بەيبىت – مۇحيتتىڭ ارعى بەتىندە اۋىر جۇك كولىگىن جۇرگىزىپ جۇرگەن قاراپايىم قازاق بالاسى. اقىن-جازۋشىلاردىڭ شىعارماشىلىعىن تالداعاندا كانىگى مامانداردان قالىس قالمايدى. قازاق اقىندارىنىڭ جىرلارىن جاتقا وقيتىنى تاعى بار. بەيبىت پەن ونىڭ كومانداسى قولعا العان جوبانى Tik Tok جەلىسىندە كەزدەيسوق كورىپ, ايرىقشا قۋاندىق. مىڭداعان وقىرمانى بار اۋديتوريانىڭ تىكەلەي ەفيرى ءار سەنبىنىڭ كەشىندە قىزا تۇسەدى. ءار اپتا بەلگىلى ءبىر تۇلعاعا ارنالىپ, ءتۇرلى جاستاعى كورەرمەندەر قازاق اقىندارىنىڭ شىعارمالارىن جاتقا وقۋدان, سوزىنە جازىلعان اندەردى ورىنداۋدان, سونداي-اق ولارعا ارناعان ولەڭدەرىن وقۋدان سىنعا تۇسەدى.
– Tik Tok جەلىسىندە وتىرعان ميلليونداعان وقىرمان ءوز ۋاقىتىن ءمان-ماعىناسىز ۆيدەولاردى كورۋمەن وتكىزىپ جاتقانىنا كوڭىلىم قۇلازيتىن. ءبىر كۇنى نەگە وسى مۇمكىندىكتى پايدالانىپ ادەبيەتىمىزدىڭ كورنەكتى تۇلعالارىن, ولاردىڭ شىعارمالارىن جاس ۇرپاققا كەڭىنەن تانىستىرۋعا كۇش سالماسقا دەگەن ويعا كەلدىم. تاقىرىپتىق بايقاۋ ۇيىمداستىرۋ يدەياسى مەنىكى بولعانىمەن, قازىر ءبىز ۇلكەن كومانداعا اينالدىق. ايناگۇل كاسكينا, ءدىلمۇرات تۋلەباەۆ, اعجان ماراتقىزى, داناگۇل ارتىقباەۆا, ەلۆيرا دميتريەۆنا, زۇلقارناي ايۋپوۆ ەسىمدى ونەرگە جاقىن ازاماتتار كۇش بىرىكتىرىپ وقىرماندارىمىزعا جاقسى كونتەنت ۇسىنۋعا كۇش سالىپ ءجۇرمىز. ادەبي ساراپشىلارمەن دە كەڭەسىپ وتىرامىز. ساكەن سەيفۋللين مۇراجايىنىڭ عىلىمي قىزمەتكەرى قابيدەن قۋانىشباي بىزگە تالاپكەرلەردىڭ ونەرىن باعالاۋدا قولعابىس ەتەدى. جىر ەستافەتاسى كەيدە 3-4 ساعاتقا دەيىن سوزىلادى. تاۋەلسىز قازىلار القاسى جەڭىمپازداردى كوپشىلىكتىڭ كوز الدىندا انىقتايدى. قاتىسۋشىلاردى ىنتالاندىرۋ ماقساتىندا دەمەۋشىلەر ۇسىنعان قارجىلاي سىيلىق ۇلەستىرىلەدى. ءار بايقاۋ الدىندا وزىمىزگە دە تەرەڭ ىزدەنىستەر جاساۋعا تۋرا كەلەدى, كەيىپكەرلەردىڭ شىعارمالارىن زەرتتەيمىز, اسىرەسە تاريحي تۇلعالاردىڭ ومىرىنە قاتىستى تىڭ دەرەكتەردى قامتۋعا تىرىسامىز. سونداي-اق مۇراجايلار مەن ۇلى ادامداردىڭ ۇيلەرىنەن رەپورتاج ۇسىنامىز, ويتكەنى ول جەرلەرگە بارۋعا اركىمنىڭ مۇمكىندىگى بولا بەرمەيدى. ۇجىم ءبىر جىلدىق جوسپاردى بەكىتتى, بيىل قازاقتىڭ ۇلى تۇلعالارىنا ارنالعان 48 حابار وتكىزۋ ويىمىزدا, – دەيدى بەيبىت ءبورى.
اتالعان جوبانىڭ ارتىقشىلىعى – الەمنىڭ كەز كەلگەن نۇكتەسىنەن كەز كەلگەن ادام ونلاين بايقاۋعا قاتىسىپ باق سىناي الاتىندىعى.
ورىمدەي ورەندەردىڭ ولەڭ وقۋعا ىنتاسى اۋعانى قۋانتادى, – دەگەن كوماندا مۇشەسى ايناگۇل كاسكينانىڭ ايتۋىنشا, ابايدىڭ شىعارماشىلىعىنا ارنالعان اپتالىقتا 71 جاستاعى اقتوبەلىك مەيرامگۇل اپا جەڭىمپاز بولسا, ى.التىنسارينگە ارنالعان بايقاۋدا 3 جاستاعى رايانا كوپشىلىكتىڭ ىقىلاسىنا بولەنگەن. ال م.جۇماباەۆ شىعارماشىلىعىنا ارنالعان جوبادا جەتىسۋلىق وقۋشى نۇراي جەڭىسكە جەتسە, م.ماقاتاەۆ ولەڭدەرىنە ارنالعان جىر دوداسىندا استانالىق مۇرات ەسىمدى تاكسي جۇرگىزۋشىسى «گران-پري» نوميناتسياسىنىڭ يەگەرى اتانعان.
