قىس تۇسكەلى ينجەنەرلىك جەلىلەرىنىڭ 62 پايىزى توزىپ كەتكەن قالانىڭ جىلۋ, سۋ, كارىز قۇبىرلارى قايتا-قايتا جارىلا بەرگەن سوڭ, وسى اپتانىڭ باسىندا قالا اكىمدىگى جەرگىلىكتى اۋقىمداعى تەحنوگەندىك توتەنشە جاعداي جاريالاۋعا ءماجبۇر بولعان.
توڭ ءجىبىپ, جىلۋ ماۋسىمى اياقتالعانعا دەيىن جالعاساتىن توتەنشە جاعداي اپات بولا قالعان جاعدايدا جەدەل قيمىلداپ, قوسىمشا كۇشتەردى جۇمىلدىرۋعا, قاجەتتى قارجىنى دا ۋاقىت سوزباي جىلدام بولۋگە مۇمكىندىك بەرمەك. ءتورت ايعا جۋىق ۋاقىت ىشىندە جىلۋ جانە سۋ قۇبىرى 74 رەت جارىلىپ, ونداعان تۇرعىن ءۇي مەن بيزنەس نىساندارى تاۋلىكتەپ جىلۋسىز قالعان قالادا قار كوبەسى سوگىلىپ, كۇن جىلىنعانشا, قۇبىردىڭ جارىلۋى قالىپتى قۇبىلىسقا اينالاتىن سىڭايلى.
جەرگىلىكتى بيلىك وكىلدەرىنىڭ ايتۋىنشا, گورنياكوۆ كوشەسىندەگى جەراستى قۇبىرلارى ءشىري-ءشىري جۇقارىپ, كادىمگى فولگا قاعازى سياقتى بولىپ قالعان. 2022 جىلى قالانىڭ جىلۋ جەلىسىن جوندەۋگە 5,5 ملرد تەڭگە جۇمسالىپ, بىرنەشە كوشەدە قۇبىر اۋىستىرىلعان. بۇل كوشەلەردە بيىلدىققا بىردە-ءبىر قۇبىر جارىلعان جوق. ال جەر استىنان جىك شىعىپ جاتقان كوشەلەردەگى قۇبىرلار كوپتەن بەرى جوندەۋ كورمەگەن.
«يندۋستريا جانە ينفراقۇرىلىمدىق دامۋ مينيسترلىگىنە الداعى جازدا جۇرگىزىلەتىن جۇمىستارعا بولىنەتىن قارجىنى ناقتىلاپ بەرۋدى ءوتىنىپ, ارنايى ساۋالحات جولدادىق. تەك رۋدنىي قالاسىنىڭ جىلۋ جەلىلەرىن جوندەۋدەن وتكىزۋ ءۇشىن شامامەن 11 ملرد تەڭگە قارجى كەرەك» دەيدى قالا اكىمدىگىنىڭ وكىلدەرى.
جىلۋ جەلىلەرىنىڭ جالپى جاي-كۇيىنە توقتالار بولساق, تەك رۋدنىيدا عانا ەمەس, بۇكىل وبلىس كولەمىندەگى جاعداي ءماز ەمەس. وڭىردەگى جىلۋمەن قامتۋ جەلىلەرىنىڭ جالپى ۇزىندىعى 810 شاقىرىم بولادى. ونىڭ 57 پايىزى توزعان. توزىعى جەتكەن قۇبىرلاردىڭ دەنى قالالىق مەكەندەردە جاتىر.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى المات عاپباسوۆتىڭ ايتۋىنشا, 2022 جىلى وڭىردە 19 شاقىرىم جىلۋ جەلىسى جوندەۋدەن وتكەن. بىلتىر جالپى قۇنى 8,6 ملرد تەڭگە بولاتىن 5 جوبا بويىنشا جەلىلىك جوندەۋ جۇمىستارى باستالىپتى. بۇل جۇمىستار ءالى دە ءجۇرىپ جاتىر. اتالعان جوبالاردى ويداعىداي اياقتاۋ ءۇشىن بيىل تاعى 1 ملرد تەڭگە ءبولىنىپتى.
2023 جىلى 4 شاقىرىم جىلۋ جەلىسى جاڭارتىلادى. قاڭتار ايىندا وتكەن جيىندا رەسپۋبليكالىق بيۋدجەتتەن 17,1 ملرد تەڭگە قارجىعا 9 جوبا قولعا الىناتىنى ايتىلدى. بۇل جوبالار جۇزەگە اسىرىلسا, وبلىستاعى توزىعى جەتكەن جىلۋ جەلىلەرىنىڭ كورسەتكىشى 57 پايىزدان 55 پايىزعا دەيىن كەميدى, – دەدى باسقارما باسشىسى.
الداعى كۇندەرى مۇنان وزگە تاعى 41 شاقىرىم جىلۋ جەلىسىن جوندەۋدەن وتكىزۋ جونىندەگى جالپى قۇنى 17 ملرد تەڭگەگە جۋىق 12 جوبا ساراپتاماعا جىبەرىلمەك.
قوستاناي وبلىسى
