تۇركياداعى جەر سىلكىنىسىنىڭ سالدارىن جويۋعا اتتانعان ەكىنشى ەشەلون قۇرامىندا 8 اقمولالىق قۇتقارۋشى دا بار. قۇتقارۋشىلار بارلىق قاجەتتى قۇرالدارمەن جانە كەرەك-جاراقتارمەن جابدىقتالعان. ءوڭىر تجد باسشىسى اتاپ وتكەندەي, قازاقستاندىق قۇتقارۋشىلاردىڭ باستى مىندەتى – ۇيىندىلەر استىندا زارداپ شەككەندەردى ىزدەۋ جانە باسقا دا اۆاريالىق-قۇتقارۋ جۇمىستارىن جۇرگىزۋ.
«سىزدەردى باۋىرلاس حالىققا بارىنشا كومەك كورسەتۋگە اتتاندىرامىز, قاۋىپسىزدىك ەرەجەلەرىن قاتاڭ ساقتاۋدى سۇرايمىن, ەڭ باستىسى, وزدەرىڭىزگە ساق بولىڭىزدار. اق جول, ساپارلارىڭ وڭ بولسىن جانە امان-ەسەن ورالىڭدار!» دەدى اقمولا وبلىسى تجد باستىعى نۇرلان اتىعاەۆ.
باسقا وڭىرلەردەن كەلگەن ارىپتەستەرىمەن بىرگە جەر سىلكىنىستەرىنىڭ سالدارىن جويۋعا كومەكتەسۋ ءۇشىن قاراعاندى وبلىسى تجد قۇتقارۋشىلار توبى دا تۇركيا اۋماعىنا جول تارتتى.
قاراعاندى كومانداسىنىڭ قۇرامىندا 15 ادام بار. ولار – تجد قۇتقارۋشىلارى, ونىڭ ىشىندە كينولوگيالىق ەسەپ, سونداي-اق اپاتتار مەديتسيناسى ورتالىعىنىڭ دارىگەرى مەن فەلدشەرى دە بار. كوماندا اۆتونومدى جۇمىستى ەسكەرە وتىرىپ, اۆاريالىق-قۇتقارۋ قۇرالىمەن, مەديتسينالىق م ۇلىكپەن, بايلانىس جانە تىرشىلىكتى قامتاماسىز ەتۋ قۇرالدارىمەن جاساقتالعان.
قاراعاندى وبلىسى تجد باسشىسى مۇرات قاتپانوۆ قۇتقارۋشىلاردى جولعا شىعارىپ, ءوزىنىڭ قىزمەتتىك بورىشىن ابىرويمەن اتقارۋعا شاقىردى.
تۇركيا مەن سيرياداعى جەر سىلكىنىسى زامانىمىزدىڭ ەڭ قاسىرەتتى اپاتتارىنىڭ قاتارىنا ەنەتىنى انىق. تابيعات وتە قاتال, ەشكىمدى دە ايامايدى. ءزىلزالادان زارداپ شەككەندەرگە وتانداستارىمىز, قاراكوز قانداستارىمىز ءبىرىنشى كۇننەن جانۇشىرىپ, قولدان كەلگەن قامقورلىعىن بەرىپ كەلەدى. ءبىرى قاراجات جيناپ, كەرەكتى دۇنيەنى ساتىپ الىپ اتتاندىرىپ جاتسا, ءبىرى كيىز ءۇي قامداپ, كەلەر كۇننىڭ قاجەتىن دە جەتكىزىپ بەرۋ ءۇشىن جانتالاسۋدا. ماسەلەن, بەلگىلى ءانشى ديماش قۇدايبەرگەن ءوزىنىڭ Instagram پاراقشاسىندا Stranger الەمدىك تۋرى اياسىندا كونتسەرتتەرىنەن تۇسكەن قاراجاتتىڭ ءبىر بولىگىن تۇركيا مەن سيرياداعى جەر سىلكىنىسى سالدارىنان زارداپ شەككەندەرگە كومەك رەتىندە بەرەتىنىن حابارلادى. ال قوعام بەلسەندىسى ارمان شوراەۆ پەن جۋرناليست نۇربەك بەكباۋ جۇرتتان جىلۋ جيناپ, ءزىلزالادان جاپا شەككەن تۇركياعا كومەك رەتىندە كيىز ءۇي جىبەردى. بىرەر كۇندە ولاردىڭ شوتىندا قازاقستاندىقتاردان 20 ميلليون تەڭگەدەن اسا قارجى تۇسكەن.
