كاسىپورىننىڭ قوعاممەن بايلانىس ءبولىمى ءمالىم ەتكەندەي, 1 اقپاندا رەگەنەراتورلاردا تەمپەراتۋرا كوتەرىلىپ كەتكەن. سونىڭ سالدارىنان كاتاليتيكالىق كرەكينگ قوندىرعىنىڭ جۇمىسى توقتاتىلعان.
«ماماندار اقاۋلاردى انىقتاعان سوڭ, «قازمۇنايگاز» اق» ۇك» باسقارما توراعاسى ماعزۇم مىرزاعاليەۆتىڭ تاپسىرماسىمەن قوندىرعىنىڭ جۇمىسىن قالپىنا كەلتىرۋ ءۇشىن جەدەل شتاب قۇرىلدى. باسقارما توراعاسىنىڭ مۇناي وڭدەۋ جانە مۇناي حيمياسى جونىندەگى ورىنباسارى ارمان قايردەنوۆ جەتەكشىلىك ەتەتىن جەدەل شتاب كاتاليتيكالىق كرەكينگ قوندىرعىسىن جوندەۋ-قالپىنا كەلتىرۋ جۇمىستارىن قاداعالاۋعا الدى», دەپ حابارلادى زاۋىتتىڭ قوعاممەن بايلانىس ءبولىمى.
قوندىرعىداعى اقاۋدى جويىپ, قالپىنا كەلتىرۋ جوسپارى ازىرلەنگەن. الدىمەن رەاكتورلى-رەگەنەراتورلىق قوندىرعى تولىق تەكسەرىلەدى. ءسويتىپ, مۇناي ونىمدەرىن شىعارۋ ۇدەرىسىنە اسەرىن باعالاۋ جۇرگىزىلەدى. سول سەبەپتەن, جوندەۋ-قالپىنا كەلتىرۋ جۇمىستارىنا كاتاليتيكالىق كرەكينگ ۇدەرىسىنىڭ ليتسەنزيارى – Axens كومپانياسىنىڭ ماماندارى دا تارتىلعان. ليتسەنزيار جۇرگىزگەن تەكسەرۋدىڭ ناتيجەسىنە سايكەس جوندەۋ-قالپىنا كەلتىرۋ جۇمىستارى 18 اقپاندا اياقتالماق. ال قوندىرعىنى ىسكە قوسۋ جۇمىستارى 18-22 اقپان ارالىعىندا جۇرگىزىلەدى. كاتاليتيكالىق كرەكينگ قوندىرعىسى تولىق جۇمىس رەجىمىنە 23 اقپاندا قوسىلاتىنى جوسپارلانىپ وتىر.
وسىعان بايلانىستى «قازمۇنايگاز» اق» ۇك» باسقارما توراعاسى ماعزۇم مىرزاعاليەۆ زاۋىت باسشىلىعىمەن كەڭەس وتكىزدى. كەڭەس كەزىندە كاسىپورىن باس ديرەكتورىنىڭ ءبىرىنشى ورىنباسارى راحىمجان جانعابىلوۆ قىزمەتىنەن بوساتىلدى. كەيىن ول كاسىپورىننىڭ دەپارتامەنت باسشىلىعىنا ورالدى. ال زاۋىتتىڭ باس ديرەكتورى مۇرات دوسمۇراتوۆقا قاتاڭ سوگىس بەرىلدى.
اتىراۋ وبلىسى
