بۇل – انە-مىنە زەينەتكە شىعامىن دەپ وتىرعان ازاماتتاردى لايىقتى جۇمىسپەن قامتىپ, دەمەپ جىبەرەتىن جاردەمشى جوبا. ەڭبەك جانە حالىقتىڭ الەۋمەتتىك قورعاۋ مينيسترلىگىنىڭ مالىمەتى بويىنشا 2022 جىلى «كۇمىس جاس» جوباسىن ىسكە اسىرۋ اياسىندا 3 080 ادام جۇمىسقا ورنالاستىرىلدى. اتالعان يگى باستاما 2022 جىلى كاسىپكەرلىكتى دامىتۋ جونىندەگى 2021-2025 جىلدارعا ارنالعان ۇلتتىق جوبا شەڭبەرىندە ىسكە قوسىلدى.
«كۇمىس جاس» ارقىلى جۇمىسقا ورنالاسقانداردىڭ ەڭ كوپ سانى الماتى (570 ادام), تۇركىستان (516 ادام) جانە قاراعاندى (322 ادام) وبلىستارىندا تىركەلدى. وسى ورايدا بۇل ساناتتاعى ازاماتتارعا جۇمىس تاۋىپ بەرۋشىلەرگە دە مەملەكەت تاراپىنان قولداۋ كورسەتىلىپ جاتقانىن اتاپ ءوتۋ كەرەك.
بۇل جوباعا, جوعارىدا ايتقانداي, زەينەتكەرلىككە شىعۋعا بىرەر جىل قالعان جۇمىسسىز ازاماتتار قاتىسا الاتىن ەدى. ەندى بيىلدان باستاپ جوباعا قاتىسۋشىلاردىڭ اۋقىمى ۇلعايتىلىپ, 50 جاسقا تولعان ادامداردىڭ قاتىسۋىنا دا مۇمكىندىك بەرىلە باستادى.
«2023 جىلدىڭ 1 قاڭتارىنان باستاپ جوبانى ىسكە اسىرۋ قاعيدالارىنا وزگەرىستەر ەنگىزىلدى. ەندى وعان 50 جاسقا تولعان ادامدار قاتىسا الادى. بۇل رەتتە مەملەكەتتەن جۇمىس بەرۋشىگە جوباعا قاتىسۋشىلاردىڭ جالاقىسىنىڭ بەلگىلەنگەن مولشەرىنىڭ 60-تان 70%-ىنا دەيىن, بىراق 30 ايلىق ەسەپتىك كورسەتكىشتەن اسپايتىن مولشەردە سۋبسيديا تولەنەدى. «كۇمىس جاس» جوباسىنا قاتىسۋ ۇزاقتىعى 36 ايعا دەيىن. وسىدان كەيىن جۇمىس بەرۋشى «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭدا بەلگىلەنگەن زەينەتكەرلىك جاسقا تولماعان ادامدى كەمىندە 1 جىل مەرزىمگە, ال زەينەتكەرلىك جاسى الدىنداعى (58 جاستان اسقان) ادامدى زەينەتكەرلىككە شىققانعا دەيىن تۇراقتى جۇمىس ورنىنا ورنالاستىرادى», دەپ حابارلادى ءتيىستى ۆەدومستۆوعا قاراستى حالىقتى جۇمىسپەن قامتۋ دەپارتامەنتى ديرەكتورىنىڭ ورىنباسارى ايجان جاپالباەۆا.
جىل باسىنان بەرى جەرگىلىكتى جەرلەردە اتالعان ماسەلەنى شەشۋدە تيىمدىلىگىن كورسەتكەن بۇل جوبا جونىندە قاتىسۋشىلار عانا ەمەس, سونىمەن قاتار جۇمىس بەرۋشىلەر وڭ پىكىرىن ءبىلدىرىپ جاتىر.
«اۋليەكولدىڭ ورتالىعىندا «مينۋتكا» دەپ اتالاتىن اسحانام ورنالاسقان. جۇمىسپەن قامتۋ ورتالىعىنىڭ ماماندارى جۇمىس بەرۋشىلەرمەن كەزدەسۋ ۇيىمداستىرىپ, وندا مەملەكەت سۋبسيديالايتىن جۇمىس ورىندارى تۋرالى ايتىپ بەردى. مەن «كۇمىس جاس» جوباسىنا قىزىعۋشىلىق تانىتىپ, ءوتىنىم بەردىم. ال 1 اقپاننان باستاپ ماعان ەكى ايەلدى جىبەردى. ولار – ليۋدميلا رايزەر مەن سۆەتلانا مايور. مەن مەملەكەتتەن جۇمىس بەرۋشىلەر دە, 50 جاستان اسقان, جۇمىس تابۋ قيىنىراق ادامدار دا قولداۋ الاتىنىنا قۋانىشتىمىن», دەدى جەكە كاسىپكەر قارلىعاش راحماتۋللينا.
