مۇقاعالي – ولەڭدەرى ەڭ كوپ جاتقا وقىلاتىن اقىن. №39 كىتاپحانانىڭ وقۋ زالىندا «مەن – ءومىردى جىرلاۋ ءۇشىن كەلگەنمىن» ايدارىمەن باستاۋ العان پوەزيا كەشى, «مۇقاعالي – ماڭگىلىك عۇمىر» كىتاپ كورمەسىنە ۇلاستى. ورىمدەي ورەندەر اقىن جىرىن الما كەزەك جاتقا وقىپ, جىر ەستافەتاسىنا كىتاپحانانىڭ ەگدە وقىرماندارى دا ءۇن قوستى.
جازۋشىلار كىتاپحاناسىندا وتكەن «جىر ءدۇلد ۇلى – مۇقاعالي» ادەبي-سازدى كەشىنە جازۋشىلار وداعى بالالار ادەبيەتى كەڭەسىنىڭ توراعاسى نۇرداۋلەت اقىش باستاعان قالامگەرلەر قاتىسىپ, مۇقاعاليدىڭ جاۋھار جىرلارى جىل وتكەن سايىن قاراڭعى ءتۇن قويناۋىنان ساۋلەسىن شاشقان جارىق جۇلدىزداي جارقىراپ, ايشىقتالا بەرەتىنىن, وسكەلەڭ ۇرپاق تاربيەسىندە اقىن مۇراسىنىڭ ءرولى باسىم ەكەنىن ايتتى.
ناۋرىزباي اۋدانى وتباسىلىق وقۋ كىتاپحاناسىندا سالتانات قۇرعان ء«ار ولەڭى – ءبىر الەم» جوباسى دا ءان مەن جىر تەربەگەن جىلى جۇزدەسۋ رەتىندە ەستە قالدى. مەكتەپ شاكىرتتەرى مەن ستۋدەنتتەر مۇقاعالي كۇندەلىكتەرىنەن ءۇزىندى وقىپ, اقىننىڭ ءومىر تىنىسىن بەينەلەيتىن ساحنالىق قويىلىمدارىن كوپشىلىك نازارىنا ۇسىندى. «اقىن مۇراسى, مارجان پوەزياسى – ماڭگىلىك, بولاشاق ۇرپاقتىڭ ەنشىسى, قاستەرلەپ قادىرلەيتىن قازىناسى... ءبىزدىڭ ۇجىمعا قاراستى بارلىق كىتاپحانالاردا وتكەن شارالاردىڭ نەگىزگى ماقساتى – مۇقاعالي مۇراسى ارقىلى وقۋشىلاردى اسەمدىككە, ەلجاندىلىققا تاربيەلەي وتىرىپ, پوەزيا الەمىنىڭ سىرىن اشۋ. بۇل جوبالار جىل سايىن ۇزبەي ءوتىپ تۇرادى, – دەيدى الماتى قالاسىنىڭ ورتالىقتاندىرىلعان كىتاپحانا جۇيەسىنىڭ ديرەكتورى رۋزاننا بەكتۇرسىنوۆا.
قازاقستان جازۋشىلارى كىتاپحاناسىنىڭ مەڭگەرۋشىسى ەلەنا اعايسا: «مۇقاعالي شىعارمالارىنا ارنالعان شارالارعا قاتىسۋ ءۇشىن وقىرماندى ۇگىتتەپ جاتۋدىڭ قاجەتى جوق. اقىننىڭ ولەڭدەرى ماگنيت سەكىلدى, كىتاپحاناعا كەزدەيسوق كەلگەن وقىرماننىڭ ءوزى ءىس-شارانىڭ ىشىنە ەنىپ, جىر وقىعىسى كەلىپ تۇرادى», دەپ تەبىرەندى.
الماتى
