زاڭدى ساۋدا جانە ينتەگراتسيا ءمينيسترى سەرىك جۇمانعارين تانىستىردى.
ونىڭ ايتۋىنشا, زاڭ جوباسى ەۋرازيالىق ەكونوميكالىق وداق تۋرالى شارتتىڭ 55-بابىن ىسكە اسىرۋ ءۇشىن ازىرلەنگەن جانە مۇشە مەملەكەتتەردىڭ ءۇشىنشى ەلدەرمەن ەۋرازيالىق ەكونوميكالىق وداقتىڭ تەحنيكالىق رەگلامەنتتەرىن تەحنيكالىق رەتتەۋ وبەكتىسى بولىپ تابىلاتىن ونىمدەرمەن ءوزارا ساۋداسىنداعى تەحنيكالىق كەدەرگىلەردى جويۋ ءتارتىبى مەن شارتتارىن ايقىندايدى.
مينيستر بۇگىنگى تاڭدا 52 تەحنيكالىق رەگلامەنت قابىلدانعانىن, ونىڭ 45-ءى كۇشىنە ەنگەنىن اتاپ ءوتتى.
«كەلىسىمدى قابىلداۋ وداق پەن ءۇشىنشى ەلدەر اۋماعىندا بەلگىلەنگەن مىندەتتى تالاپتاردىڭ سالىستىرمالىلىعىن انىقتاۋ نەگىزىندە سايكەستىكتى باعالاۋ ناتيجەلەرىن ءوزارا تانۋعا جاعداي جاسايدى», دەدى سەرىك جۇمانعارين.
سەناتتىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتى ۇسىنعان قورىتىندىدا كەلىسىمگە سايكەس وداقتىڭ وسىنداي ەلدەرمەن حالىقارالىق شارتتار جاساسۋى ارقىلى جۇزەگە اسىراتىن ءۇشىنشى ەلدەرمەن ءوزارا ساۋداداعى تەحنيكالىق كەدەرگىلەردى جويۋ كوزدەلەتىنى جازىلعان.
سەناتور ءلاززات رىسبەكوۆا كەلىسىم ەاەو-عا مۇشە مەملەكەتتەر مەن ءۇشىنشى ەلدەر مەن نەگىزگى ينتەگراتسيالىق بىرلەستىكتەر اراسىندا مۇددەلەر تەڭگەرىمىن ساقتاي وتىرىپ, ساۋداداعى تەحنيكالىق كەدەرگىلەردى ءوزارا جويۋدىڭ دامىعان تەتىكتەرى مەن شارتتارىنىڭ بولۋى ارقىلى ءوزارا ءتيىمدى ىنتىماقتاستىقتى قۇرۋعا كومەكتەسەتىنىنە سەنىمدى.
