جاقىندا ونىڭ سونداي ۇلگىدە سالىنعان «مۇنار كۇن» كارتيناسى لوندون قالاسىندا وتكەن «التىن تالانتتار ۋاقىتى» حالىقارالىق بايقاۋىنىڭ ءبىرىنشى جۇلدەسىن يەلەندى. ونلاين فورماتتا وتكەن بايقاۋعا الەمنىڭ 39 ەلىنەن 200-گە جۋىق ۇمىتكەر قاتىسقان.
– حالىقارالىق بايقاۋدىڭ جارناماسىن الەۋمەتتىك جەلىدەن كورگەن ەدىم. بىلتىرعى قاراشادا بىرنەشە كارتينانىڭ اراسىنان بىرەۋىن تاڭداپ, باعىمدى سىناپ كورۋ ءۇشىن جىبەردىم. بۇل بايقاۋ 2007 جىلدان بەرى تۇراقتى ءوتىپ كەلەدى, – دەيدى نازەركە يششانوۆا.
ول 1836-1838 جىلدارداعى حالىق-ازاتتىق كوتەرىلىسىنىڭ كوسەمى يساتاي تايمان ۇلىنىڭ تۋعانىنا 230 جىل تولۋىنا وراي دايىندالعان «اسقاق رۋح» كىتابىنىڭ بەتتەۋشى-ديزاينەرى بولعان. سول كەزدە تاريحشى عالىمدار مەن ولكەتانۋشىلاردىڭ زەرتتەۋ ەڭبەكتەرىمەن جەتە تانىسقان. كەيىن باتىر ماحامبەت وتەمىس ۇلى مەن اقىن ىعىلمان شورەك ۇلىنىڭ يساتاي تۋرالى جىرلارىن قىزىعا وقىپتى. سول كەزدە قيالىندا باتىردىڭ كەسەك تۇلعاسى قالىپتاسا باستاعان.
– قازاق دەگەن ۇلى حالىقتىڭ شىنايى عۇمىرداستانى ءالى جازىلىپ بىتكەن جوق. تالاي جىل, تالاي عاسىر بويى ۇلتىمىزدىڭ عۇمىرداستانى جازىلا بەرەدى. سوندىقتان بۇل كارتينامدى ازاتتىقتىڭ اق تاڭىن اڭساپ كۇتكەن, ولشەۋلى ءومىرى ات ۇستىندە جورىقپەن وتكەن ۇلى دالا باتىرى يساتاي تايمان ۇلىنىڭ اسقاق رۋحىنا ارناعان ەدىم, – دەيدى ديزاينەر ن.يششانوۆا.
قازىر ديزاينەر «قىر بالاسى» قوعامدىق قورىنىڭ مۇشەلەرىمەن بىرگە ەل تاۋەلسىزدىگى ءۇشىن قانىن توگىپ, جانىن بەرگەن ۇلت باتىرلارى مەن قۋعىن-سۇرگىنگە ۇشىراعان الاش ارىستارىنىڭ ءومىرىن, ەڭبەگىن زەرتتەپ ءجۇر. ونىڭ جەكە قورىندا ۇلت زيالىلارى, باتىرلار مەن ارىستارى بەينەلەنگەن 50-دەن استام كارتينا بار. كارتينانىڭ ءبارى Digital Art ستيلىندە سالىنعان.
اتىراۋ وبلىسى
