TRT Haber تەلەارناسىنىڭ حابارلاۋىنشا, حاتاي ورتالىعىنداعى جەر سىلكىنىسى بولعان جەردە ىزدەۋ-قۇتقارۋ جۇمىستارى جۇرگىزىلىپ جاتىر.
«بىرەۋى انتاكيادان, بىرەۋى دەفنەدەن جانە بىرەۋى سامانداگتان − ءۇش ازاماتىمىز قايتىس بولىپ, 213 ادام اۋرۋحاناعا جونەلتىلدى», دەدى ىشكى ىستەر ءمينيسترى سۇلەيمان سويلۋ.
اپاتتار جانە توتەنشە جاعدايلاردى باسقارۋ اگەنتتىگى (AFAD) تەڭىز دەڭگەيىنىڭ 50 سانتيمەترگە كوتەرىلۋ قاۋپىنە بايلانىستى ازاماتتارعا جاعالاۋ سىزىعىنان اۋلاق بولۋعا كەڭەس بەردى. سونىمەن قاتار حاتاي پروۆينتسياسىنداعى بۇگىنگى جەر سىلكىنىسىنەن كەيىن جاريالانعان تەڭىز دەڭگەيىنىڭ كوتەرىلۋى تۋرالى ەسكەرتۋدىڭ جويىلعانىن حابارلادى.
Anadolu اگەنتتىگىنىڭ حابارلاۋىنشا, يسكەندەرۋن قالاسىندا ءۇش قاباتتى بوس عيمارات وپىرىلىپ قۇلاعان.
تۇرىك اۋە جولدارى باس ديرەكتورى بيلال ەكشي حاتاي اۋەجايىندا ەۆاكۋاتسيا رەيستەرىنىڭ جالعاسىپ جاتقانىن حابارلادى.
ايتا كەتەيىك, كەشە تۇركيادا جاڭا جەر سىلكىنىسى بولدى. ماگنيتۋداسى 6,4 بولاتىن ءبىرىنشى ءدۇمپۋ جەرگىلىكتى ۋاقىت بويىنشا 20:04-تە, ەكىنشىسى - 5,8 ماگنيتۋدالى ءزىلزالا 20:07-دە تىركەلدى. جەر سىلكىنىسىنىڭ وشاقتارى سايكەسىنشە دەفنە جانە سامانداگ ايماقتارىندا بولدى. ءبىرىنشى جەر سىلكىنىسىنىڭ وشاعى − 16,7 كم, ەكىنشىسى 7 كم تەرەڭدىكتە ورنالاسقان.
