بالامىزدى سپورت سەكتسياسىنا بەرگەندە قىمبات سپورت تۇرلەرىنەن ات-تونىمىزدى الا قاشاتىنىمىز بار. اسىرەسە, قىسقى سپورت تۇرلەرىنىڭ ماڭىنا جولامايمىز. بالانىڭ بولاشاعىن الەۋمەتتىك-تۇرمىستىق احۋالدىڭ «مىسى» باسىپ كەتەدى. ءسويتىپ, توعىزقۇمالاق, كۇرەس سياقتى قالتاعا سالماق تۇسىرمەيتىن سپورتقا جازدىرامىز. كەيىن «ۇلكەن تەننيس, حوككەيدە نەگە قازاقتىڭ بالالارى جوق» دەپ سپورتقا جاۋاپتى ورگانداردى سىناپ الەكپىز. بۇگىندە حوككەي سەكتسياسىنداعى 4-5 جاستاعى بالانىڭ ءبىر جابدىق كيىم-كەشەگىنىڭ باعاسى 300 مىڭ تەڭگەنىڭ ءار جاق بەر جاعى. بالا وسكەن سايىن ونىڭ دا باعاسى قىمباتتاي تۇسەتىن كورىنەدى. جىل سايىن ازىق-ت ۇلىكتىڭ عانا ەمەس, سپورتتىق قۇرالداردىڭ دا باعاسى اسپانداپ جاتاتىنى بەلگىلى. مۇنى قاپەرىنە العان اتا-انا ء«بىزدىڭ تۇقىمىمىزدا حوككەي ويناعان ەشكىم جوق» دەپ ءوزىن اقتاپ الۋعا تىرىسىپ, جۇرتتىڭ بالالارىنان قالماسىن دەپ كۇرەس سەكتسياسىنا بەرەدى.
ارينە, سەكتسياعا جازىلعان بالانىڭ ءبارى بىردەي كاسىپقوي سپورتشى بولىپ كەتپەيدى. بىراق, ۇلكەن سپورتقا دەگەن جول سول جاقتان باستالاتىنىن ەستەن شىعارماعان ءجون. بالانىڭ بولاشاعى ءۇشىن قاراجاتتى ۇنەمدەمەگەندە مۇمكىن سول بالادان وليمپيادا, الەم چەمپيونى شىعار ما ەدى؟ حوككەي دەمەكشى, بوس ۋاقىتتا ارىپتەستەرىمىزبەن بىرگە «بارىس-ارەنا» مۇز ايدىنىنا بارىپ, «بارىس» حوككەي كلۋبىنىڭ ويىنىن تاماشالاۋدى ادەتكە اينالدىرعانبىز. اڭعارعانىمىز, كەزدەسۋدى تاماشالاۋعا كەلگەن جانكۇيەرلەردىڭ كوبى وزگە ۇلت وكىلدەرى. ايتپاعىمىز ول ەمەس. ولار جالعىز كەلمەي, كىشكەنتاي بالالارىن بىرگە ەرتىپ جۇرەدى. بۇل دا بالانى سپورتقا باۋلۋدىڭ, سالاماتتى ومىرگە تاربيەلەۋدىڭ جولى ەمەي, نەمەنە؟!
