سۋرەتتى تۇسىرگەن اۆتور
ءيا, قىس قىزىعى – سىرعاناق. قار جاۋسا بولدى, شاناسىن سايلايتىن ويىن بالاسىنىڭ ادەتى ەمەس پە؟! سامار اۋىلىنىڭ ىشىندەگى ءۇش سىرعاناقتا دا ويىن قىزىپ تۇر.
– دەمالىس كۇندەرى بالالارىمدى وسىندا اكەلىپ سىرعاناق تەپكىزەمىن. قازىر قار قالىڭ, جاقسى سەرگىپ قالادى. نەگىزى, اۋىلىمىزدىڭ شەتىنەن ۇلكەن سىرعاناق ورنىن سالسا, ءتىپتى جاقسى بولار ەدى. شاڭعى تەبۋگە دە جاعداي جاسالسا دەيمىن. وندا بالالاردان بولەك جاستار دا بارار ەدى. مۇندا كەلەتىن بالالار كوپ, – دەيدى اۋىل تۇرعىنى اينۇر ەربولقىزى.
راس, اتا-انالار بالالارىنىڭ جان-جاقتى دامۋى ءۇشىن قىسقى سپورتتىق ويىن الاڭدارىنىڭ بولعانىن قالايدى. سامار, سارىبەل وڭىرىندە جاز قالاي قىزىقتى وتسە, قىسى دا قىزىققا تولى بولسا دەسەدى. اۋدان بۇقتىرما سۋ قويماسىن جاعالاي جاتقان سوڭ, جازدى جۇرت جاقسى وتكىزەدى. سول سياقتى قىستا دا سىرعاناق تەبەتىن ورىندار كوبەيىپ, مۇز ايدىندارى اشىلسا دەگەن ەلدىڭ تىلەگى بار.
– اۋىلىمىزدا ءۇش سىرعاناق تەبەتىن ورىن بار. قاۋىپسىز. اينالاسى كەڭ. اۋدانىمىزدىڭ جاستارى بوس ۋاقىتىن ءارتۇرلى ۇيىرمەلەر مەن سپورتتىق ويىندارعا ارنايدى. اسىرەسە فۋتبول, ۆولەيبول, تەننيس وينايدى, – دەيدى سامار اۋدانى جاستار ورتالىعىنىڭ ديرەكتورى ەرنازار ساۋىق.
ەستەرىڭىزگە سالساق, پرەزيدەنت وتكەن جىلدى بالالار جىلى دەپ جاريالاعان بولاتىن. جىل اياقتالعانىمەن, جاۋاپتى مەكەمەلەر بالالارعا دەگەن قولداۋىن توقتاتقان جوق.
شىعىس قازاقستان وبلىسى,
سامار اۋدانى
