PACEY بايقاۋى بەيبىتشىلىك, كليماتتىق قاۋىپسىزدىك جانە قارۋسىزدانۋ سالالارىنا ۇلەس قوسقىسى كەلەتىن بەلسەندى جاستاردىڭ يننوۆاتسيالىق جوبالارىن قولدايدى. ارۋجان Nazarbayev University باكالاۆرياتىن «الەۋمەتتانۋ» ماماندىعى بويىنشا بىتىرگەن.
ول بۇل كونكۋرسقا ەرەكشە قاجەتتىلىكتەرى بار ءورىستىلدى بالالارعا ارنالعان «ەرتىس مەكتەبى» جوباسىن ۇسىندى. مۇندا ولار دەنساۋلىعى ءتۇزۋ بالالارمەن بىرگە وقىپ, قوعاممەن بىتەقايناسىپ كەتە الادى. سەمەيدەگى مەكتەپتىڭ رەسمي اشىلۋى وسى جىلدىڭ قىركۇيەك ايىنا جوسپارلانعان. دەرەكتەرگە سۇيەنسەك, قالادا نەيروپسيحولوگيالىق جانە تىرەك-قيمىل اپپاراتى بۇزىلعان 4 مىڭنان استام بالا تۇرادى. ولاردىڭ كوپشىلىگى يادرولىق سىناق قۇرباندارىنىڭ ءۇشىنشى جانە ءتورتىنشى ۇرپاعى بولۋى مۇمكىن.
– جوبانىڭ يدەياسى – وقۋشىلاردىڭ جەكە قاجەتتىلىكتەرىن ەسكەرەتىن ءتورت ءتۇرلى باعدارلاما بويىنشا ەرەكشە بالالاردى وقىتۋ. وسى كەزەڭدە كوماندا باستاۋىش مەكتەپ دەڭگەيىنە جانە 4 باعدارلامانىڭ قايسىسى بالاعا سايكەس كەلەتىنىن ءتۇسىنۋ ءۇشىن پسيحولوگيالىق جانە فيزيولوگيالىق تەستتەر وتكىزۋگە باسا نازار اۋدارادى. جاقىن ارادا باسسەيندى قايتا قۇرۋدى, ماسساج كابينەتىن, ويىن الاڭىن ۇيىمداستىرۋدى جانە مەكتەپتى تەحنيكالىق ىسكە قوسقانعا دەيىن باسقا دا ۇيىمداستىرۋ ءىس-شارالارىن اياقتاۋ جوسپارلانىپ وتىر. ۇزارتىلعان توپتارعا, مەكتەپكە دايىندىققا, جاپون ۆولەيبول سەكتسياسىنا, كلاسسيكالىق بال ءبيى, ۆوكال جانە سۋرەت ۇيىرمەلەرىنە قابىلداۋ جاريالاندى, – دەيدى ارۋجان.
ا.اۋدانبەكوۆا بالالاردان بولەك اتا-انالارعا بالانىڭ تابيعي تالانتىن قالاي دامىتۋدى جانە ولاردى جوعارى الەۋەتكە جەتۋگە قالاي ىنتالاندىرۋعا بولاتىنىن ۇيرەتۋدى جوسپارلاپ وتىر. ول اتا-انالاردى بالانىڭ ءبىلىم بەرۋ قاجەتتىلىكتەرىن ەسكەرۋگە جانە ولاردى ارنايى تۇزەتۋ مەكتەپتەرىنە بەرۋدەن قورىقپاۋعا شاقىرادى.
لاعىل اسقاروۆا
استانا