دەنى ساۋ ۇرپاق – ۇلتتىڭ ەڭ قىمبات بايلىعى. بۇل رەتتە مەملەكەت باسشىسى قاسىم-جومارت توقاەۆ ءوزىنىڭ العاشقى جولداۋىندا بۇقارالىق سپورتتى دامىتۋ ماسەلەسىنە نازار اۋدارعان بولاتىن. «ۇلت دەنساۋلىعىن بەكەمدەۋ ماسەلەسى دە وتە وزەكتى. بارلىق جاس ساناتى اراسىندا بۇقارالىق سپورت تۇرلەرىن ناسيحاتتاي بەرۋ كەرەك. بالالار ءۇشىن سپورتتىق ينفراقۇرىلىمنىڭ بارىنشا قولجەتىمدى بولۋىن قامتاماسىز ەتۋ كەرەك. بۇقارالىق سپورتتى دامىتۋ – پيراميداعا اينالۋى قاجەت. ونىڭ باسىنا چەمپيوندار شىقسا, ونىڭ نەگىزىندە ءبىز ساۋ ءارى سانالى ۇرپاقتى, مىقتى ۇلتتى قالىپتاستىرامىز», دەپ بۇقارالىق سپورتتى دامىتۋعا ارنالعان كەشەندى باعدارلاما قابىلداۋ كەرەكتىگىن ايتقان بولاتىن.
پرەزيدەنتتىڭ وسى تاپسىرماسىن ورىنداۋ ماقساتىندا «دەنەشىنىقتىرۋ مەن بۇقارالىق سپورتتى دامىتۋ جونىندەگى 2020-2025 جىلدارعا ارنالعان كەشەندى جوسپار» ازىرلەنىپ, ول ۇكىمەتتىڭ قاۋلىسىمەن بەكىتىلگەنى ءمالىم. وسى جوسپارعا سايكەس, مەملەكەت-جەكەمەنشىك ارىپتەستىگى اياسىندا بالالار مەن جاسوسپىرىمدەرگە ارنالعان سپورت سەكتسيالارىنا جان باسىنا قارجىلاندىرۋ جۇيەسى ەنگىزىلدى. سپورت كەشەنىن اشىپ, مەملەكەتتىك سپورتتىق تاپسىرىس اياسىندا جۇمىس ىستەگىسى كەلگەن ازامات ارنايى پورتالى ارقىلى ءوتىنىش بەرەدى. جەرگىلىكتى ۋاكىلەتتى ورگاندار قىزمەت كورسەتۋشىنىڭ تالاپقا سايكەستىگىن تەكسەرىپ, پورتالعا ەنگىزەدى. ءوز كەزەگىندە اتا-انالار دا بالاسىن تەگىن ونەر ۇيىرمەسى نەمەسە سپورت سەكتسياسىنا جازدىرعىسى كەلسە, اتالعان پورتال ارقىلى ءوتىنىش بەرۋىنە بولادى. پورتالعا تىركەلىپ, ءوز شاعىن اۋدانىنداعى سپورت سەكتسياسىن جانە ونداعى سپورت ءتۇرىن ءوزى تاڭداپ الادى. بۇل جاڭاشىلدىق بۇقارالىق سپورتتىڭ دامۋىنا جاڭا ءدۇمپۋ اكەلگەنى راس. قازىر سپورتتىق ينفراقۇرىلىم دامىماعان اۋىلدىق جەرلەردىڭ وزىندە بوكس, قازاق كۇرەسى, ۇستەل تەننيسى, جەڭىل اتلەتيكا, توعىزقۇمالاق سياقتى سپورتتىڭ بىرنەشە ءتۇرى بويىنشا سەكتسيالار جۇمىسى جاندانا تۇسكەن.
اتتەگەن-ايى سول, اۋىلدىق جەردە مەكتەپتىڭ سپورت زالىنان باسقا جاتتىعاتىن سپورت نىسانى جوقتىڭ قاسى. سپورتتىق ءبىلىم مەن تاجىريبەسى بار تالاي ازامات اۋىلدا ءتۇرلى سەكتسيالار اشقىسى كەلەدى. سپورتتىق نىسانداردىڭ جوقتىعى ارمان وتىن ءسوندىرىپ, تالاي چەمپيوندار تاسادا قالىپ جاتىر. اۋىلدىڭ شاعىن فۋتبول الاڭىن شاڭداتىپ جۇرگەن بالا ۇلكەن فۋتبولدىڭ جارىق جۇلدىزىنا اينالماسىنا كىم كەپىل؟
