قازمۋ-دىڭ جۋرناليستيكا فاكۋلتەتىن تامامداعان جاس قالامگەرمەن بىرگە كەزدەسۋگە ونىڭ اكەسى باقتيار مەن اناسى عاليا دا كەلدى.
ادەبي كەشتى قوعام قايراتكەرى, بىرنەشە كىتاپتىڭ اۆتورى, كەزىندە شاھاردىڭ مادەنيەت سالاسىن باسقارعان ەڭبەك ارداگەرى كۇليا ايداربەكوۆا جۇرگىزدى.
«جاميلامەن كەزدەسۋدى الدىن الا جوسپارلامادىق. سوندىقتان بۇگىنگى ءىس-شارانىڭ شىنايى وتەتىنىنە سەنىمدىمىن. قالامگەرىن كۇتكەن قالىڭ وقىرماندى كورىپ, كوڭىلىم مارقايىپ قالدى. وقىرماننىڭ جۇرەگىن جاۋلاعان ناعىز قالام يەسى ەكەنىن سودان سەزىندىم. ءجاميلانىڭ باسىنان وتكەن قيلى تاعدىرىن باياندايتىن بۇل كىتاپ مەنى بىردەن باۋرادى. جاتا-جاستانا وقىدىم. وسىلايشا, قالامگەر قىزدىڭ قارىم-قابىلەتىن مويىندادىم.
قازىرگى قوعامدا كوپ اكە بالالارى اۋىر دەرتپەن اۋىرىپ قالسا, اناسىنان كورىپ, وتباسىن تاستاپ كەتىپ جاتادى. سونداي كەزدە بۇكىل قيىندىق انانىڭ يىعىنا تۇسەدى. وسىنداي اۋىرتپالىقتى قايىسپاي كوتەرىپ جۇرگەن باتىر انالارىمىز بۇگىنگى قوعامدا قانشاما. ال باقتيار كەرىسىنشە, ءاردايىم قىزىنىڭ قاسىنان تابىلدى. جانىنا جەبەۋ بولدى. قىزىن دەرتتى جەڭىپ شىعۋعا جىگەرلەندىردى. اللا تاعالا ەشكىمدى بالامەن سىناماسىن, اكە-شەشەنىڭ كوزىنىڭ قاراسى مەن اعىنداي بالاپاندارى امان بولسىن», دەدى اقجارما تىلەگىن ارناعان ك.ايداربەكوۆا.
ادەبي كەشتە تاقىرىپقا وراي كىتاپحانانىڭ كوركەمونەرپازدار ۇجىمى ۇسىنعان ساحنالىق قويىلىم كورسەتىلىپ, ءان-جىردان شاشۋ شاشىلدى.
سودان سوڭ «بايشەشەك» كىتابىنىڭ ءماتىنىن اۋديونۇسقادا وقىعان ديكتورلار تەبىرەنە ءسوز سويلەپ, جۇرەكتىڭ تۇكپىرىن قوزعاعان كىتاپ مازمۇنى تۋرالى, وقۋ بارىسىندا بوساعان كوڭىلدەن كوز جاستارىن تىيا الماي, تالاي رەت جىلاپ العاندارىن ايتتى. ال وزبەك قالامگەرى زاكيرجان مومينجانوۆ كىتاپتى وزبەكشەگە ءتارجىمالاپ, ونى اۋديوجازبادا وقىعان ديكتور قالالىق وزبەك دراما تەاترىنىڭ ءارتىسى ديلفۋزا يبراگيمجانوۆا كەلەشەكتە تەاتر ۇجىمى «بايشەشەك» كىتابىنىڭ جەلىسىندە ارنايى سپەكتاكل قويۋدى جوسپارلاپ جاتقانىن, جاس جازۋشىنىڭ ولەڭدەرىنە ءان شىعارۋ ويدا بار ەكەنىن جەتكىزدى.
شىعارماشىلىق كەزدەسۋ كەشىندە كىتاپ اۆتورى ءجاميلا باقتيارقىزى ءسوز الىپ, وسىناۋ ءىس-شارانى ۇيىمداستىرعان كىتاپحانا ۇجىمىنا, بارشا جينالعان جۇرتقا العىسىن ءبىلدىردى.
