جاس بيشىلەر قالالىق «ميراس» مادەنيەت ۇيىندە ونەر كورسەتسە, مەكتەپ تەاترلارىنىڭ ساحنالىق قويىلىمدارى م.گوركي اتىنداعى گيمنازيانىڭ ءماجىلىسحاناسىندا ءوتتى. وقۋشىلار قويعان ساحنالىق تۋىندىلاردىڭ تاقىرىبى سان الۋان, ال بيشىلەر «حالىق ءبيى» جانە «زاماناۋي ستيلدەگى بي» اتالىمدارى بويىنشا ونەر كورسەتتى. بايقاۋعا امانگەلدى اۋدانىنان كەلگەن «گۇلدەر-اي» بيشىلەر توبى ۇلتتىق ناقىشتاعى ەرەكشە كيىم ۇلگىسىمەن كوزگە ءتۇستى. ۇلت ۇستازى ا.بايتۇرسىن ۇلىنا ارنالعان كۇردەلى قويىلىمدى ءساتتى ساحنالاپ شىققان توبىل قالاسىنداعى ن.ناۋشاباەۆ اتىنداعى مەكتەپ-گيمنازياسىنىڭ تەاترى دا كوپشىلىك كوڭىلىنەن شىقتى. اتالعان مەكتەپتە وسىدان ەكى جىل بۇرىن «قارا شاڭىراق» تەاترى قۇرىلعان. ونىڭ قۇرامىندا وتىزعا جۋىق وقۋشى بار.
جاس ونەرپازداردىڭ ونەرىن وبلىسقا تانىمال مادەنيەت جانە ونەر قايراتكەرلەرى باعالادى. ناتيجەسىندە, قازىلار القاسى «ۇزدىك حورەوگرافيالىق قويىلىم» اتالىمى بويىنشا وڭىرلىك پسيحولوگيالىق قولداۋ جانە قوسىمشا ءبىلىم بەرۋ ورتالىعىنىڭ «حامەلەون» بي توبىن جەڭىمپاز دەپ تاۋىپ, بولاشاق اقپاراتتىق تەحنولوگيا ماماندارىن وقىتاتىن «وزات» مەكتەپ-ليتسەي-ينتەرناتىنىڭ «Blossom» بي توبىنا ساحنالىق شەبەرلىگى ءۇشىن ارنايى سىيلىق بەرۋ كەرەك دەپ ۇيعاردى. ال فەدوروۆ اۋداندىق بالالار شىعارماشىلىق ءۇيىنىڭ «جانىم» بي توبى «بي قويىلىمىنىڭ ەرەكشەلىگى ءۇشىن» دەگەن نوميناتسيا جەڭىمپازى اتاندى.
بايقاۋ قورىتىندىسى بويىنشا بي ونەرى مەن تەاتر ونەرىنە تاعايىندالعان قوس بىردەي باس جۇلدەنى امانگەلدى اۋدانىنىڭ ونەرلى ورەندەرى جەڭىپ الدى. بيشىلەر اراسىنان گران-پري سىيلىعىن امانگەلدى ورتا مەكتەبىنىڭ «گۇلدەر-اي» ءانسامبلى, ال وقۋشىلار تەاترلارىنىڭ باس جۇلدەسىن وسى اۋدانعا قاراستى قۇمكەشۋ ورتا مەكتەبىنىڭ «بايشەشەك» تەاترى جەڭىپ الدى. ۇزدىك ونەر توپتارى وبلىستىق ءبىلىم باسقارماسىنىڭ ماقتاۋ قاعازدارىمەن جانە اقشالاي سىيلىقتارمەن ماراپاتتالادى. باس جۇلدە يەگەرلەرى ەندى بايقاۋدىڭ رەسپۋبليكالىق كەزەڭىندە ونەر كورسەتەتىن بولادى. ۇيىمداستىرۋشىلاردىڭ ايتۋىنشا, وبلىس وقۋشىلارى بۇعان دەيىن دە رەسپۋبليكالىق بايقاۋلاردا جاقسى ونەر كورسەتىپ, جۇلدەلى ورىنداردان كورىنىپ ءجۇر. «مىسالى, بىلتىر جانكەلدين اۋدانىنداعى ونەر مەكتەبىنىڭ تەاتر ۇجىمى رەسپۋبليكا بويىنشا باس جۇلدەنى جەڭىپ السا, حورەوگرافيا ۇجىمى ءۇشىنشى ورىن الدى. بۇل ونەر فەستيۆالىنە بالالاردىڭ قىزىعۋشىلىعى جىلدان-جىلعا ارتىپ كەلەدى. بيىلعى بايقاۋعا العاش رەت وڭىردەگى مامانداندىرىلعان مەكەمەلەردىڭ ونەرپازدارى دا قاتىسىپ وتىر, – دەيدى پسيحولوگيالىق قولداۋ جانە قوسىمشا ءبىلىم بەرۋ وڭىرلىك ورتالىعى ديرەكتورىنىڭ ورىنباسارى جاننا ەسمۇرزينوۆا.
قوستاناي وبلىسى
