باياعىدا بەلتەمىرگە اسىلعان اعاش قويان بولۋشى ەدى. ويىنشىق تۋرنيكتى ۇستاپ ەكى جاعىنان قىسساڭ, الگى قويان نەشە ءتۇرلى ونەر كورسەتەتىن. بالا كەزىمىزدە تالاي قىزىقتادىق, بىراق بىزدەن كەيىنگى بالالار مۇنداي ويىنشىقتى كورمەي ءوستى. يگوردىڭ قولىنان شىققان وسى ويىنشىق بالالىق شاقتىڭ بال كۇندەرىن ەسكە ءتۇسىرىپ, كوزگە ەرەكشە ىستىق كورىنەدى.
قولونەر شەبەرى جاساعان كۇشىك مۇسىندەرى ۇيالى تەلەفون قويۋعا ارنالعان. كومپيۋتەردە جۇمىس ىستەپ وتىرساڭىز, تەلەفونىڭىزدى تىكەسىنەن قىستىرا سالۋعا ىڭعايلى. ەسەسىنە, وزىڭىزگە ءتۇسىپ جاتقان حابارلامالاردىڭ ءبارىن كوز قيىعىمەن قالت جىبەرمەي كورىپ وتىراسىز.
– كىشكەنتاي كەزىمدە اكەم ءارتۇرلى اعاش ويىنشىقتار جاسايتىن. مەن ۇنەمى جانىنان شىقپايتىنمىن. كەيىن ەسەيە كەلە ءوزىم دە اعاش جونىپ, ۇساق-تۇيەك تۇرمىستىق زاتتار مەن ويىنشىقتار جاساي باستادىم. اعاش ويىپ, قولونەر بۇيىمدارىن جاساعاندى جانىم جاقسى كورەدى. بالا كەزدەن سۇيەككە سىڭگەن نارسە عوي, ساۋساقتارىمنىڭ جوقتىعى ەش كەدەرگى ەمەس. ەڭ باستىسى زەيىن قويۋ كەرەك. اعاش تابۋ قيىن. كوبىنە قاراعايدان جاسايمىن. لاك, بوياۋ سياقتى كەرەكتەردى ءوزىم ساتىپ الامىن. ەلەكتر لوبزيگىم, قولارا, قاشاۋىم بار, سول جەتىپ جاتىر, – دەيدى شەبەر.
وسى ۋاقىتقا دەيىن شەبەردىڭ قولىنان شىققان قولونەر تۋىندىلارىندا سان جوق. ول دۇنيەلەردىڭ دەنى سىيلىق رەتىندە اركىمنىڭ قولىندا كەتىپتى.
اراگىدىك بىرەۋدىڭ تۋعان كۇنى بولعاندا نەمەسە ءارتۇرلى قۋانىشتارعا وراي, جەكە ازاماتتاردان, كەيبىر مەكەمە ۇجىمدارىنان تاپسىرىس ءتۇسىپ قالادى ەكەن. شەبەر سۇراعاندارىن جاساپ بەرەدى. بىراق بالەنباي تەڭگە دەپ اقشا سۇراپ, ەڭبەگىن بۇلدامايدى, بەرگەنىن عانا الادى.
يگور كەيدە ورتالىق ۇيىمداستىراتىن جارمەڭكەلەرگە شىعىپ تۇرادى. وندا دا ۇناتقان ادامعا ويىنشىعىن ساتپاي, سىيلاي سالادى ەكەن.
قوستاناي وبلىسى
