«بۇگىن ريددەر جىلۋ ەلەكتر ورتالىعىنىڭ جاڭا ينۆەستورلارىمەن كەزدەسۋ وتكىزدىم. بىردەن ايتا كەتەيىن, ون كۇن ىشىندە جىلۋ ورتالىعىنىڭ جاڭا يەلەرى جوندەۋ جۇمىستارىنىڭ تولىق كەستەسىن ۇسىنۋمەن قاتار قاجەتتى جابدىقتار مەن كومپونەنتتەردىڭ, مامانداردىڭ ءتىزىمى مەن سانىن كورسەتۋى قاجەت. ءتورتىنشى جانە بەسىنشى قازاندىقتارعا, كومىر بەرۋدىڭ رەزەرۆتىك تراكتىسىنە, ورتتەن زارداپ شەككەن ورتالىق عيماراتىنىڭ وزىنە ەرەكشە نازار اۋدارۋى شارت. بارلىق جابدىقتار مەن جەلىلەر كۇردەلى جوندەۋدى قاجەت ەتەدى, سوندىقتان كەستە وسى ماسەلەلەردىڭ بۇكىل بلوگىن قامتىعانى دۇرىس», دەپ جازدى ءوڭىر اكىمى.
دانيال احمەتوۆتىڭ ايتۋىنشا, ستانتسيا قىزمەتكەرلەرىنىڭ قاۋىپسىز ەڭبەك جاعدايلارىنا دا باسا نازار اۋدارۋ ماڭىزدى, ول ءۇشىن اسپيراتسيا جانە جەلدەتۋ جۇيەلەرىن جوندەۋ كەرەك.
«جوندەۋ جۇمىستارىنان باسقا قاراجىرا كومىر كەنىشى الدىنداعى دەبيتورلىق بەرەشەكتى وتەۋ كەستەسىن جاساۋدى دا ەستەن شىعارماعان ءجون», دەپ قوستى دانيال احمەتوۆ.
بۇل رەتتە ول ريددەر قالاسىنىڭ بارلىق تۇرعىندارىنا العىس ايتتى.
«ريددەر قالاسىنىڭ بارلىق تۇرعىندارىنا ۇلكەن العىس ايتامىن. قيىن جاعدايدا دۇربەلەڭگە سالىنباي, جوعارى تۇسىنىستىك تانىتتى. ريددەر قالاسى اكىمىنە جىلۋ ەلەكتر ورتالىعى توقتاۋسىز ىستەپ تۇرۋىنا بايلانىستى جەرگىلىكتى اۋقىمداعى تەحنوگەندىك سيپاتتاعى توتەنشە جاعداي رەجيمىن الىپ تاستاۋعا تاپسىرما بەردىم», دەپ قورىتىندىلادى شقو اكىمى.
