اليمەنت تولەدىڭ بە, ازامات!

ورال قالاسىنداعى «اتريۋم» ساۋدا جانە ويىن-ساۋىق كەشەنىنىڭ الدىندا «اليمەنت تولەدىڭ بە, ازامات!» اتتى شارا ءوتتى. باتىس قازاقستان وبلىستىق سوت اكتىلەرىن ورىنداۋ دەپارتامەنتى مەن قالالىق پروكۋراتۋرا بىرىگىپ ۇيىمداستىرعان وسىناۋ شاراعا «بقو ستۋدەنتتەر اليانسىنىڭ» ەرىكتىلەرى دە جۇمىلا اتسالىستى. شارانىڭ ماقساتى – اليمەنت تولەۋدەن جالتارىپ جۇرگەن «اكەلەردىڭ» تۋعان بالالارىنا دەگەن جاناشىرلىق سەزىمدەرىن وياتۋ, ولاردى قۇقىقتىق جاۋاپ­كەرشى­لىككە شاقىرۋ, قوعامنىڭ وسى ماسەلەگە نازارىن اۋدارۋ. – جىل باسىنان بەرى وبلىس­تىق سوت اكتىلەرىن ورىنداۋ دەپار­تامەنتىندە 6486 اليمەنت ءوندىرۋ فاكتىسى تىركەلگەن. وكىنىشكە قاراي, پەرزەنتتەرىنە بەرەشەك اكەلەردىڭ جارتىسىنان كوبى جاۋاپكەرشىلىكتەن جالتارىپ, قاشىپ ءجۇر. سوعان سايكەس دەپارتامەنتتە ءتۇرلى شارا­لار قولعا الىنۋدا, – دەيدى اليمەنت تولەمدەرىن ءوندىرۋ ءبولىمى­نىڭ باس­شىسى سۆەتلانا فيگلوۆسكايا. جۇرگىزىلگەن ءتيىستى شارالار­دىڭ ناتيجەسىندە جىل باسىنان بەرى 35 ازامات اكىمشىلىك جاۋاپكەرشىلىككە تارتىلعان. ونىڭ 9-ى بەس تاۋلىككە اكىمشىلىك قاماۋعا الىنسا, 12-سىنە ايىپپۇل سالىنعان. سونداي-اق, مەكەن-تۇراعى بەلگىسىز 16 قاشقىن اكەگە ىزدەۋ جاريالانىپ, 7 ادامنىڭ اۆتوكولىك جۇرگىزۋ قۇقىعىنا شەكتەۋ قويىلعان. مۇنىڭ سىرتىندا بيىلعى جىلدىڭ بەس ايى ىشىندە سوت شەشىمىن ورىنداماعان 870 ازاماتقا ەلىمىز اۋماعىنان سىرت جەرگە شىعۋعا شەكتەۋ قويىلدى. فاتيحوللا ماشتاحوۆ, بقو سوت اكتىلەرىن ورىنداۋ دەپارتامەنتىنىڭ قىزمەتكەرى.