«مەنىڭ اسىل دا اياۋلى وقىرماندارىم, تىلەكشىلەرىم. سىزدەرمەن قاۋىشقانىما وتە قۋانىشتىمىن. ادەبيەت الەمىنە قادام باسقان كىشكەنتاي «بايشەشەگىمدى» كوككە كوتەرىپ جاتقان كىتاپحانا قىزمەتكەرلەرىنە العىسىم شەكسىز. استانادا اكەم ەكەۋمىز شىمكەنتتەگى ءبىز تورىندە وتىرعان كىتاپحانانىڭ مەنىڭ شىعارمامدى اۋديوكىتاپ ەتىپ ازىرلەگەنىن ەستىگەندە, سەنەر-سەنبەسىمىزدى بىلمەي قاتتى قۋانعانىمىز ەسىمدە. شىنى كەرەك, بۇل كىتاپتى جازۋدى باستاعاندا كوڭىلدە كوپ كۇمان بولدى. جالپى, بۇل جازعانىم ەرتەڭ ءوز وقىرمانىن تابا ما دەگەن. كوپ ۋايىمدادىم. بىراق جۇرەكتەن شىققان دۇنيە جۇرەككە جەتەر دەگەن سەنىممەن سوڭىنا دەيىن جازىپ ءبىتىردىم. سەزىمىم الداماعان ەكەن. قالامىمنان تۋعان شىعارمام ورىس, وزبەك تىلدەرىنە اۋدارىلىپ, وقىرماندار جۇرەگىنەن ورىن الىپ كەلەدى. ءوز باسىم ارنايى كىتاپحاناعا كەلگەن وقىرمانداردى ناعىز قاھارمان سانايمىن. الەمگە شۋاق نۇرىن شاشىپ جۇرگەن جاندار ناعىز سىزدەرسىزدەر. كۇندەلىك رەتىندە تاعدىرىمنىڭ جەلىسىندە جازىلعان كىتاپتى قازمۋ-دا وقىپ جۇرگەندە وسىدان 3-4 جىل بۇرىن باستاعانمىن. الايدا پاندەميا كەزىندە قالامىمدى قاڭتارا تۇرۋعا تۋرا كەلدى. كەيىن قالامىمدى قايتا قولعا الىپ, جازۋعا كىرىستىم. مەن ءالى جاسپىن, ءومىردى كورىپ ۇلگەرگەن ادام ەمەسپىن. الايدا تاعدىردىڭ سىناعى جاس-كارىگە قارامايدى. سوندىقتان تەك سەنىم مەن ەرىك-جىگەر اۋىر سىناقتى جەڭىپ شىعۋعا كومەكتەسەدى. بۇل كىتاپ الداعى ۋاقىتتا ءالى تالاي وقىرماننىڭ جۇرەگىنە جول تاۋىپ, الەمدى شارلايتىنىنا سەنىمدىمىن. اللا تاعالا مىنا ومىردەگى ءبارىمىزدىڭ سىناعىمىزدى جەڭىلدەتسىن, ەڭ باستىسى قانداي تاۋقىمەتكە تاپ كەلسەك تە, قۇدايدان ءۇمىتىمىزدى ۇزبەيىك. شىن ىقىلاسپەن سەنگەن ادام باسىنا قانداي سىناق تونسە دە تۇبىندە ونى جەڭىپ شىعادى. سول ءۇشىن ەڭ اۋەلى سەنىم ارقىلى ىشكى رۋحىمىزدى بەكىتىپ الۋىمىز كەرەك. كىتاپتىڭ نەگىزگى باياندايتىن مازمۇنى وسىعان كەلىپ سايادى», دەدى اۆتور.
جاس قالامگەر ءجاميلا باقتيارقىزىنىڭ العاشقى تۋىندىسى 2021 جىلى جارىق كورگەن. كىتاپتىڭ «بايشەشەك» اتالۋىنىڭ دا وزىندىك سىرى بار. ءبارىمىز بىلەتىندەي, بايشەشەك كوكتەمنىڭ كەلگەنىنەن العاش حابار بەرەتىن, قارا توپىراقتى, اق قاردى ءبىرىنشى بولىپ جارىپ شىعاتىن ادال دا وجەت گۇل. كىتاپ اۆتورىنىڭ دا تاعدىرى وسى بايشەشەككە ۇقساس. جاراتۋشىعا دەگەن ادالدىعى, كۇرەسكەرلىك مىنەز بەن وجەتتىگى ارقىلى باسقا سالعان اۋىر سىناقتان امان ءوتىپ, ون جىل ايقاسقان اۋىر دەرتىنەن قۇلان-تازا ايىعىپ, اكە-شەشەسىنىڭ, تۋىستارىنىڭ جۇزىنە قۋانىش شۋاعىن سىيلاي ءبىلدى. ال تاعدىر سىناعىمەن كۇرەسۋگە جەتەلەگەن بۇلا كۇش بۇل سەنىم بولدى.
«بۇل كىتاپ قيىندىقتى اسقان سابىرمەن وتكىزگەن جاپ-جاس جاننىڭ جۇرەك لۇپىلىنەن كەلگەن يماني حابار. «بايشەشەك» –تاعدىر تۋرالى جازىلعان كىتاپ» دەپ باعا بەرىپتى بەلگىلى جازۋشى اشىربەك كوپىش كىتاپتىڭ العى سوزىندە.
شىمكەنتتەگى وقىرماندارمەن كەزدەسۋلەردەن بولەك, ادەبي شىعارماشىلىق كەش تالانتتى جاس قالامگەردىڭ تۋعان جەرى تۇركىستان وبلىسى تولەبي اۋدانىنداعى كوكسايەك اۋىلىندا دا ۇيىمداستىرىلدى.
شىمكەنت
