مادەنيەت جانە سپورت مينيسترلىگى تۋريزم كوميتەتىنىڭ تىڭعىلىقتى جۇمىسىنىڭ ناتيجەسىندە اشىلعان جاڭا اۋە باعىتتارى ەلىمىزگە شەتەلدىك تۋريستەردىڭ كوپتەپ كەلۋىنە دە وڭ اسەر ەتىپ وتىر. مىسالى, وتكەن جىلى قازاقستانعا كەلگەن شەتەلدىك تۋريستەر سانى الدىڭعى جىلمەن سالىستىرعاندا 3 ەسەگە ارتتى. بۇل باعىتتاعى جۇمىستاردى ىلگەرىلەتىپ, اۋە باعىتتارىنىڭ قاتارىن تاعى ارتتىرۋ قاراستىرىلىپ جاتىر.
«قازىر تۋريزم كوميتەتى جاڭا اۋە باعىتتارىن اشۋ بويىنشا جۇمىس ىستەپ جاتىر. ۇيىمداستىرۋ شارالارى اياقتالعان كەزدە ءبىز جۇرتشىلىقتى حاباردار ەتەمىز. تىكەلەي رەيستەردىڭ اشىلۋى ەلىمىزدىڭ تۋريستىك تارتىمدىلىعىن ارتتىراتىنى ءسوزسىز. مىسالى, بىلتىر اتىراۋ وبلىسىنا بارعان تۋريستەر سانى 3,5 ەسە وسكەن. بۇل ءوڭىردىڭ ترانزيتتىك الەۋەتىنە دە بايلانىستى. قازاقستانعا كەلگەن ءاربىر ءتورتىنشى تۋريست الماتى قالاسىنا بارادى. 2022 جىلى الاتاۋ باۋرايىنداعى شاھار 1,2 ملن اسا تۋريست قابىلداعان. بۇل – رەكوردتىق كورسەتكىش. ەلىمىزدەگى تاۋ شاڭعىسى كۋرورتتارىنا كەلگەن تۋريستەر سانى 1,5 ملن-عا دەيىن جەتتى. جىل سايىنعى ءوسىم 20%-دى قۇرادى. ەلىمىزدەگى تاۋ شاڭعىسى تۋريستەرىنىڭ سانى جاعاجاي تۋريستەرىنىڭ سانىمەن تەڭەستى», دەپ اتاپ ءوتتى مادەنيەت جانە سپورت ۆيتسە-ءمينيسترى ەرجان ەركىنباەۆ.
