سايلاۋ ناۋقانى 18 اقپاندا ساعات 18:00-دە باستالىپ, 18 ناۋرىزدا ساعات 00:00-گە دەيىن جالعاسادى.
ۇگىت-ناسيحاتقا شارتتىق نەگىزدە قاتىسقىسى كەلەتىن ونلاين-پلاتفورمالاردى پايدالانۋشىلار سايلاۋ كوميسسيالارىنا ۇگىت ماتەريالدارىن ورنالاستىرۋ شارتتارى مەن تولەم مولشەرى تۋرالى مالىمەتتەردى ۇسىنۋى ءتيىس. اقپارات ۇگىت-ناسيحات جۇمىستارى باستالعانعا دەيىن 5 كۇننەن كەشىكتىرىلمەي, ياعني 14 اقپانعا دەيىن ۇسىنىلۋى ءتيىس.
مەرزىمىندە مالىمەت بەرگەن پايدالانۋشىلار ۇگىت ماتەريالدارىن ورنالاستىرۋعا جانە كانديداتتاردىڭ سايلاۋ قورلارىنان تولەم الۋعا قۇقىلى.
14 اقپانعا دەيىن وسك-دا 465 باق پەن ونلاين-پلاتفورمالاردىڭ 40 پايدالانۋشىسى, اۋماقتىق سايلاۋ كوميسسيالارىنا - 2115 باق جانە ونلاين-پلاتفورمالاردىڭ 55 پايدالانۋشىسى تولەم مولشەرى, ەفير مەن باسپا الاڭدارىن ۇسىنۋ شارتتارى تۋرالى مالىمەتتەر ۇسىنىلدى.
ەندى داۋىس بەرۋ كۇنى ۋچاسكەلەردە ءاربىر باق-تان ءبىر وكىل جانە قىزمەتتىك كۋالىگى مەن رەداكتسيالىق تاپسىرماسى بولعان كەزدە ءاربىر تەلەارنادان 3 وكىلدەن ارتىق ەمەس قاتىسا الادى.
ورتالىق سايلاۋ كوميسسياسىندا ساياسي پارتيالاردىڭ وكىلدەرى داۋىس بەرۋگە ارنالعان بيۋللەتەندەردە پارتيالاردىڭ اتاۋلارىن كورسەتۋ ءتارتىبىن ايقىنداۋ ءۇشىن جەرەبە تارتۋ ءراسىمىن وتكىزدى.
ەسكە سالا كەتسەك, ءماجىلىس پەن بارلىق دەڭگەيدەگى ماسليحاتتارعا سايلاۋ 19 ناۋرىزدا وتەدى.
