2022 جىل كىم-كىمگە دە وڭاي تيگەن جوق, بىراق قىسپاقتىڭ دا قايىرى بار. نارىقتاعى ەڭ ءىرى بانكتەر سانالاتىن – رەسەيلىك ەنشىلەس قارجى ينستيتۋتتارىنىڭ باسىنان باق تايۋى – ولاردان دەپوزيتتىڭ «قاشۋىنا» اكەلىپ سوقتى. تيىسىنشە, سالىمشىلار ءوز قاراجاتىن بىرقاتار قازاقستاندىق بانك شوتىنا اۋىستىرىپ, ءبىراز بانك سونىڭ ارقاسىندا كۇيلى, قۋاتتى بولىپ قالدى. رەسەيلىك بانكتەر نارىقتان ىعىسا باستاعان كەزدە تۋىنداعان دۇربەلەڭ تەز باسىلىپ, سەكتور قاتىسۋشىلارى لەزدە ءوز ارناسىنا ءتۇسىپ ۇلگەردى.
بىلتىردان بەرى بانكتەردەگى دەپوزيت پورتفەلى ءبىرشاما كەڭەيگەن. ناقتىلاعاندا, 2022 جىلدىڭ قاڭتارىمەن سالىستىرعاندا 21,5 پايىزعا ءوسىپ, 31,6 ترلن تەڭگەگە جەتتى. كليەنتتەردىڭ سەگمەنتتەرى تۇرعىسىندا زاڭدى تۇلعالاردىڭ دەپوزيتى 16,7 پايىزعا ءوسىپ, 14,7 ترلن تەڭگەگە, جەكە تۇلعالاردىڭ دەپوزيتتەرى 26 پايىزعا ءوسىپ, 16,9 ترلن تەڭگەگە تولىققان.
ەلدەگى ەڭ ءىرى بانكتەر اراسىندا دەپوزيتتەردىڭ جىلدىق ءوسىمىنىڭ ءابسوليۋتتى كوشباسشىسى – «Bank RBK»: بىردەن 78,2 پايىزعا كوبەيگەن. پورتفەلىندەگى سالىم كولەمى – 1,35 ترلن تەڭگە. قارجى ينستيتۋتى كورپوراتيۆتىك سەگمەنتتە دە (2,2 ەسە ءوسىپ, 887 ملرد تەڭگەگە جەتتى), بولشەك سەگمەنتتە دە (33,1 پايىزعا كوبەيىپ, 462,4 ملرد تەڭگەگە جەتتى) ايتارلىقتاي ءوسىم كورسەتتى. بۇل بانكتە بيزنەس پەن جەكە تۇلعاعا ارنالعان كوپتەگەن ءونىم بار. جەكە تۇلعالارعا ارنالعان مولشەرلەمەسى جوعارى دەپوزيتتى, سونىڭ ىشىندە «Safe» جيناقتاۋ دەپوزيتىن (جتسم – ورنالاستىرۋ مەرزىمىنە بايلانىستى 16%-عا دەيىن) اتاپ وتۋگە بولادى.
جىلدىق ءوسىمى بويىنشا ەكىنشى ورىندا «ەۋرازيالىق بانك»: 68,8 پايىزعا كوبەيىپ, 1,88 ترلن تەڭگەگە جەتتى. زاڭدى تۇلعالار سەگمەنتىندە قارجى ينستيتۋتىنداعى دەپوزيت ءبىر جىلدا 61,8 پايىزعا ارتسا, جەكە تۇلعالار سەگمەنتىندە 78,1 پايىزعا وسكەن. ۇزدىك ۇشتىكتى «Kaspi Bank» جابادى: سالىمى 47,9 پايىزعا كوبەيىپ, 4,18 ترلن تەڭگەنى قۇراعان. مۇنداعى بيزنەس دەپوزيتى ءبىر جىلدا 91,7 پايىزعا, جەكە تۇلعالار دەپوزيتى 43,6 پايىزعا وسكەن.
دەپوزيت قابىلداۋشى بانكتەر ىشىندەگى كورسەتكىشى تىم تومەندەپ كەتكەن جالعىز بانك – بايىرعى «سبەر», قازىرگى «Bereke Bank». وندا دەپوزيت كولەمى ءبىر جىلدا بىردەن 59,5 پايىزعا تومەندەپ, 1,06 ترلن تەڭگە بولىپ قالعان. رەيتينگكە «بانك تسەنتركرەديت» ەنگىزىلمەگەن. ويتكەنى ونىڭ ءوسۋ كورسەتكىشتەرى باسقا ەكىنشى دەڭگەيلى بانكتەردى («Eco Center Bank», بۇرىنعى «رەسەيلىك» «الفا-بانك») ساتىپ الۋ ارقىلى قامتاماسىز ەتىلگەن دەيدى «Ranking» ساراپشىلارى.
قازىرگى ۋاقىتتا «Halyk Bank»-تە – 10,34 ترلن, «وتباسى بانكتە» – 2,30 ترلن, «Forte Bank»-تە – 2,05 ترلن, «سيتي بانك قازاقستاندا» – 1,04 ترلن, «Jusan Bank»-تە – 1,49 ترلن تەڭگە كولەمىندە سالىم بار. جالپى العاندا, ەكىنشى دەڭگەيلى 21 بانكتىڭ 15-ءى ءوسىم كورسەتتى. جيناقتالعان دەپوزيت كولەمى – 31,60 ترلن تەڭگە. سونىڭ 28,90 ترلن-ى توپ-10 قاتارىنا كىرەتىن بانكتەرگە تيەسىلى. سالىمدار 2012 جىلدان بەرى 4 ەسە ءوسىم كورسەتكەن. اتاپ ايتقاندا, ەكىنشى دەڭگەيلى بانكتەردە 2012 جىلى جالپى جيىنتىعى 8,5 ترلن تەڭگە بولسا, 2013 جىلى – 9,8 ترلن, 2014 جىلى – 11,4 ترلن, 2015 جىلى – 15,6 ترلن, 2016 جىلى – 17,3 ترلن, 2017 جىلى – 16,7 ترلن, 2018 جىلى – 17,0 ترلن, 2019 جىلى – 18,0 ترلن, 2020 جىلى – 21,6 ترلن, 2021 جىلى – 26,0 ترلن, ال 2022 جىلى 31,6 ترلن تەڭگە بولدى.
قالعان 6 بانكتە كورسەتكىش تومەندەگەن. سالىمى ازايعان قارجى ينستيتۋتتارى قاتارىندا رەسەيلىك ەنشىلەس بانك – «بانك ۆتب» (قازاقستان) بار. ونداعى دەپوزيت كولەمى بىردەن 86,4 پايىزعا تومەندەگەن. سونداي-اق قىتاي بانكتەرى – قىتايدىڭ ساۋدا ونەركاسىپ بانكىندەگى سالىم كولەمى – 22,2 پايىزعا, قازاقستانداعى قىتاي بانكىندەگى سالىم كولەمى 13,1 پايىزعا ازايعان. بۇل قاتاردا دەپوزيتىنىڭ 20,9 پايىزىنان ايىرىلعان ءباا-ءنىڭ ەنشىلەس ۇيىمى – «Al Hilal» يسلام بانكى دە بار. كورسەتكىشى تومەندەگەن جالعىز قازاقستاندىق بانك – «نۇربانك». ءبىر جىلدا 2 پايىزعا تومەندەگەن.
