ءتورت كۇن بويى وفيتسەرلەر مەن كەلىسىمشارت اسكەري قىزمەتشىلەرى تەوريادا جانە ءىس جۇزىندە ءارتۇرلى ماقساتتاعى راديورەلەلىك جەلىلەر مەن بايلانىس ارنالارىن ۇيىمداستىرۋعا ارنالعان «بۇركىت» ر-409متس ستانساسىنىڭ تاكتيكالىق-تەحنيكالىق سيپاتتامالارىن زەردەلەدى. ال بۇل بايلانىس ماشينالارى قارۋلى كۇشتەرگە 2023 جىلدىڭ قاڭتارىندا اكەلىنگەن ەدى. مامانداردىڭ ايتۋىنشا, بۇعان دەيىن بايلانىستى راديورەلەلىك ستانسالاردىڭ كومەگىمەن قامتاماسىز ەتىلىپ كەلگەن. ەندى بايلانىسشىلار تسيفرلىق جابدىقتارمەن جۇمىس ىستەيدى.
– جاڭا تسيفرلىق ستانسا دەرەكتەردى 40 شاقىرىمعا دەيىنگى قاشىقتىققا جىبەرۋ مۇمكىندىگىنە يە. ونىڭ وتكىزۋ قابىلەتتىلىگى شەگى بويىنشا E1 جانە Ethernet اعىندارىنىڭ ترافيگىن يكەمدەپ, قايتا ءبولۋ مۇمكىندىگى بار. «بۇركىت» ر-409متس قۇرالىنىڭ باستى ارتىقشىلىقتارىنىڭ ءبىرى – بەينەكونفەرەنتسيا بايلانىسىن ۇيىمداستىرۋ, سونداي-اق ونىڭ پارامەترلەرىن دەربەس كومپيۋتەر ارقىلى باقىلاۋ جانە باسقارۋ مۇمكىندىگى بار, – دەدى ستانسانىڭ قىزمەتى جايلى دەسانتتىق-شابۋىلداۋ اسكەرلەرى 16194 اسكەري ءبولىمى بايلانىس باتالونىنىڭ كومانديرى, پودپولكوۆنيك ۆيكتور سەنچيلوۆ.
ەندى «بۇركىت» ر-409متس تسيفرلىق راديورەلەلىك ستانسالارى بيىل ناۋرىز ايىندا وتەتىن «باتىل تويتارىس» وقۋ-جاتتىعۋىندا ءىس جۇزىندە قولدانىلادى. وقۋ-جاتتىعۋ بارىسىندا بايلانىسشىلار سونداي-اق بايلانىستى ۇيىمداستىرۋدىڭ جاڭا ۇلگىلەرىن دە سىناپ كورمەك.
ايتپاقشى, دەسانتتىق-شابۋىلداۋ اسكەرلەرىنىڭ جىل سايىنعى دايىندىعى شەڭبەرىندە 16194 اسكەري بولىمىندە راديوتەلەگرافشىلاردىڭ جيىنى وتكىزىلىپ وتىرادى. مۇندا كەلىسىمشارت بويىنشا اسكەري قىزمەتشىلەردى مورزە الىپپەسىنىڭ كومەگىمەن اقپارات بەرۋ ءۇشىن كلاسسيكالىق تەلەگراف كودىمەن جۇمىس ىستەۋگە ۇيرەتەدى. بايلانىس اسكەرلەرىن جاڭا, جوعارى تەحنولوگيالىق ماشينالارمەن جانە قۇرالدارمەن جابدىقتاعانىنا قاراماستان مورزە كودىن قولدانا وتىرىپ, راديوبايلانىس ارقىلى اقپارات بەرۋ ءالى دە وزەكتىلىگىن جوعالتقان جوق. كەرىسىنشە, قازىرگى اسكەري قاقتىعىستاردا تاكتيكالىق بايلانىستا اسكەرلەردى باسقارۋ كەزىندە وعان باسىمدىق بەرىلەدى.
– «مورزە» شۋعا توزىمدىلىگىمەن ەرەكشەلەنەدى. ونى باسەڭدەتۋ وتە قيىن. اقپاراتتى سيمۆولدىق كودتاۋ ارقىلى بەرۋ جانە قابىلداۋ ءارتۇرلى جىلدامدىقتا جۇرەدى. ورتا بىلىكتى راديو وپەراتورى مينۋتىنا 60-100 تاڭبا دياپازونىندا جۇمىس ىستەيدى, تاجىريبەلى مامانداردىڭ جىلدامدىعى 300 تاڭبادان اسادى, – دەيدى ءداستۇرلى بايلانىس ءتۇرىنىڭ ەرەكشەلىكتەرى تۋرالى كۋرس وقىتۋشىسى, زاپاستاعى مايور يدريس گيمۋرانوۆ.
«راديوبايلانىستىڭ ءموبيلدى, سپۋتنيكتىك, تسيفرلىق جانە اقپاراتتى بەرۋدىڭ باسقا ادىستەرىنەن ارتىقشىلىعى ەڭ الدىمەن قوسىمشا ينفراقۇرىلىمعا قاجەتتىلىكتىڭ بولماۋىندا», دەيدى نۇسقاۋشى. وزىمەن بىرگە ءپورتاتيۆتى ستانساسى بار راديو وپەراتورى عانا بىرنەشە ءجۇز شاقىرىم قاشىقتىقتا بايلانىس ورناتا الادى.
ال ءبىر ايلىق ساباقتا كەلىسىمشارت بويىنشا كەلگەن اسكەري قىزمەتشىلەر مورزە كودىن باسىنان ۇيرەنۋدى, سانداردى ارىپتەرگە اينالدىرۋدى جانە كەرىسىنشە, وزگەرمەلى ورتاعا جەدەل ارەكەت ەتۋ داعدىلارىن ۇيرەنەدى.
– راديو وپەراتوردا مۋزىكالىق قابىلەت, ىرعاقتى سەزۋى, جىلدام رەاكتسيا قابىلداۋى, اقپاراتتى تالداۋ مۇمكىندىگى بولۋعا ءتيىس. ول ۇزاق نەمەسە سىزىقشا جانە قىسقا نەمەسە نۇكتە سيگنالدارىنىڭ دىبىسىن ناقتى اجىراتا ءبىلۋى, تاباندى جانە مۇقيات بولۋى كەرەك, – دەدى راديو وپەراتورىنا قويىلاتىن تالاپتار تۋرالى ويىن ورتاعا سالعان دەسانتتىق-شابۋىلداۋ اسكەرى 32363 اسكەري ءبولىمىنىڭ اسكەري قىزمەتشىسى, گۆارديا سەرجانتى عابيت مۇقانوۆ.
ارينە, مۇنداي قابىلەت كەز كەلگەننىڭ بويىنان تابىلا بەرمەيدى. سوندىقتان دا وقۋعا 30 ۇمىتكەردىڭ ىشىنەن مۇقيات ىرىكتەلگەن ون ءتورت ادام قابىلدانىپتى. وقۋ كۋرسىن اياقتاعاننان كەيىن بارلىق اسكەري قىزمەتشىلەر ءوز بولىمشەلەرىندە راديوتەلەگراف لاۋازىمدارىنا تاعايىندالادى ەكەن.
