مەشىتكە اللا تاعالانىڭ 99 كوركەم ەسىمىنىڭ ءبىرى ء«ال-فاتتاح» اتاۋى بەرىلگەن.
«استانادا مەشىتتەردىڭ قاتارى كوبەيىپ كەلەدى. مەشىت – مەيىرىمدىلىك مەكەنى, رۋحانياتتىڭ ورتاسى. قوعامدى ىزگىلىككە شاقىرىپ, يبالى بولۋعا ۇيرەتەتىن مەكتەپ. ارداقتى پايعامبارىمىز (وعان اللانىڭ سالاۋاتى مەن سالەمى بولسىن) ءبىر حاديسىندە: «كىمدە-كىم جەر بەتىندە مەشىت باستاسا, اللا تاعالا ول پەندەسىنە ءجانناتتان ساراي تۇرعىزادى» دەگەن. وسى مەشىتتىڭ بوي كوتەرۋىنە اتسالىسقان, ۇيىتقى بولعان اردا ازاماتتارعا اللا رازى بولسىن! كاسىپتەرىنە بەرەكە, وتباسىلارىنا اماندىق تىلەيمىن», دەدى قۇلشىلىق ورداسىنىڭ اشىلۋ راسىمىندە باس ءمۇفتي.
سونداي-اق جاڭا مەشىتتىڭ اشىلۋ سالتاناتىندا مەملەكەت جانە قوعام قايراتكەرلەرى, اقساقالدار ءسوز سويلەپ, باتا بەردى.
مەشىتكە باس ءمۇفتي بۇيرىعىمەن ەلوردا جاماعاتىنا جاقسى تانىس ءدىن قىزمەتكەرى باعدات ابدۋلكاريموۆ تاعايىندالدى. بۇعان دەيىن ء«ال-عاني» مەشىتىندە قىزمەت ەتكەن يمامدى جۇما نامازىنا جينالعان جاماعاتقا قمدب توراعاسى ناۋرىزباي قاجى تاعان ۇلى تانىستىرىپ, ەڭبەگىنە بەرەكە تىلەدى.
ايتا كەتەيىك, استانا تورىندە ەل يگىلىگىنە بەرىلگەن ون بەسىنشى مەشىتتە 500 ادام ەركىن عيباداتىن وتەي الادى. ء«ال-فاتتاح» مەشىتى ناماز زالىنان بولەك, ءدارىسحانا, يمامدار بولمەسى مەن قۇران وقۋ بولمەسى, ەرلەر جانە ايەلدەر دارەتحاناسىمەن قامتىلعان.
