وسكەلەڭ ۇرپاقتى اسكەري تاربيەگە بالا كەزدەن باۋلۋدىڭ ماڭىزى زور. اسىرەسە قولىنان گادجەت تۇسپەيتىن تەحنوكراتيا ءداۋىرىنىڭ جەتكىنشەكتەرىنە پاتريوتتىق تاربيە اۋاداي قاجەت. وسى باعىتتا قۇرىلعان «قاھارمان ۇرپاق» قوعامدىق قورى ءبىلىم باسقارمالارىمەن ءوزارا مەموراندۋم نەگىزىندە مەكتەپ وقۋشىلارىن ەلجاندىلىققا تاربيەلەپ ءجۇر.
ۇرپاق رۋحىن وياتاتىن اسكەري-پاتريوتتىق اندەر اۋەلەپ, قيلى كەزەڭدە قىرشىن كەتكەن باتىرلاردىڭ جاۋىنگەرلىك جولىن ۇلگى ەتكەن وسىنداي يگى جوبانىڭ ءبىرى الماتى قالاسىنداعى №61 جالپى ءبىلىم بەرەتىن ورتا مەكتەپتە جالعاسىن تاپتى. مەكتەپ ىشىنەن قۇرىلعان پاتريوتتىق كلۋب وكىلدەرى ساپتىق ءجۇرىس, قارۋ-جاراقتى شاپشاڭ تۇردە قۇراستىرۋ, قويان-قولتىق جەكپە-جەك سىندى العاشقى اسكەري دايارلىق ساباعىندا مەڭگەرگەن ماشىقتارىن ورتاعا سالدى. ءىس-شاراعا ارنايى شاقىرىلعان تاجىك-اۋعان شەكاراسىنداعى ۇرىس قيمىلداردىڭ قاتىسۋشىلارى مەن اۋعان سوعىسىنىڭ ارداگەرلەرى وقۋشىلارعا پاتريوتتىق تاربيەنىڭ نەگىزدەرى, بەيبىت كۇننىڭ قادىرى, اسكەري تاربيەنىڭ ارتىقشىلىقتارى توڭىرەگىندە ءدارىس وقىدى.
– پرەزيدەنتىمىز قاسىم-جومارت توقاەۆ: «ەلىمىزدىڭ ءاربىر ازاماتى جۇرتشىلىقتىڭ الدىنا شىققاندا ۇلتتىق مۇددە مەن قازاقستاندىق پاتريوتيزم قاعيداتتارىن باسشىلىققا الۋى كەرەك» دەگەن بولاتىن. ال جاس ۇرپاقتى ەلدىك مۇراتقا باۋلۋ اعا بۋىننىڭ بورىشى. ءبىزدىڭ پاتريوتتىق كلۋبىمىز بۇل باعىتتا جۇيەلى جۇمىس اتقارىپ كەلەدى. مەملەكەتىمىزدىڭ نەگىزگى قۇندىلىقتارىن, اسكەري تاريحىن, ءجۇرىپ وتكەن جولىن كەزدەسۋ بارىسىندا جاستارعا ۇدايى ايتىپ وتىرامىز. مۇندايدا وقۋشىلاردىڭ كوزىندە ۇشقىن پايدا بولىپ, جىگەرى ارتا تۇسەتىنىن بايقايمىز. ولار بولاشاقتا قانداي سالادا قىزمەت ەتسە دە مەكتەپ قابىرعاسىندا مەڭگەرگەن پاتريوتتىق تاربيەنىڭ پايداسىن كورەدى, – دەيدى قازاقستان قارۋلى كۇشتەرى جانە تاجىك-اۋعان شەكاراسىنداعى ۇرىس قيمىلدار ارداگەرى, «قاھارمان ۇرپاق» قوعامدىق قورىنىڭ ديرەكتورى ارمان ارىنحانوۆ.
اسكەري-پاتريوتتىق كلۋب مۇشەلەرى 1985 جىلى وزدەرى وقيتىن مەكتەپتەن قانات قاعىپ, تاجىك-اۋعان شەكاراسىندا ەرلىكپەن قازا تاپقان ميحايل مايبورادانى ىلتيپاتپەن ەسكە الدى. مەكتەپ ديرەكتورى گۇلميرا مىرزاحمەتوۆانىڭ ايتۋىنشا, اسكەري ءومىردىڭ ايناسىنا اينالىپ, ەرلىگى ءۇشىن حالىق باتىرى اتانعان جاۋىنگەردىڭ ەسىمىن كەيىنگى بۋىن ماقتان تۇتادى. ول 1993 جىلى جيىرما بەسكە ەندى تولعان شاعىندا ءوزى باسقاراتىن زاستاۆاداعى 25 سەرىگىمەن بىرگە وققا ۇشقان. بۇگىنگى تاڭدا الماتىنىڭ تۇركسىب اۋدانىندا ونىڭ ەسىمىمەن اتالاتىن كوشە بار.
الماتى
