باعدارلامانىڭ سايتىندا ناقتىلانعانداي, ەندى ۇمىتكەر شەت ءتىلىن بىلەتىندىگىن راستايتىن قۇجاتتى ۇسىنۋى ءتيىس.
«ۇمىتكەرلەر ءوتىنىش بەرگەن كەزدە شەت تىلىنەن ەمتيحان تاپسىرۋ تۋرالى سەرتيفيكات ۇسىنۋى كەرەك. ماسەلەن, اعىلشىن تىلىندەگى ماگيستراتۋراعا تۇسۋشىلەر 9.0-دەن كەمىندە 6.0 ناتيجەسى بار IELTS سەرتيفيكاتىنا يە بولۋى كەرەك, TOEFL: 677-دەن PBT 498, 120-دان IBT 60, تاعىلىمدامادان وتۋگە ۇمىتكەرلەر IELTS 5.0, TOEFL: PBT-417, IBT-35, DET 75 سەرتيفيكاتتارى جارامدى بولىپ سانالادى», دەلىنگەن حابارلامادا.
«حالىقارالىق باعدارلامالار ورتالىعى» اق باسقارما توراعاسى ولجاس ساكەنوۆتىڭ ايتۋىنشا, بيىل «بولاشاق» باعدارلاماسى بويىنشا كونكۋرستىق ىرىكتەۋ ەرەجەلەرىس ءبىرشاما جەتىلدىرىلگەن.
«بۇل شارا كانديداتتاردىڭ ساپالىق قۇرامىن ارتتىرۋ ءۇشىن قابىلداندى. «بولاشاق» باعدارلاماسى بويىنشا ۇمىتكەرلەر شەت ءتىلىن ءبىلۋدىڭ جوعارى دەڭگەيىن راستاۋى ءتيىس», دەدى ول.
2020 جىلدان باستاپ «بولاشاق» ستيپەندياسىن تاعايىنداۋ كونكۋرسىنا كۆوتالىق ساناتتاعى كانديداتتاردى قوسپاعاندا, جەتەكشى شەتەلدىك جوعارى وقۋ ورىندارىنان شارتسىز شاقىرۋى بار ۇمىتكەرلەر عانا قاتىسا الادى. سونداي-اق ۆ1 جانە ودان جوعارى دەڭگەيى بار قازتەست مەملەكەتتىك ءتىل بويىنشا ەمتيحان تاپسىرۋ تۋرالى سەرتيفيكاتتىڭ بولۋى مىندەتتى.
2023 جىلى «بولاشاق» باعدارلاماسى بويىنشا 555 ستيپەنديا ءبولىندى. ونىڭ ىشىندە 395 ستيپەنديا ماگيستراتۋرا/رەزيدەنتۋرا, 50 – دوكتورانتۋرا, 110 ستيپەنديا – تاعىلىمدامادان ءوتۋ باعدارلامالارىنا تيەسىلى.
بۇگىندە قۇجاتتاردى قابىلداۋ جانە كونكۋرستىق ىرىكتەۋ پروتسەسى تولىعىمەن اۆتوماتتاندىرىلعان. بۇل حالىقارالىق ستيپەنديا تاعايىنداۋدىڭ اشىقتىعىن قامتاماسىز ەتتى.
