اتاپ ايتقاندا, اياگوز اۋدانىنىڭ تارباعاتاي اۋىلىنىڭ كارى-جاسى الىس-جاقىنداعى تامىر-تانىس, اعايىن-تۋىسىمەن تىلدەسۋ ءۇشىن اكىمدىك پەن مادەنيەت ءۇيى, كىتاپحانا مىنگەسە ورنالاسقان قوس قاباتتى عيماراتقا كەلەتىنى كۇندەلىكتى ادەت بولىپ كەتكەن. اسىرەسە, وسكەمەن مەن سەمەيدەگى جوعارى وقۋ ورنىندا وقيتىن وسى اۋىلدىڭ ستۋدەنت جاستارى ونلاين وقۋ تاپسىرمالارىن ورىنداۋدا قينالىپ ءجۇر. اۋىل اكىمى ەربول ەرەجەپوۆ زامان تالابىنا سايكەس بايلانىس ءتۇرىن ورناتۋعا بارىن سالىپ جۇرگەنىمەن, ينتەرنەت اۋىل حالقىنىڭ باستى ارمانى بولىپ تۇرعانىن ايتادى.
– تارباعاتاي اۋىلدىق وكرۋگىنىڭ قۇرامىندا اۋىلدان وزگە ءۇش ەلدى مەكەن بار. الدىمەن تۇرعىن سانىن ايتار بولساق, اقشوقى اۋىلىندا – 44, ورتاارالدا 47 ادام تۇرادى. مالتۇگەلدە 180 ادام بار. وسىلاردى ەسكەرە كەلسەك, تارباعاتاي اۋىلى بويىنشا جالپى 1 500 شاماسىندا تۇرعىنى بار اياگوز اۋدانىنداعى ءىرى اۋىل دەپ ايتۋعا بولادى. نەگىزىنەن تىرشىلىك كوزى – مال ۇستاۋ, ءىرى شارۋا قوجالىقتارى دا از ەمەس. اۋىل ازاماتتارىنىڭ ىنتىماعىنا, حالىققا ورتاق ءىس بولسا, جۇمىلا كىرىسەتىنىنە ەش كۇمان جوق. ءار جىلدىڭ تۇلەكتەرى دە اۋىل ءۇشىن قاجەتتى ماسەلەلەردى شەشۋگە بەلسەنە ۇلەس قوسادى. دەگەنمەن ينتەرنەت بايلانىسىنىڭ ناشارلىعى ءبارىمىزدى تولعانتىپ وتىر. 2007-2008 جىلدارى «Activ» كومپانياسى بايلانىس جەلىسىن ورناتقان بولاتىن. 2012-2013 جىلدارى حالىقتىڭ وتىنىشىنە بايلانىستى «Beeline» جۇيەسى ىسكە قوسىلدى. بىراق 2019 جىلدان باستاپ, تارباعاتاي اۋماعى تۇرعىندارىن ينتەرنەتپەن تولىقتاي قامتاماسىز ەتۋ ماقساتىندا «قازاقتەلەكوم» اق بۇرىنعى «Activ» كومپانياسىنىڭ جەلى تارتۋ باعانىن الىپ, ورنىنا جاڭادان ءوز باعانىن ورناتتى. سول ارقىلى «Tele2», «ALTEL» جانە «Activ» ۇشەۋىن قاتار قويدى. مىنە, سول ۋاقىتتان بەرى ينتەرنەت بايلانىسىنىڭ قىزمەتى ناشارلاپ كەتتى. اۋىل تۇرعىندارى نەگىزىنەن «Activ» نومەرىن پايدالاناتىن. قازىر اتالعان بايلانىس ءتۇرىنىڭ وپەراتورى دۇرىس جۇمىس ىستەمەي, حالىققا قيىن ءتيىپ وتىر. بۇعان قاتىستى اتالعان كومپانيا باسشىلىعىنا جولداعان حاتتارىمىزعا ازىرگە جاۋاپ جوق. بيىل اۋىلىمىزدىڭ توڭىرەگىندە «Tele2» كومپانياسى ءۇش جەلى باعانىن ورناتۋدى قولعا الىپ وتىر. بىلتىر جىل سوڭىندا جاي باستادى. ىستەرىن دۇرىس اياقتايدى دەپ ۇمىتتەنەمىز. ازىرگە اۋىل تۇرعىندارى اكىمدىكتىڭ WiFi جەلىسىنە كەلىپ, بايلانىسقا شىعىپ وتىر. باسقا امالدارى جوق, – دەيدى اۋىل اكىمى ە.شاكەر ۇلى.
اۋىل اكىمى بەكەر ايتپاپتى. مادەنيەت ءۇيىنىڭ جايىمەن تانىسۋ ءۇشىن ۇستىڭگى قاباتقا كوتەرىلگەنىمىزدە دالىزدەگى تەرەزەنىڭ الدىنا كەپ قارماق سالىپ, بالىق اۋلاپ تۇرعانداي كەيىپتەگى ءۇش بوزبالاعا كوزىم ءتۇستى. ءجون سۇراستىرساق, ستۋدەنتتەر ەكەن. وسكەمەندەگى شقتۋ-دا وقيتىن دۋمان اسكەرجانوۆ اۋىلعا جەلتوقسان ايىندا كەلىپتى. سودان بەرى وسى عيماراتتىڭ بوساعاسىنان اتتاۋ ونىڭ كۇندەلىكتى ادەتىنە اينالعان. ويتكەنى ستۋدەنتتىك ەسەپتىك قۇجاتتاردى ۇيالى تەلەفوننىڭ ينتەرنەتى ارقىلى جولداپ وتىرۋدىڭ باسقا جولى جوق. ءبىر قىزىعى, ول باعدارلاماشى ماماندىعى بويىنشا ءبىلىم الىپ جاتىر ەكەن. الايدا اۋىلعا ورالعىسى كەلمەيتىنىن, كەلەشەكتە قالادا قالعىسى كەلەتىنىن دە جاسىرمادى. «بۇل ماسەلە – تەك ءبىزدىڭ اۋىلدىڭ ەمەس, بۇكىل قازاقستاننىڭ ءالى كۇنگە دەيىن شەشىمىن تاپپاي كەلە جاتقان ورتاق پروبلەماسى. ازىرگە وسىلاي بايلانىسقا شىققانىمىزعا دا تاۋبە» دەيمىز, دەيدى ول.
ءساتجان قاسىمجان ۇلى
اباي وبلىسى,
اياگوز اۋدانى
