اقپارات قولجەتىمدى. قازىرگى ناۋقانعا باقىلاۋشى رەتىندە اككرەديتتەلگەن ۇيىمداردىڭ وكىلدەرىنە رۇقسات ەتىلەتىندىگى جونىندە نورما ەنگىزىلدى. وسى شاقىرىلىمنان باستاپ سايلاۋشىلار دەپۋتاتتى كەرى قايتارىپ الۋ مۇمكىندىگىنە يە بولادى. ياعني حالىق سايلاعان دەپۋتات سايلاۋالدى باعدارلاماسىندا بەرگەن ۋادەسىن ورىنداماسا, ونى حالىق كەرى شاقىرىپ الۋى مۇمكىن. سايلاۋشىلاردىڭ وزدەرى دەپۋتاتتى كەرى شاقىرىپ الۋ بويىنشا ءۇش ساتىلى راسىمگە باستاماشى بولا الادى. پروتسەدۋرا وڭاي ەمەس. ايتسە دە تۇسىنىكتى. ويتكەنى حالىق قالاۋلىسى جاۋاپكەرشىلىك جۇگىن دۇرىس اتقارۋى كەرەك. بۇل رەتتە دەپۋتات جۇمىسىنىڭ ءبىرىنشى جانە سوڭعى جىلىندا كەرى قايتارىپ الۋ كوزدەلمەگەن.
ورتالىق سايلاۋ كوميسسياسى توراعاسى ورىنباسارىنىڭ ايتۋىنشا, سايلاۋ كوميسسيالارىنىڭ كاسىبي دەڭگەيى جوعارى. سپيكەر 29 سايلاۋ مانداتىنا ماجوريتارلىق نەگىزدە 435 كانديدات تىركەلگەندىگىن اتاپ ءوتتى. دەمەك ءبىر ورىنعا 15 ادامنان كەلەدى.
سەميناردىڭ العاشقى بولىمىندە قويىلعان سۇراقتارعا تۇشىمدى جاۋاپ بەرىلسە, ەكىنشى بولىمدە قاتىسۋشىلار سايلاۋ ناۋقانىنا قاتىستى بارلىق سۇراقتاردى جان-جاقتى وزدەرى ءتۇسىنۋ ءۇشىن ىسكەرلىك ويىن ۇيىمداستىردى.
اقمولا وبلىسى
